Ngengentar na Yesus Ni kuase
20:1-8
1 Na ler sa e,
Yesus naftutu ma nafwibar Ibar Ngamone ber tomwat ngayadin na Ratu Ni Das Silai.
Ne mangsomp ulnir,
ma mangaftutu Musa ni faretar,
raktem mangfaret Yahudyar rti ain a ne,
2 ma rfalak ber Yesus,
“No mfwalak ber kam Ko Nim kuase safe la mose kabanir monuk ye?
Ma ise nal kuase ne ber Ko?”
3 Ne Yesus nfalak,
“Mpe kose ma kwenrat a kmi a nbal.
4 Ise ma nal kuase ber Yohanes la nadiris tomwatar?
Ratu nre tomwate?”
5 Mpe rafalak ber sir,
“Farlan kit tfalak feti,
‘Ratu ma nal Ni kuase ber i,
keta nfalak,
farane e,
safema kmi to milele i?’
6 Nempa farlan kit tfalak feti,
‘Tomwate ma nal kuase ber i,’
keta tomwatar monuk rakjai kit ror batyar,
fali sir ralele feti Yohanes ye nabyar sa i.”
7 Mpa rfalak,
“Kam to mafai feti ise ma nal kuase ber Yohanes ma nadiris tomwatar.”
8 Mpene Yesus nfalak ber sir,
“Farane e,
to kfwalak ber a kmi a nbal feti ise nal kuase la kose kabanir monuk ye.”
Tnyanuk pupule na tomwatar ma rkarya na let anggur
20:9-18
9 Ne Yesus nasaur tnyanuk pupule ye ber tomwat ngayadin a ne,
“Ler sa e tomwatar sa ntanam anggur na ni lete.
Betno nsewe tomwatar ketnir ma rajake lete ne ma nti nus walyete ma namin a no far dodo.*
10 Nait ni tewat ma rtikar anggur bunir e,
lete nruany ne nluan ni mangkaryayar sa ma nti nakmat tomwatar ma rsewe ni lete ne nema ral ni wayat.
Nempa tomwatar a ne rbabal i betno rluan ma nbali i ma to nonry sasaf.
11 Ne nluan ni mangkaryayar sa nbal;
nempa tomwatar ne rbabal ma rarikan i betno rluan ma nbali i ma to nonry sasaf.
12 Ne nluan ni mangkaryayar sa nbal ma fen ratel.
Nempa rbabal i a nbal terik ma namngal,
betno ryebas i far kakyelap.
13 Ne lete nruany ne ndaun feti,
‘Keta kose farpe nbal?
Ni ngafele e,
klwuan motak anakw ma kwamis resi i ye.
Nema bise ralang i!’
14 Nempa noak ma rsalan anaky ne,
rafalak ber sir feti,
‘Kanak ye lo ma keta nonri monuk lete ye.
Mpa tfen i,
nema tonri monuk lete ye.’
15 Mpe rakei i far kakyelap betno rfen i.”
Ne Yesus nenrat tomwat ngayadin a ne,
“Keta lete nruany ne nbali i e,
nose farpe tomwatar a ne?
16 Botuan feti keta nma e,
nfen sir betno nal lete ne ber tomwat walyetar.”
Tomwatar rkaul ral Yesus Ni ansaur ne mpa rfalak ber I,
“Ka kete desar!”
17 Nempa Yesus nfon dedesar sir ma nfalak,
“Botuan feti kmi mbyaca ayat na Kitap Lelerap dalam ma nfalak farye:
‘Bati ma tuknar a ryebas i,
*lere ye neluk baty fakoran lo.’
18 Tomwatar ma to rlangun Yakw keta suse desar ber sir farlan ma rfufw a na bati,
nre farlan bati ntait sir mpa keta rapris farlan ompak ma knryai.”
Yesus naftutu na ma rbayar ulnir batin
20:19-26
19 Mangaftutu Musa ni faretar ma mangsompar ulnir rafai feti Yesus nasaur tnyanuk pupule ne snyain sir.
Mpa rose ma romat I lere ne nbal,
nempa ramtaut tomwat ngayadin.
20 Mpa ranaumat desar Yesus.
Sir rsewe tomwatar ma rose felnir farlan tomwat malondyar,
ma rateman I ror ngengentar,
nema natanuk sale e,
bise ma romat I ma ror I ber mangkuase Roma.
21 Mpe tomwatar ma rsewe sir a ne rfalak ber Yesus,
“Tuangguru,
kam mafai feti safe-safe monuk ma mfwalak ma muftutu ne botuan.
Ma muftutu Ratu Ni dalamtene to musalan sou,
fali mfwalak lan kabain botunar.
22 Mpa no mfwalak ber kam,
nof kit ninr agame ni yayatrwar e,
bise ma tbayar ulbatyar ber Kaisara nre tate?”
23 Nempa Yesus nafai nir andaun yatkar a ne.
Mpa nfalak ber sir,
24 “No myal doit dinar sa ma kswalan.
Ise walun ma ngarany na doit a ne?”
Ne rfalak “Kaisar!”
25 Mpa Yesus nfalak ber sir,
“Farane e myal ber Kaisar safe ma Kaisar nie,
ma myal ber Ratu safe ma Ratu nie.”
26 Sir rampriang safe ma Yesus nfalak a ne.
Ma to rbae Yesus Ni sale fen lese nbal.
Iane nwayat ma to ain ma romat Yesus na tomwat ngayadin sonirlury,
mpa ramlin motak.
Yesus naftutu na mangmwate nmorip a nbali
20:27-40
27 Tomwatar ketnir rof faburat Saduki rma rakmat Yesus.
(Sir ye ma to ralele feti mangmwatar bise ma rmorip a rbali.)
Mpa renrat Yesus,*
28 “Tuangguru,
Musa narengi tetetkar ye ber kit lo feti:
farlan merwanar sa nmat ma to anaky,
ka merwane ne wainy nafsau nor sawany a ne nema nal anaky ber wainy mangmwate ne.*
29 Na ler sa e,
tomwatar itw ye awayar sir.
Keyai nafsau nor batar sa,
ne to anak a fuky e,
merwane ne nmat lo.
30 Ne merwan kedua nafsau nor bate ne,
ma to anak a fuky e,
merwane ne nmat a nbal.
31 Ne merwan ketiga e feleles a nbal terik ma raitw a ne rafsau ror bate ne,
nempa rmat monuk ma to angkir.
32 Famudi e,
bate ne nmat a nbal.
33 Nait ma Ratu nafmorip a nbali mangmwatar e,
keta ise sawany ber bate ne?
Fali raitw a ne rafsau ror i lo.”
34 Ne Yesus nfalak,
“Tomwatar ma rmorip a na saryamprene e,
rafasawe sir.
35 Nempa tomwatar ma Ratu nfil sir ma rmorip a rbali rof mamate,
ma rmorip na are ma nma ye,
keta tomwatar to rafsau lo.
36 Ma keta to rmat fali nir momorip farlan malaektar.
Sir reluk Ratu angkir lo,
fali Ratu nafmorip a nbali sir.
37 Musa koko i a nfalak lo feti keta mangmwatar a rmorip a rbali.
I narengi na Kitap Lelerap dalam noak ma nsalan au ma nfolur na skiki kakari dalam a ne.
I narengi feti ‘Ratu ye neluk Mangnrur Silai ber Abraham,
Ishak ma Yakub.’*
38 Iane feti I to neluk Ratu ber mangmwatar,
nempa neluk Ratu ber mangmorpyar!
Fali na Ratu sounlury tomwatar monuk a rmorip.”
39 Rdengar farane,
mangaftutu Musa ni faretar ketnir a rfalak,
“Tuangguru safe ma mfwalak ne diat desar.”
40 Ntabw nof lere ne sir to rbaran ma renrat safe-safe rof Yesus lo.
Ray Silai ye rai Daud ni dasdalam ma neluk ni Mangnrur Silai a nbal
20:41-44
41 Mpene Yesus nenrat sir,
“Safema tomwatar rfalak feti Ray Silai ye nof dasdalam Daud?”
42 Safo Daud koko i narengi na kitap Mazmur dalam feti,
“Ratu nfalak ber ningw Mangnrur Silai:
Mumtoran na seringw fian ye,b*
43 titerik ma kose ma Nim muswar monuk rsatngur ber Ko.”
44 Mpa farlan Daud nfalak feti ni Mangnrure ber Ray Silai,
nof mpe ma rfalak feti Ray Silai ye nof dasdalam Daud?
Ka kete mlyarat mangaftutu Musa ni faretar nir langtwar
20:45-47
45 Noak ma tomwat ngayadin lolone rdengar Yesus natanuk e,
nfalak ber Ni manglartar,
46 “Ka mijake kmi myof mangaftutu Musa ni faretar.
Sir rmpan e rmpeang ma rfonak rabit melaswar,
ma rmpeang ma tomwatar ralang sir a na nus ngayadin.
Farlan rti das sampayang nre festayar e rmpeang lan ma ramtoran lury.*
47 Sir rfule bat somar ma ral nir dasebabe.
Ma rsampayang e dodo rut la rteri nir adat yatkar,
keta Ratu nukun sir maberat desar!”