Tnyanuk pupule na katutun anggur ma botuan
15:1-8
1 Yesus nfalak tnyanuk pupule ber Ni manglartar farye:
“Yakw ye kweluk katutun anggur ma botuan,
ma Amangw e farlan let anggur nruany.
2 Ma Yakw Ningw tomwatar a ne farlan katutun sangnir.
Ma farlan sangnir a ne to rabu e I keta npet kalin sir.
Ma sangnir ma rabu a ne keta npet kalin ketnir a nbal ma naflerap donyar nema rabu e rtafal ma rampew.
3 Ma kmi monuk a ne farlan katutun sangnir ma raflerap sir a ne.
Kmi minglerap fali kmi milele anftutwar ma kuftutu ber a kmi a ne.
4 Mpa ka dedesar ma dalmir lese myor Yakw,
mpe keta dalangw lese kor a kmi a nbal.
Iane feleles farlan katutun anggur a ne sangnir,
keta to bise ma rabu farlan sangnir a ne to ratrisan rof tenany.
Ma kmi a nbal farlan to dalmir lese myor Yakw keta to bise ma myose myal sasaf ma nangafel.
5 Yakw ye farlan katutun anggur,
ma kmi e farlan katutun a ne sangnir.
Ise ma dalamy lese nor Yakw,
keta dalangw lese kor I a nbal,
ma keta i nose safe-safe ma nangafel.
Fali farlan to dalmir lese myor Yakw keta to bise ma myose myal sasaf ma nangafel.
6 Tomwate ma to dalam lese nor Yakw,
i feleles farlan katutun sangnir ma rpet kalin rof tenany.
Ma keta tomwatar rabutin sangnir ma rmangret a ne betno ryebas far au dalam nema au nane sir.
7 Farlan dalmir lese myor Yakw ma myose mlyarat Ningw ngribatnir,
keta safe-safe motak ma mtyak myof Ratu ne I nal ber a kmi.
8 Farlan myose safe-safe ma nangafel iane ma nwayat ma tomwatar rdangin Amangw Ratu.
Ma iane mfyatutu feti kmi myeluk Ningw manglarat.”
Yesus nsurat Ni manglartar ma ka rmorip e rakamis sir
15:9-17
9 Yesus nfalak,
“Yakw kwamis a kmi farlan ma Amangw nkamis Yakw.
Mpa ka dedesar ma dalmir lese myor Yakw nema bise ma kfwatutu feti kwamis a kmi.
10 Farlan myose mlyarat Ningw faretar,
keta dedesar ma kfwatutu feti kwamis a kmi.
Iane feleles farlan Yakw kose klwarat Amangw Ni faretar,
ma I dedesar ma nfatutu feti nkamis Yakw.
11 Yakw kfwalak kabanir monuk ye ber a kmi,
nema dalmir a rsenang feleles farlan ma Yakw kswenang.
Ma iane nwayat ma keta dedesar ma dalmir a rsenang resi.
12 Yakw kfwalak ma ka myose farete ye:
Ka mikamis a kmi,
farlan ma kwamis a kmi.
13 Tomwate ma nmpeang ma nmat a nlitan tbwarnir,
iane nfatutu feti ni ankamis nlie nlengan ma ber sir.
Ma to ankamis ma nlengan nof a ne.
14 Farlan kmi myose mlyarat Ningw faretar,
iane tbwaringw ber a kmi.
15 Ma keta to ktwar a kmi a na mangkaryae lo,
fali mangkaryae to nafai safe ma ni bos a nose.
Nempa keta ktwar a kmi a na tbwarngur fali safe-safe monuk ma kdwengar kof Amangw a ne kfwalak ma ber a kmi lo.
16 Kmi to mfyil Yakw nempa Yakw kfwil a kmi.
Yakw kswiduk a kmi ma mtyi ma myose karya ngamonar,
nema karya ngamonar ma kmi myose ne dedesar ma rangafel.
Farlan kmi myose farane,
safe-safe motak ma mtyak myof Amangw,
keta I nal ber a kmi fali milele Yakw.
17 Yakw kfwalak ma ka myose farete ye:
Ka mikamis a kmi.”
Tomwatar ma to ralele Yesus rkedan I ror Ni manglartar
15:18-27
18 Farlan tomwatar ma to ralele Yakw ne rkedan a kmi,
ka minremi feti sir rkedan Yakw baluan lo.
19 Mpa farlan kmi myorip a mbyalak tomwatar ma to ralele Yakw,
botuan feti keta sir rkamis a kmi fali nir tomwatar ber a kmi.
Nempa Yakw kfwil a kwese kmi kof sir,
mpa kmi to myorip a mbyalak sir lo.
Iane nwayat ma sir rkedan a kmi.
20 Ka minremi safe ma kfwalak ber kmi a ne lo feti Mangkaryae to silai i a nlengan nof ni bos.
Tomwatar rsil a rbabal Yakw lo,
mpa keta rsil a rbabal kmi a nbal.
Nempa tomwatar ketnir ma rose rlarat Ningw ngribatnir a ne,
keta sir rose rlarat mir ngribatnir a nbal.
21 Tomwatar rose safe-safe monuk a ne ber a kmi fali kmi myeluk Ningw manglartar.
Ma sir rose farane fali sir to rafai Ratu ma nsiduk Yakw ne.
22 Farlan Yakw to kmwa ma kuftutu sir,
keta rdaun motak feti to nir sale.
Nempa Yakw kmwa ber sir lo ma kuftutu sir,
mpa to bise ma rose nir lole ma rfalak feti to nir sale.
23 Ise ma nkedan Yakw,
iane nkedan Amangw a nbal.
24 Yakw kose kabain mpasalnar na tomwatar twalelenir lo,
ma kabain mpasalnar a ne ma tomwatar to rose fuky.
Ma farlan Yakw to kose farane,
keta neluk lole ber sir ma rfalak feti to nir sale.
Ma lere ye sir rsalan safe-safe monuk ma Yakw kose ne lo,
nempa dedesar ma rkedan Yakw.
Ma sir rkedan Amangw a nbal.
25 Nempa sir rose farane nema rafdiat safe ma rarengi na tetetkar ma luryain e Ratu nal ber Musa feti:
“Sir rkedan Yakw,
nempa to rafai feti safe nwayat ma rkedan Yakw.”
26 Keta Yakw kswiduk Ratu Smwangtany ma nlikur Yakw la ntulung a kmi.
Smwangtany a ne nma nof Amangw,
ma I keta nfatutu kmi ma mkyaul myal kabain botunar na Ratu.
Noak ma I nma,
keta I nfalak safe-safe na Yakw ber a kmi.
27 Ma kmi a nbal e ka mfyalak safe-safe na Yakw ber tomwat walyetar,
fali noak ma betno kuftutu tomwatar na saryamprene e kmi myor Yakw lo.