Yesus nasaur tnyanuk pupule na festa nika
22:1-14
1 Yesus nfalak tnyanuk pupule nbal ber tomwat ngayadin farye:
2 “Noak ma Ratu neluk Rai ma nfarete tomwatar,
iane farlan rai sa ma nose festa nika ber anaky merwane.”
3 Noak ma rasusan monuk festa ne,
rai ne nluan ni mangkaryayar ma rtar tomwatar ma nundang sir ma rti festa ne,
nempa sir to rmpeang ma rti festa ne.
4 Mpe i nluan ni mangkarya walyetar a nbal ma rti rtar tomwatar ma nundang sir a ne.
I nfalak,
“Mtyi mfyalak ber sir farye,
mya ma ti festa lo!
Fali sir rfen sapi merwane numur sapi anak madunkar sa ma rdane lo.”
5 Nempa tomwatar ma nundang sir a ne to rfaduli.
Ketnir rti letar,
ketnir a nbal e rurus nir karyayar.
6 Ma tomwatar ketnir e romat rai ni mangkaryayar a ne ma rsil a rbabal sir,
ma rfen sir.
7 Noak ma rai ndengar farane i nares desar,
mpa nluan ni suldadwar ma rti rfen tomwatar ma rfen ni mangkaryayar a ne,
ma rapu nir kote ne.
8 Ne nfalak ber ni mangkaryayar,
“Yakw kususan monuk festa nika ye lo,
nempa tomwatar ma kundang sir a ne to rfaduli,
mpa to ubany ber sir ma rma festa ye.
9 Mpa mtyi dalamten kaumpwar.
Na iano keta mtyungan tomwatar yadin.
Ne mtyar sir monuk a ne ma mfyalak ma rma festa ye.”
10 Mpe mangkaryayar a ne rti dalamten kaumpwar ma ratare tomwatar monuk ma rtungan sir a ne,
boloka sir a ne tomwat yatkar nre tomwat ngamonar.
Iane nwayat ma festa ne nfen ber tomwatar.
11 Noak ma rai ne nti festa dalam e i nsalan tomwat sa ma nfonak i e to nangafel nbalak tomwatar ma rti festa ne.
12 Ne rai ne nfalak ber i,
“Awa,
safema ko mwa e to mfwonak rabit ngafele far tomwatar ma rma festa ye?”
Nempa tomwate ne namlin motak.
13 Mpe rai ne nfalak ber ni mangkaryayar,
“Mkyete tomwate ye limany emany,
betno myebas i far burit na makrokap dalam.
Tomwatar ma ramin iane keta rtasing dedesar ma rkoman suse silai desar.”*
14 Lama Yesus nasaur monuk tnyanuk pupule ne I nfalak farye:
“Ratu ntar tomwatar yadin,
nempa I nfil lan tomwatar ketnir nof sir a ne.”
Tomwatar ka rbayar ulnir batin ber Ratu nre ber Kaisar
22:15-22
15 Mpene tomwat Farisyar rti a rtate Yesus ma raale andaun.
Sir rose farane la rateman I ror ngengentar nema farlan natanuk sale e bise ma romat I.
16 Mpa rluan nir manglartar numur Herodes ni tomwatar ketnir ma rti rakmat Yesus.
Ne rfalak ber I,
“Tuangguru,
kam mafai feti Ko ye tomwatar sa ma mumlonry.
Ma mfwatutu Ratu Ni dalamtene e to mumudim sasaf,
ma to mumtaut tomwate fen lese nbal fali to musalan sou.
17 Mpa no mfwalak ber kam,
nof kit ninr agame ni yayatrwar e bise ma tbayar ulbatyar ber Kaisar nre tate?”
18 Nempa Yesus nafai nir andaun yatkar mpa nfalak,
“Hei lepuskwar a kmi!
Ali miteman Yakw e?
19 No myal doit ma mpyaki la mbyayar ulmir batin a ne ma kswalan.”
Ne sir ral doit dinar sa ber Yesus.
Doit dinar (22:19)
20 Ne I nenrat sir,
“Ise walun ma ngarany na doit ye?”
21 Ne sir rfalak,
“Kaisar.”
Ne Yesus nfalak ber sir,
“Farane e myal ber Kaisar safe ma Kaisar nie,
ma myal ber Ratu safe ma Ratu nie.”
22 Lama rdengar farane sir rampriang.
Ne rti a rtate Yesus.
Yesus naftutu feti keta mangmwate nmorip a nbali
22:23-33
23 Na lere ne tomwatar ketnir rof faburat Saduki rma ma rakmat Yesus.
Sir ye ma to ralele feti mangmwatar bise ma rmorip a rbali.*
24 Ne renrat Yesus,
“Tuangguru,
Musa nfalak feti,
farlan merwanar sa nmat ma to anaky,
ka merwane ne wainy nafsau nor sawany a ne nema nal anaky ber wainy ma nmat a ne lo.*
25 Na ler sa e tomwatar itw ye rof kam mamy pnue.
Sir ye awayar sir.
Keyai nafsau nor batar sa,
nempa famudi e nmat.
Ma fali to anaky,
mpa ka wainy kedua nafsau nor sawany a ne.
26 Ne radu a rafsau nempa to anaky a fuky e merwane ne nmat a nbal.
Ma merwan ketiga e feleles a nbal terik ma raitw a ne rafsau ror bate ne,
ma rmat monuk.
27 Ma famudi e bate ne nmat a nbal.
28 Mpa nait ma Ratu nafmorip a nbali mangmwatar e keta nof raitw a ne ise sawany ber bate ne,
fali raitw a ne rafsau ror i lo.”
29 Ne Yesus nfalak,
“Kmi mdyaun farane iane sale desar,
fali kmi to mkyaul myal Kitap lelerap dalam,
ma to mifai Ratu Ni kuase.”
30 Fali noak ma Ratu nafmorip a nbali mangmwatar,
keta tomwatar to rafsau lo.
Nempa keta rmorip farlan malaektar na surga.
31 Botuan feti kmi mbyaca na Kitap Lelerap dalam lo na mangmwatar ma rmorip a rbali nre!
Luryain e Ratu nfalak ber empninrar nusninrar:
32 “Yakw ye ma kweluk Ratu ber Abraham,
Ishak ma Yakub.
Boloka sir rmat lo nempa dedesar ma rmorip ror Ratu ma rsatngur ber I terik lere ye.
Iane nwayat ma I neluk Ratu ber mangmorpyar,
ma to neluk Ratu ber mangmwatar.”*
33 Noak ma tomwat ngayadin rdengar Yesus Ni anftutwar a ne,
sir rampriang desar.
Farete ma ubany desar
22:34-40
34 Yesus nose ma tomwat Sadukyar a ne to bise ma rfalak sasaf.
Noak ma tomwat Farisyar rdengar farane,
rafburat sir.
35 Ne tomwatar sa nof sir a ne nenrat Yesus ma nateman I.
Tomwate ne tuanggurw agamar sa i.
I nenrat Yesus farye:
36 “Tuangguru,
nof tetetkar monuk ma Ratu nal ber Musa e faret mpe ye ma ubany desar?”
37 Ne Yesus nfalak,
“‘Ka mkyamis mir Ratu ma neluk mir Mangnrure ne myor dalmir kateman.
Ma noak ma myose safe-safe motak ma mdyaun safe-safe motak e ka mfyatutu feti mkyamis i.’*
38 Iane farete ma ubany ma nlie nlengan desar.
39 Ma faret sa nbal farye:
‘Ka mkyamis tomwat walyetar feleles farlan ma mkyamis a kmi a nbal.’*
40 Mpa tetetkar monuk ma Ratu nal ber Musa ma yayatrwar ma ramin nabyar nir kitpar a ne rof lan faretar du ye.”*
Yesus ye rai Daud ni Mangnrure ma ni dasdalam a nbal
22:41-46
41 Noak ma tomwat Farisyar rafburat sir e Yesus nenrat sir,
42 “Nof mir andaun e Ray Silai ye ise I?
Ma I nof dasdalam mpe ye?”
Ne sir rfalak,
“Nof dasdalam Daud.”
43 Ne Yesus nfalak,
“Farlan farane,
noak ma Ratu Smwangtany nkuase Daud luryain a ne,
safema ntar Ray Silai ne feti ni Mangnrure?”
Daud nfalak,
44 “Ratu nfalak ber ningw Mangnrur Silai,
‘mumtoran seringw fian,
terik ma kose ma Nim muswar monuk rsatngur ber Ko.’*
45 Mpa farlan Daud nfalak feti ni Mangnrure ber Ray Silai,
nof mpe ma rfalak feti Ray Silai ye nof dasdalam Daud?”
46 Ne to tomwate fen lese ma nbali nal Yesus Ni ngengentar a ne.
Ma nof a ne nbal to tomwate fen lese ma nbaran ma nenrat safe-safe nof I lo.