Abharuumi 8

Abheekirisya abhatangasibhwa na Mwoyo Mweru

1 Mbe woori, Nyamuwanga atariyaana ebhitiibha abhaanu bhanu bhari na obhumwi na Kirisito Yeesu. 2 Ku‑njira ya okubha na obhumwi na Kirisito Yeesu, amanaga ga Mwoyo Mweru unu kaareeta obhuwanga bhwa akajaanende koone, gankorere nibhe na obhwitaage, korereki nisige okutungwa na amanaga ga ebhibhiibhi na orufu. 3 Ebhiraagiro bhya Muusa bhyariga bhitari na amanaga ga okuchiyaana obhwitaage, ku‑songa ya obhusimukwa bhweswe bhwa echibhiibhi. Nawe chinu ebhiraagiro ebhyo ꞉bhyataamiibhwe okukora, Nyamuwanga ꞉aachikorere. ꞉Aatumire Omwana waaye omwene, aaje kw‑iswe ku‑chaaro anu ari na omubhiri rwa eswe abha ebhibhiibhi, korereki eesoosye rwa echoogo inguru ya ebhibhiibhi bhyeswe. Kwa okukora kutyo, Nyamuwanga ꞉aayaaye Yeesu ebhitiibha inguru ya ebhibhiibhi bhya abhaanu, 4 korereki emisango joone ja obhurengeresi jinu ejitongwa mu‑bhiraagiro jikuumisibhwe na Kirisito inguru yeeswe. Eswe echitangasibhwa na Mwoyo Mweru, na chitakutangasibhwa rindi na obhusimukwa bhweswe bhwa echibhiibhi. 5 Abhaanu bhanu abhatangasibhwa na obhusimukwa bhwebhwe bhwa echibhiibhi, obhwiganirisya bhwebhwe obhwenda okukora ebhibhiibhi. Nawe bhanu abhatangasibhwa na Mwoyo Mweru, obhwiganirisya bhwebhwe obhwenda okukora ebhikorwa bhinu ebhikondisya Mwoyo Mweru. 6 Abhaanu bhanu obhwiganirisya bhwebhwe obhutungwa na obhusimukwa bhwebhwe bhwa echibhiibhi, abhafwa orufu rwa akajaanende koone. Nawe abhaanu bhanu obhwiganirisya bhwebhwe obhutangasibhwa na Mwoyo Mweru, abhabhona obhuwanga na omurembe. 7 Abhaanu bhanu obhwiganirisya bhwebhwe obhutungwa na obhusimukwa bhwebhwe bhwa echibhiibhi, abho ni bhasoko bha Nyamuwanga. Bhatakugayuka echiraagiro chaaye, ka wone bhatakutura okuchigayuka. 8 Kurwa ejo, abhaanu bhanu abhatangasibhwa na obhusimukwa bhwebhwe bhwa echibhiibhi, bhatakutura okukondisya Nyamuwanga.

9 Nawe emwe woori, mutakutangasibhwa na obhusimukwa bhwemwe bhwa echibhiibhi, tari mutangasibhwa na Mwoyo wa Nyamuwanga, kwa okubha eekaaye mu‑myoyo jeemwe. Omuunu woonewoone unu atari na Mwoyo wa Kirisito, oyo atari muunu wa Kirisito. 10 Woori, Kirisito eekaaye mu‑myoyo jeemwe. Kurwa ejo, noorwo araabha emibhiri jeemwe ejifwa okuruubhana na ebhibhiibhi, Mwoyo Mweru kaabhayaana obhuwanga, kwa okubha Nyamuwanga kaabhabhara ati muri bharengeresi imbere yaaye. 11 Mwoyo Mweru unu eekaaye mu‑myoyo jeemwe, niwe Mwoyo wa Nyamuwanga unu ꞉aasuuruuye Kirisito Yeesu okusooka mu‑bhafuuwe. Kurwa ejo, Nyamuwanga ariyaana obhuwanga emibhiri jeemwe jinu ejifwa, ku‑managa ga Mwoyo Mweru unu eekaaye mu‑myoyo jeemwe.

12 Kurwa ejo, abhayiri bhaani, eswe chitakwendwa chiikare nichitangasibhwaga na obhusimukwa bhweswe bhwa echibhiibhi. 13 Araabha mukeekara nimutangasibhwaga na obhusimukwa bhwa echibhiibhi, murifwa. Nawe, mukasingaarisya chimwi ku‑managa ga Mwoyo Mweru, ebhikorwa bhya obhusimukwa bhwa echibhiibhi, murirama akajaanende koone.

14 Bhoone bhanu abhatangasibhwa na Mwoyo wa Nyamuwanga, abho nibho abhaana bha Nyamuwanga. 15 Nyamuwanga ꞉ataabhayaaye Mwoyo Mweru, korereki mubhe rindi abhagaya bhanu abhamuubhaya, tari ꞉aabhayaaye Mwoyo Mweru, korereki mubhe abhaana bhaaye. Mwoyo oyo, niwe kaachiyaana obhuturo bhwa okubhirikira Nyamuwanga ati, “Abha,” obhugajuro bhwaryo “Raata!” 16 Mwoyo oyo omwene kaakomeeresya mu‑myoyo jeeswe ati, chiri bhaana bha Nyamuwanga. 17 Mbe, araabha chiri bhaana bha Nyamuwanga, chaabha abhanjusi bhaaye. Chiriramira omwandu gweswe aamwi na Kirisito. Nawe chinu echikenwa kw‑iswe woori ni ati, chisangire mu‑bhinyaasyo aamwi na Kirisito, korereki eswe wone chisangire aamwi nage mw‑ikusyo ryaye.

Nyamuwanga ariyaana abhaana bhaaye rikusyo

18 Anye enirora ati, ebhinyaasyo bhyeswe bhya omwanya gunu, chitari chiinu, nikabhiinganyirisya na rikusyo rinu Nyamuwanga arichiyaana ku‑mwanya gunu oguuja. 19 Ebhiinu bhyone bhinu ꞉bhyabhumbirwe, ebhirindirira kwa obhwiro bhwafu omwanya gunu Nyamuwanga ariswerura abhaana bhaaye. 20 Ebhiinu bhyone bhinu ꞉bhyabhumbirwe, bhiiyiimirwe okubha bhya kutyo era. Jitari ati ebhyene ꞉bhyendere bhibhe kutyo, tari bhiri rwa kutyo Nyamuwanga omwene ꞉eendere. Noorwo kutyo, ebhirindirira omwanya ogwo, 21 kwa okubha bhirichungurwa okusooka mu‑bhugaya bhwa obhunyamuke na orufu. Awo niwo bhiriyaanwa obhwitaage bhwa rikusyo rinu Nyamuwanga ariyaana abhaana bhaaye.

22 Chimenyere ati, okukingira woori kutya, ebhibhumbwa bhyone ebhirira kwa obhusungu, rwa obhwa okwibhura omwana. 23 Ka wone, jitari ati ni bhibhumbwa ebhyo era bhinu ebhirira kwa obhusungu, tari noorwo eswe bhanu chiyaaywe Mwoyo Mweru, chirabhe bhwa ekisi ku‑jinu arichiyaana, noorwo eswe echirira kwa obhusungu mu‑myoyo jeeswe. Echirira kwa obhusungu, kwa okubha echirindirira muno omwanya gunu Nyamuwanga arichikuumisya okubha abhaana bhaaye. Awo niwo aricheerura okusooka mu‑bhugaya bhweswe bhwa obhunyamuke kwa okuchiyaana emibhiri emiyaaya. 24 Obhwiyikanyo obhwo chiri nabhwo okwambira bhunu Nyamuwanga ꞉aachichunguuye. Nawe araabha echiiyikanya echiinu chinu echitura okurora, obhwo bhutari bhwiyikanyo. Angu, niga unu keeyikanya okuyaanwa echiinu chinu ari nacho? 25 Nawe chikeeyikanya okuyaanwa echiinu chinu chitakutura okuchirora, echirindirira kwa obhwigumiirisya okufwa omwoyo wuri.

26 Aamwi na ejo, Mwoyo Mweru niwe kaachisakira mu‑bhugeruke bhweswe. Eswe chitakumenya okusabhwa Nyamuwanga jinu jiiyire na jinu ejikenwa, tari Mwoyo Mweru omwene niwe kaachisabhirwa ku‑Nyamuwanga ˆnaariraga kwa obhusungu bhunyataayikwa. 27 Nyamuwanga unu kaatatirisya joone jinu jiri mu‑myoyo jeeswe, niwe kaamenya obhwiganirisya bhwa Mwoyo Mweru, kwa okubha Mwoyo oyo kaasabhirwa abheeru bha Nyamuwanga rwa kutyo Nyamuwanga keenda.

28 Chimenyere ati, mu‑joone Nyamuwanga kaakorera ja ekisi abhaanu bhanu abhamwenda, nibho bhabhirikiiywe okuruubhana na obhutinge bhwaye. 29 Chimenyere ejo, kwa okubha, bhanu Nyamuwanga ꞉aamenyere okusookerera ku‑bhwambiro, ꞉aaramuuye noorwo echaaro chichaari okubhumbwa ati bhabhe rwa Omwana waaye Yeesu Kirisito kutyo ari. ꞉Aaramuuye kutyo, korereki Omwana waaye abhe omutangati agati ya abhayiri bhaafu. 30 Mbe, bhanu aariga aaramuuye okusookerera kara bhabhe abhaanu bhaaye, nibho bhanu ꞉aabhirikiiye, nibho bhanu ꞉aabharire okubha abharengeresi, na nibho bhanu ꞉aaragire ati aribhayaana rikusyo.

Abheekirisya bhatakutura okutaaganywa na eryenda rya Nyamuwanga

31 Mbe, chaayike ki woori inguru ya emisango ejo? Araabha Nyamuwanga ari rubhaara rweswe, niga unu kaatura okuchiyiga? 32 Nyamuwanga ꞉ataafwiriiye echigongo Omwana waaye omwene, tari ꞉aamusoosiisye korereki afwe inguru yeeswe bhoone. Kurwa ejo, araabha ꞉aasoosiisye Omwana waaye inguru yeeswe, chimari arichiyaana amabhando goone okutura ku‑mwene! 33 Niga unu kaatura okubhuura abhasorwa bha Nyamuwanga? Atari‑wo, kwa okubha Nyamuwanga omwene niwe unu kaabhabhara okubha abharengeresi. 34 Ka wone niga unu arichiramura? Atari‑wo, kwa okubha Kirisito Yeesu, niwe ꞉aafuuwe, ˆnaasuuruka okusooka mu‑bhafuuwe. Ka wone, woori niwe ari orubhaara rwa ebhuryo rwa Nyamuwanga, niwe kaachisabhirwa.

35 Ni chiinu ki chinu echitura okuchitaaganya na eryenda rya Kirisito? Chitari‑wo! Noorwo chibhe chiri mu‑tambara inene, chiri mu‑nyaako, chiri mu‑bhinyaasyo, chibhe nichisaraarira, nichiweerwa emyenda, nichirebherera okubhusya obhuwanga, amwi okwitwa, Kirisito arigenderera okucheenda. 36 Rwa kutyo Ebhikaame Ebhyeru ebhyayika ati,

“Bhuri rusuku echibhugana na orufu, kwa okubha echikukorera emirimu.

Echikorerwa rwa jinaama jinu ejisirwa okwitwa.”

37 Nawe noorwo araabha ejo joone ejichiija‑ko, eswe echigenderera okuyiga, kwa okubha Kirisito acheendere. 38-39 Enimenya chimari ati chitari‑wo echiinu chinu echitura okuchitaaganya na eryenda rya Nyamuwanga. Nyamuwanga arigenderera okucheenda, chibhe chiri bhaanga amwi chifuuwe. Noorwo bhamaraayika, amwi abhatungi, amwi ebhibhumbwa bhya amanaga bhitakutura okuchitaaganya na eryenda ryaye. Noorwo emisango jinu ejikorekana ku‑mwanya gunu amwi ku‑mwanya gwa imbere, amwi choonechoone chinu chiri mu‑rwire amwi mu‑nyombe, amwi choonechoone ku‑chaaro anu, chitari‑wo echiinu chinu echitura okuchitaaganya na eryenda rya Nyamuwanga. Eryenda eryo arisweruuye kw‑iswe okutura ku‑Kirisito Yeesu, Raatabhugenyi weeswe.