Orusiku rwa Raatabhugenyi Yeesu
5
1 Nawe,
emwe abhayiri bheeswe,
bhutari‑wo obhukene bhwa okubhakaamira inguru ya omwanya na orusiku runu Raatabhugenyi Yeesu arisubha rindi.
2 Okubha emwe abheene,
omumenya kisi ati,
orusiku rwa okusubha Raatabhugenyi Yeesu,
ruribha rwa okutakya era rwa kutyo omwifi kaaja mu‑ngeta.
3 Omwanya gunu abhaanu bharyayikaga ati,
“Chiri na omurembe,
itambara itari‑wo,”
awo niwo,
obhunyamuke bhuribheejira.
Obhunyamuke obhwo bhuribhatakya,
rwa kutyo omugasi unu afugaaye kaarumwa obhusungu korereki eebhure.
Ka wone bhatariikenga nabhwo wuri.
4 Tari,
emwe abhayiri bheeswe,
mutari mu‑chisuute rwa abhaanu bhanu bhachaari okuta ebhibhiibhi,
kutyo,
orusiku orwo rutaribhatakya rwa kutyo omwifi kaakora.
5 Emwe bhoone muri bhaana bha obhweru,
ka wone muri bhaana bha mu‑mwisi.
Emwe na eswe,
chitari abhaana bha mu‑ngeta nooro bha mu‑chisuute.
6 Mbe,
chisige okubha rwa abhandi bhanu bhawongeeye.
Nawe,
eswe chitengeeje na chiyingirire.
7 Mu‑ngeta nigwo omwanya gunu abhaanu abhawongera.
Ka wone,
nigwo omwanya gunu abhanywi bha obhwarwa,
abhakorwa.
8 Nawe eswe,
chiri bhaana bha mu‑mwisi,
kurwa ejo chiyingirire.
Eriikirisya na eryenda bhibhe mu‑myoyo jeeswe.
Okubha ebhiinu ebhyo,
bhiri rwa ingubha ya echuuma ku‑bhifubha bhyeswe.
Chiyikanye wone ati,
Nyamuwanga arichichungura,
niwo echibha wuti chifwaye ingofiira ya echuuma ku‑mitwe.
9 Nyamuwanga ꞉ataachisorere korereki achisingaarisye kwa risungu ryaye,
tari ꞉aachisorere korereki Raatabhugenyi weeswe Yeesu Kirisito achichungure.
10 Oyo niwe ꞉aachifwiriiye,
korereki chibhe aamwi nage,
omwanya gunu chiri abhawanga amwi omwanya gunu chifuuwe.
11 Mbe,
mugenderere okusimbisyanya na okukomeesyanya emwe abheene kwa abheene,
ka wone omusango ogwo nigwo omukora nooro woori.
Itungwa inu iiyire ku‑bheekirisya
12 Woori,
emwe abhayiri bheeswe,
echibheeririra mugayuke abhaanu bhanu abhakora emirimu ja Nyamuwanga mw‑imwe,
abhabhatangasya na okubhagonya ku‑bhuturo bhwa Raatabhugenyi Yeesu.
13 Mubhayaane echibharo na mubheende muno okuruubhana na emirimu jeebhwe ja okubhasakira emwe echinyamwoyo.
Ka wone mwikare kwa omurembe,
emwe abheene kwa abheene.
14 Emwe,
abhayiri bheeswe,
echibheeririra mugonye abharenga na musimbiisye bhoone bhanu bhafuuwe emitima.
Ka wone musakire bhanu bhatari na amanaga na mubhe na obhwigumiirisya ku‑bhaanu bhoone.
15 Mwangarire,
omuunu woonewoone aasiga okusubhya orusiima ku‑weejaabho.
Tari bhuri rusiku mwikomeesye okukoreraniraga ja ekisi,
emwe abheene kwa abheene.
Mukore kutyo ku‑bhaanu bhoone.
16 Mubhe na rikonderwa bhuri rusiku,
17 mwasiga okuyigwa okusabhwa Nyamuwanga.
18 Musiime Nyamuwanga ku‑bhuri musango,
kwa okubha ejo nijo omwene keenda emwe mukore rwa kutyo Kirisito Yeesu ꞉aachiyigisiisye okukora.a
19 Mbe,
musige okuyingirira Mwoyo Mweru okukora emirimu jaaye.
20 Ka wone musige okurema obhuragi,
21 tari,
muregeeje emisango joone ja obhuragi,
nawe mugwate‑mo ja ekisi
22 na mwikenge na obhubhiibhi bhwone bhwa bhuri mbaga.
23 Nyamuwanga omwene,
niwe kaachiyaana omurembe.
Woori,
abheesye ebhibhiibhi bhyemwe bhyone,
ka wone aangarire emitima jeemwe,
emyoyo jeemwe na emibhiri jeemwe,
korereki omwanya gunu Raatabhugenyi weeswe Yeesu arisubha rindi,
mubhe mutari na esoro.
24 Nyamuwanga niwe kaabhabhirikira,
aribhakorera ejo joone,
kwa okubha omwene ni mwiyikanyibhwa.
Emisango ja okuragana
25 Woori,
abhayiri bheeswe,
muchisabhirwe eswe wone ku‑Nyamuwanga.
26 Mukeesye abhayiri bheeswe bhoone mu‑ryenda rya Kirisito.
27 Enibharagirira ku‑bhuturo bhwa Raatabhugenyi Yeesu ati,
musomere abhayiri bhoone inyarubha inu.
28 Obhwitiriranya bhwa Raatabhugenyi weeswe Yeesu Kirisito,
bhubhe aamwi na emwe bhoone.