Pawuro koongwa obhusurumbaaye ku‑songa ya Abhayisirayeeri
9
1 Kirisito kaamenya ati chinu enaayika woori, ni chimari era. Noorwo omutima gwani gunu ogutangasibhwa na Mwoyo Mweru wone ogumbambaarira ati, nitakwayika orubheeyi. 2 Chimari, anye niri na obhusurumbaaye bhwafu muno na obhusungu bhwafu mu‑mwoyo gwani 3 ku‑songa ya abhaanu bha riyanga ryani. Araabha jikaturikeene, anye omwene nikeekirisiisye okwiyiimwa na okukindikwa na Kirisito, araabha okukora kutyo kukabheeye nikusakira abhayiri bhaani abho bheekirisye Kirisito. 4 Abho nibho Abhayisirayeeri, abhaanu bhanu Nyamuwanga ꞉aasorere bhabhe abhaana bhaaye, ꞉aabheeresiisye rikusyo ryaye na ꞉aakorere jindaganoa nabho. Ka wone ꞉aabhayaaye ebhiraagiro bhyaye, aamwi na emirago jaaye, na ꞉aabharagiriiye kutyo jeenderwe bhamuramye. 5 Abhayisirayeeri abho nibho orwibhuro rwa bhasaaja Bhurayimu, Isaaka na Yakobho. Echinyamuunu, noorwo Kirisito ni Muyisirayeeri. Kirisito, niwe Nyamuwanga, Omukuru wa bhyone, akusibhwe akajaanende koone!b Jibhe kutyo.6 Nitakwayika ati Nyamuwanga ꞉aataamiibhwe okukuumisya emirago jaaye ku‑Bhayisirayeeri. Jitari kutyo, kwa okubha bhatari Bhayisirayeeri bhoone bhanu bhari Bhayisirayeeri bha echimari. 7 Jitari ati orwibhuro rwone rwa Bhurayimu nibho abhaana bhaaye bha echimari. Tari Nyamuwanga ꞉aaragire Bhurayimu ati, “Okutura ku‑Isaaka uribhona orwibhuro runu ruritogwa ati ni rwawo.”c 8 Obhugajuro bhwa emisango ejo ni ati, abhaana bha Nyamuwanga bhatari bhaana bhoone bha Bhurayimu bhanu ꞉bheebhuuywe echinyamubhiri, tari ni rwibhuro rwaye runu ꞉rwebhuuywe okuruubhana na omurago gwa Nyamuwanga. 9 Omurago gwa Nyamuwanga ogwo gwariga guri ati, “Nirisubha omuguuga gunu oguuja omwanya rwa gunu, na Saara aribhona omwana wa echirume.”d
10 Ka wone gutari ogwo era, tari Rebheka wone ꞉eebhuriiye saaja weeswe Isaaka abhaana amarongo. 11-12 Omwanya gunu amarongo ago gaariga gachaari kwibhurwa, na bhunu gaariga gachaari okukora choonechoone cha ekisi amwi echibhiibhi, Nyamuwanga ˆnaabhwira Rebheka ati, “Omukuru arikorera emirimu omutooto.”e Omusango ogwo ogweresya ati Nyamuwanga kaasora omuunu okuruubhana na obhutinge bhwaye, kutari kuruubhana na ebhikorwa bhya omuunu oyo, na obhutinge bhwaye obhutunga chinu chirikorekana. 13 Rwa kutyo Ebhikaame Ebhyeru ebhyayika ati, “Neekirisya Yakobho, nawe naarema Esawu.”f
Nyamuwanga kaakora rwa kutyo keenda
14 Woori chaayike ki? Chaayike ati Nyamuwanga atari murengeresi? Wuri, noorwo na akatyari! 15 Nyamuwanga omwene ꞉aabhwiriiye Muusa ati, “Anye nirifwira echigongo omuunu woonewoone unu eneenda okufwira echigongo, anye omwene era.”g 16 Kurwa ejo, Nyamuwanga eenyere niwe kaaramura okufwira echigongo omuunu woonewoone, kutari kusookana na okwikomeesya amwi okwenda kwa omuunu oyo. 17 Ringira, mu‑Bhikaame Ebhyeru Nyamuwanga ꞉aabhwiriiye Faraawo omukama wa mu‑chaaro cha Miisiri ati, “꞉Naakuteeye‑wo ubhe omukama, korereki neeresye abhaanu obhuturo bhwani okutura kw‑awe, na risiina ryani ribhe niriraasibhwa mu‑chaaro choone.”h 18 Kurwa ejo, rwa kutyo Nyamuwanga keenda, kaafwira echigongo abhandi, na kaakora emyoyo ja abhandi okubha emikomeeye.
19 Woori, amwi omuunu kaatura okubhuusya ati, “Araabha nikwo kutyo, kurwa ki Nyamuwanga kaabharira omuunu ebhikayo bhyaye? Niga unu arayingiriiye chinu Nyamuwanga keenda?” 20 Nawe awe omuunu, naawe ga owuyaajana kutyo na Nyamuwanga? Angu, echiinu chinu chimogerwe echitura okubhuusya omumogi waacho ati, “Kurwa ki ꞉waammogere kutya?”i 21 Jitari ati omumogi wa jinyungu ari na obhuturo bhwa okukorera emirimu rimoga rwa kutyo keenda? Kaatura okumoga jinyungu ebhiri okusooka kw‑imoga eryoeryo, inyungu imwi ibhe inguru ya emirimu eja echibharo, na eyindi ibhe ya okukorera emirimu ja bhuri rusuku.
22 Nikwo kutyo jiri ku‑Nyamuwanga. ꞉Eendere okweresya abhaanu risungu ryaye na okweresya amanaga gaaye, nawe ꞉aabheegumiirisiisye muno bhanu bheeyire okusingaarisibhwa. 23 ꞉Aakorere kutyo, korereki eeresye rikusyo ryaye rikuru inguru ya abhaanu bhanu ꞉eeraabhire okuramira echigongo chaaye. Aariga eeraabhire okwambira kara okubhareeta ku‑mwene bhabhe nage mw‑ikusyo ryaye. 24 Abhaanu abho neeswe, bhanu ꞉aabhirikiiye. ꞉Ataabhirikiiye Abhayawudi era, tari noorwo bhanu bhatari Bhayawudi. 25 Ogwo nigwo gunu Nyamuwanga ꞉aayikire mu‑chitabho cha omuragi Woseya ati,
“Bhanu bhatari bhaanu bhaani,
niribhatoga ‘Abhaanu bhaani.’
Abhaanu bhanu naariga nitakwenda,
niribhatoga ‘Abheendwa bhaani.’”j
26 Ka wone ꞉aayikire ati,
“Anu ꞉bhaabhwiriiywe ati, ‘Emwe mutari bhaanu bhaani,’
awo niwo bharitogwa ‘Abhaana bha Nyamuwanga omuwanga.’”k
27 Ka wone, omuragi Iisaya ꞉aayikire inguru ya Abhayisirayeeri ati,
“Noorwo kutyo Abhayisirayeeri ni bhaafu rwa omusenyi gwa ku‑nyanja,
tari bhanu bharichungurwa, ni bhatooto.
28 Raatabhugenyi atarikoora wuri okuyaana abhaanu bha echaaro choone ebhitiibha bhinu bhikuumiiye,
rwa kutyo aayikire.”l
29 Rwa kutyo omuragi Iisaya ꞉aayikire kara ati,
“Raatabhugenyi wa ebhise bhya abhasirikare bha mu‑rwire akabheeye atasigasiisye‑wo eswe Abhayisirayeeri bhatooto,
chakabheeye chisingaarikire bhoone rwa abhaanu bha Sodoma na Gomoora.”m
Abhayisirayeeri bhaafu bhatari bharengeresi imbere ya Nyamuwanga
30 Mbe, chaayike ki woori inguru ya emisango ejo? Abhaanu bhanu bhatari Bhayisirayeeri ꞉bhateekomeesiisye okubha abharengeresi imbere ya Nyamuwanga, nawe Nyamuwanga ꞉aabhabharire okubha abharengeresi ku‑njira ya kwikirisya Kirisito. 31 Abhayisirayeeri bhaariga nibheekomeesya okuruubha ebhiraagiro bhya Muusa, korereki bhabharwe okubha abharengeresi imbere ya Nyamuwanga, nawe ꞉bhataabhikuumisiisye. 32 Kurwa ki ꞉bhataabharirwe okubha abharengeresi imbere ya Nyamuwanga? ꞉Bhataabharirwe isonga iri ati ꞉bheeyikanyiisye ebhikorwa bhyebhwe na ꞉bhateekirisiisye Kirisito. Kirisito niwe ribhuyi rinu ꞉bheekuujuuwe‑ko, 33 rwa kutyo Nyamuwanga ꞉aayikire mu‑Bhikaame Ebhyeru ati,
“Ringira, niteeye‑wo ribhuyi mu‑Sayuuni.
Ribhuyi eryo ni rya okwikuujura‑ko,
ni rutare rwa okugwisya abhaanu.
Nawe omuunu woonewoone unu ariikirisya unu ari ribhuyi eryo,
atariiswasibhwa wuri!”n