Echinyanjo cha Yerusareemu
15
1 Abhaanu abharebhe nibhasooka Yuudeya, nibhooromokera mu‑musi gwa Atiyookiya. Nibheeyigisya abheekirisya nibhaayikaga ati, “Araabha mukarema okutendwa okuruubhana na jitungwa jinu ꞉chaasigiiywe na Muusa, mutakutura okuchunguka.” 2 Omusango ogwo nigukora Pawuro na Bharinaabha bhareme abhaanu abho na okwayikana nabho kwa obhururu muno. Kurwa ejo, abheekirisya bha Atiyookiya awo nibhatema echiina ati abhaanu abharebhe mu‑bheene bhagende Yerusareemu aamwi na Pawuro na Bharinaabha, korereki bhagende okuroma na jitumwa ja Yeesu na abhakaruka bha rikanisa rya Nyamuwanga inguru ya omusango ogwo. 3 Abheekirisya abho nibhabharaga, ka wone nibhayaana Pawuro na abheejaabho abho ebhiinu bhyebhwe bhya bhusibhusi. Niwo bha Pawuro nibheemuka, nibhatura mu‑mikoowa ja Foyeenike na Samaariya, nibhabhwiraga abhaanu kutyo abhaanu bhanu bhatari Bhayawudi wone abheekirisya Yeesu. Omusango ogwo nigukondera muno abheekirisya abheejaabho bhoone bheende‑yo.4 Pawuro na abheejaabho abho, omwanya gunu ꞉bhaakingire Yerusareemu, nibhakumwa kisi na jitumwa ja Yeesu, aamwi na abhakaruka na abheekirisya bha rikanisa. Pawuro na abheejaabho nibhabhabhwira joone jinu Nyamuwanga ꞉aakorere, okutura ku‑bheene. 5 Awo Abhafarisaayo abharebhe bhanu ꞉bheekirisiisye Yeesu nibheemereeguru, nibhaayika ati, “Bhanu bhatari Bhayawudi wone ni bhusibhusi bhatendwe, bhabhwirwe ati, bhabhe nibhagayuka ebhiraagiro bhya Muusa.”
6 Mbe, jitumwa ja Yeesu ejo na abhakaruka abho, nibhakora echiina korereki bhatatirisye kisi omusango ogwo. 7 Bhunu bhaamarire omwanya omureera okwayikana nabho, Peetero ˆneemereeguru, ˆnaabhabhwira ati, “Emwe abhayiri bhaasu omumenya ati, siku nyafu jinu jiyitingʼeene Nyamuwanga ꞉aanyawuuwe agati yeemwe, korereki abhaanu bhanu bhatari Bhayawudi, bhabhwirwe Emisango ja Ekisi na okujiikirisya, okutura kw‑anye. 8 Nyamuwanga niwe kaamenya emyoyo ja abhaanu, ꞉eeresiisye ati bhanu bhatari Bhayawudi wone kaabheekirisya kwa okubhayaana Mwoyo Mweru, rwa kutyo ꞉aachiyaanire eswe wone. 9 ꞉Ataakorere isoroore yooneyoone agati yeeswe na abheene, kwa okubha abheene wone ꞉bheekirisiisye Yeesu na ku‑njira eyoeyo, ꞉eesiisye myoyo jeebhwe. 10 Mbawo woori omwenda okuregeeja Nyamuwanga kwa okutwikya abheeyigisibhwa abho obhusito bhunu, eswe abheene wone obhuchitama? Noorwo bhasaaja weeswe wone, ꞉bhwabhatamire! 11 Eswe echiikirisya ati ni bhwitiriranya bhwa Raatabhugenyi weeswe Yeesu Kirisito era nibhwo obhuchichungura na obhwitiriranya obhwoobhwo obhubhachungura abheene wone.”
12 Awo, abhaanu bhoone nibhajibhira jibhi, Bharinaabha na Pawuro nibhabhabhwiraga kutyo Nyamuwanga aariga ˆneeresya ebhibharikisyo na ebhiruguusyo bhyafu ku‑bhaanu bhanu bhatari Bhayawudi kwa okutura ku‑bheene. 13 Omwanya gunu ꞉bhaamarire okwayika, Yakobho wone ˆnaayika ati, “Emwe abhayiri bhaasu, muntegeresye! 14 Simiyoonia aachibhwira kutyo Nyamuwanga ꞉aanyaakiriiye bhanu bhatari Bhayawudi korereki aawure abhaanu abharebhe mu‑bheene bhabhe abhaanu bhaaye. 15 Emisango ja abharagi ejiikirisyanya na emisango ja Nyamuwanga, jinu ꞉jaakaamirwe na abharagi ati,
16 ‘Anu emisango ejo jiriwaa‑wo, nirisubha,
niryumbaka inju ya omukama Dawudi inu ꞉yaafumire.
Niryumbaka rindi rirugu ryayo rinu ꞉ryasingaarisiibhwe,
niriimereegusyu bhuyaaya,
17 korereki abhaanu abhandi bhoone bhanyenje,
bhanu bhatari Bhayawudi bhanu nibhirikiiye bhabhe abhaanu bhaani.
Emisango jinu, anye Raatabhugenyi nirijikora,
18 na nijo ejoejo ꞉jaamenyekeene okusookerera kara.’b”
19 Yakobho ˆnaagenderera okusimura ati, “Kurwa ejo, abhaanu bhanu bhatari Bhayawudi bhanu abhayinduka okubha abhaana bha Nyamuwanga, anye enirora ati chiteeyire okubhanyaasya. 20 Echikenwa era okubhakaamira inyarubha okubheeresya ati bhasige okurya ebhiryo bhinu bhisoosiibhwe inguru ya okuramya amasusano, obhuromesi, okurya jityanyi jinu jiitirwe kwa okubhuutwa noorwo okunywa orwamba.c 21 Okubha okusookerera kara, ebhiraagiro bhya Muusa bhyariga nibhiiyigisibhwa bhuri musi na bhyariga nibhisomwa mu‑nju ja ameekofyanyo ga Abhayawudi bhuri rusuku rwa Isabhaato.”
Inyarubha eyisirwa ku‑bheekirisya bhanu bhatari Bhayawudi
22 Awo jitumwa ejo na abhakaruka, aamwi na abheekirisya bhoone bha Yerusareemu awo nibheekirisyanya. Nibhatema echiina ati, bhaawure abhaanu abharebhe mu‑bheene bhanu abhaja okugenda aamwi na Pawuro na Bharinaabha mu‑musi gwa Atiyookiya. Nibhaawura‑mo abhaanu abhabhiri bha echirume bhanu abhayaanwa echibharo muno mu‑bheekirisya. Omuunu wa okwamba, aariga ari Yuuda unu aatogwaga Bharisabha, omuunu wa kabhiri, aariga ari Siira. Abho nibhatumwa na inyarubha niyayikaga ati,
23 “Eswe jitumwa aamwi na abhakaruka bha rikanisa, echibhakeesya emwe abheekirisya bhanu mutari Bhayawudi, bhanu muri mu‑musi gwa Atiyookiya, na emikoowa ja Siiriya na Kiriikiya. 24 Choongwa ati abhaanu abhandi okusooka mw‑iswe ꞉bhaabhabhwiriiye emisango ja okubhayabhya, ka wone ja okunyaasya emyoyo jeemwe, eswe ꞉chitaabhatumire. 25 Okuruubhana na ejo, eswe cheekirisyanya ati, chaawure abhaanu bhanu echija okutuma bhaaje eyo, aamwi na abheendwa bheeswe Bharinaabha na Pawuro. 26 Abho bheesoosiisye muno okukorera emirimu Raatabhugenyi weeswe Yeesu Kirisito, bheeteeye‑wo noorwo okutemwa emitwe jeebhwe inguru ya omwene. 27 Kutyo abhaanu bhanu echituma kw‑imwe ni Yuuda na Siira. Abheene nibho bharyayika kwa eminwa jeebhwe emisango jinu chaabhakaamira. 28 Okubha jaakondera Mwoyo Mweru aamwi na eswe ati, chisige okubhatwika omugugu ogundi tari ebhiraagiro bhya bhusibhusi bhinu. 29 Musige okurya ebhiryo bhinu bhisoosiibhwe inguru ya okuramya amasusano, okurya noorwo okunywa orwamba, okurya jityanyi jinu jiitirwe kwa okubhuutwa na okukora obhuromesi. Araabha mukasigana na ejo, niwo omubha mukorere kisi. Jibhe kutyo.”
30 Jitumwa jinu ꞉bhaatumirwe bhejire bhaasigana na abheejaabho abho, ꞉bhooromokeeye Atiyookiya. Nibhakofya abheekirisya bhoone bha Atiyookiya, nibhabhayaana inyarubha irya. 31 Abheekirisya abho bhejire bhaasoma inyarubha eyo nibhakonderwa kwa emisango ejo ja okubhasimbiisya. 32 Yuuda oyo aamwi na Siira, bhoone bhaariga bhari abharagi. Mbe, nibhabhwira abheekirisya abheejaabho abho, emisango myafu ja okubhasimbiisya na okubhakomeesya. 33 Omwanya omurebhe okutura, abheekirisya abho nibhabharaga kwa omurembe, bhasubhe Yerusareemu ku‑bhaanu bhanu ꞉bhaabhatumire. [ 34 Nawe Siira omwene ˆnaarora ati ni kisi asigare erya]. 35 Pawuro na Bharinaabha wone nibhasigara Atiyookiya eyo. Abheene, aamwi na abhaanu abhandi abhaafu, bheeyigisyaga na okuraasisya abhaanu Emisango ja Ekisi inguru ya Raatabhugenyi Yeesu.
Pawuro na Bharinaabha abhaawukana
36 Jejire jaatura siku nooto, Pawuro ˆnaabhwira Bharinaabha ati, “Chisubhe mu‑misi jirya ꞉cheeyigisiisye‑mo Emisango ja Ekisi inguru ya Raatabhugenyi Yeesu, chiribhatire abheekirisya abheejaasu, korereki chibhe nichiringira amagenderero geebhwe.” 37 Mu‑rugendo orwo, Bharinaabha aariga ˆnaakena bhagege Yowana unu aatogwaga Maariko, agende aamwi nabho. 38 Nawe Pawuro ˆnaarora ati jitari ja ekisi bhagende aamwi nage, kwa okubha omwene, ꞉aabhasigire mu‑mukoowa gwa Pamufiriya, ˆnaarema okugenderera okukora emirimu aamwi nabho. 39 Ejo nijikora Pawuro na Bharinaabha bhayombe muno, okukingira nibhaawukana. Bharinaabha ˆnaagega Maariko, nibhagenda aamwi na ingarabha nibhakinga kw‑isinga rya Kiipuro. 40 Pawuro ˆnaawura Siira, abheekirisya abheejaabho nibhabhasabhirwa bhabhe na obhwitiriranya bhwa Raatabhugenyi, niwo nibheemuka awo. 41 Nibhaja mu‑mikoowa ja Siiriya na Kiriikiya, nibhakomeesyaga abheekirisya.