Abhaanu bha Yikoniya abhaawukana
14
1 Yikoniya eyo Pawuro na Bharinaabha, nibheengira mu‑nju ya eriikofyanyo rya Abhayawudi, rwa kutyo jitungwa jeebhwe jaariga jiri. Nibheeyigisya abhaanu omwo kwa ribhaasi inguru ya Yeesu, Abhayawudi abhaafu muno aamwi na Abhayunaani abhaafu, nibheekirisya Yeesu. 2 Nawe Abhayawudi abharebhe bhanu ꞉bhaaremere Yeesu, nibhaamba okukungirisya abhaanu abhandi bhanu bhatari Bhayawudi, korereki bhasoke abheekirisya abho. 3 Pawuro na Bharinaabha nibhagenderera okurama siku nyafu Yikoniya awo, nibhabhwira abhaanu kwa ribhaasi inguru ya Raatabhugenyi Yeesu. Raatabhugenyi Yeesu omwene wone, ꞉eeresiisye ati, omusango gwaye gwa obhwitiriranya ni gwa echimari, kwa okubhayaana obhuturo bhwa okukora ebhibharikisyo na ebhiruguusyo bhyafu. 4 Nawe abhaanu bha omusi ogwo, nibhaawukana makiju gabhiri. Rikiju rimwi niribha orubhaara rwa Abhayawudi abharebhe bhanu ꞉bhaaremere Yeesu, rikiju erindi niribha orubhaara rwa jitumwa.5 Nibheeya Abhayawudi abharebhe na abhaanu bhanu bhatari Bhayawudi, aamwi na abhatungi bheebhwe, nibhakora echikwembe cha okukorera Pawuro na Bharinaabha kubhiibhi na okubhabhuma na amabhuyi. 6 Nawe jitumwa bhejire bhaamenya obhutinge obhwo, nibheerukira mu‑mukoowa gwa Rikawoniya, mu‑misi ja Risitura na Deeribhe na mu‑mbaara ja ayeeyi ja mu‑misi ejo. 7 Bhuri rubhaara bhaariga nibharaasisya abhaanu Emisango ja Ekisi ja Yeesu.
Pawuro kaabhumwa na amabhuyi Risitura eyo
8 Mu‑musi gwa Risitura, aariga ari‑mo omuunu umwi unu aariga aremaaye okusookerera okwibhurwa kwaye, aariga atakutura okuribhata wuri. 9 Omwanya gunu Pawuro aaraasyaga, omuunu oyo wone aariga eenyanjire awo ˆnaamutegeresyaga. Pawuro ˆnaamuringira nekeneke, ˆnaarora ati, ari na eriikirisya rya okuwosibhwa. 10 Pawuro ˆnaamubhwira kwa obhuraka bhunene ati, “Iimuka! Wimereeguru kwa amaguru gaawo.” Awoawo omuunu oyo ˆneemereeguru bhwangu, ˆnaamba okuribhata omwene!
11 Echise cha abhaanu abho bhejire bhaarora kutyo Pawuro ꞉aawosiisye omuunu oyo, nibhaamba okwamura obhuraka bhwebhwe mu‑nyaayika jeebhwe ja Echirikawoniya nibhaayikaga ati, “Amasambwa gaachiijira mu‑rususo rwa abhaanu!” 12 Nibhatoga Bharinaabha risiina rya risambwa ryebhwe rikuru Jeewu.a Pawuro, nibhamuyaana risiina rya risambwa ryebhwe erindi Eremeesi,b kwa okubha Pawuro niwe aariga ari omwayiki omukuru. 13 Ku‑mbari kutooto era ya omusi ogwo, yaariga iri‑wo riyekaru rya Jeewu. Niwo omugabhisi wa Jeewu, ˆnaareeta jiingʼa jindume kw‑irango rya omusi na jitengya ja obhwaso bhunu abhaanu ꞉bhaasoosiisye. Omwene aamwi na echise echo cha abhaanu bhaariga nibhakena okusoosisya Pawuro na Bharinaabha echitambwa.
14 Nawe jitumwa Bharinaabha na Pawuro bhejire bhaamenya ejo, nibhatemura emyenda jeebhwe kwa okuruguura. Nibhabhirima na okwingira mu‑chise echo, nibhabhabhwiraga kwa obhuraka bhunene ati, 15 “Emwe abhaanu bhaasu, musige okukora kutyo! Eswe wone chiri abhaanu era rwa emwe! Chiri anu okubharaasisya Emisango ja Ekisi ati, musige okuramya amasambwa, muyindukire Nyamuwanga omuwanga! Omwene niwe ꞉aabhumbire orutumba, echaaro, inyanja, na bhyone bhinu bhiri‑mo. 16 Kara Nyamuwanga ꞉aasigire amaanga goone, bheekare kutyo bheendaga. 17 Nawe, ꞉ataasigire okweresya ebhibharikisyo na obhuturo bhwaye. Aariga ˆnaabhakorera ja ekisi kwa okubhareetera ingʼubha okusooka mu‑rutumba, korereki mubhone ebhigeswa bhya ebhirimwa ku‑mwanya gwabhyo, mwigute na musandabhe mu‑myoyo jeemwe.” 18 Pawuro na Bharinaabha nibhabhatongera kwa emisango ejo, noorwo kutyo, gwariga guri murimu mukomeeye turuturu okugaanya abhaanu bha echise echo bhasige okubhasoosisya echitambwa.
19 Nawe nibhaaja Abhayawudi abhandi okusooka Atiyookiya mu‑mukoowa gwa Pisiidiya, na okusooka Yikoniya. Nibhakongya eriikofyanyo rya abhaanu, korereki bhabhe aamwi nabho. Bhoone nibhabhuma Pawuro na amabhuyi, nibhamukurura, nibhamusira anja ya omusi, nibheetogeraga ati aafuuwe. 20 Nawe omwanya gunu abheeyigisibhwa ꞉bheekofyanyiisye na okumusingira, ˆneemuka, ˆnaasubha mu‑musi. Mwejo yende‑ko, ˆnaasooka awo, ˆnaagenda aamwi na Bharinaabha mu‑musi gwa Deeribhe.
Pawuro na Bharinaabha abhasubha Atiyookiya ya Siiriya
21 Pawuro na Bharinaabha ꞉bhaaraasiisye Emisango ja Ekisi ja Yeesu mu‑musi gwa Deeribhe na okubhona abheeyigisibhwa bhaafu. Ejo jejire jaawa nibhagenda, nibhaturaga mu‑misi ja Risitura, Yikoniya na Atiyookiya Pisiidiya. 22 Bhuri rubhaara, bhaariga nibhasimbiisya abheeyigisibhwa na okubhakomeeresya ati bhagenderere okurumatana mu‑riikirisya ryebhwe. Nibhabhabhwira ati, ni bhusibhusi chiture mu‑nyaako nyafu korereki chiingire mu‑bhukama bhwa Nyamuwanga.
23 Pawuro na Bharinaabha nibhasora abhakaruka mu‑bhuri rikanisa. Mu‑kwiyima okurya na okubhasabhirwa, nibhabhatuura mu‑mabhoko ga Raatabhugenyi Yeesu, unu ꞉bheekirisiisye. 24 Pawuro na Bharinaabha bhejire bhaamara okutura mu‑mukoowa ogwo gwa Pisiidiya, nibheengira mu‑mukoowa gwa Pamufiriya, 25 nibhasikirira mu‑musi gwa Perege. Eyo nibharaasya omusango gwa Nyamuwanga ogwo, nibheeya nibhooromokera mu‑musi gwa Ataariya. 26 Okusooka Ataariya awo nibhatura mu‑ngarabha, nibhasubha Atiyookiya ya Siiriya. Awo niwo abheekirisya ꞉bhaabhasabhiiywe obhwitiriranya bhwa Nyamuwanga ku‑murimu gunu bhaariga bhakuumisiisye. 27 Atiyookiya awo nibhakofya abheekirisya. Nibhabhatondera joone jinu Nyamuwanga ꞉aakorere okutura ku‑bheene na kutyo ꞉eeguuye orwigi ku‑bhaanu bhanu bhatari Bhayawudi okwikirisya Yeesu. 28 Nibheekara Atiyookiya awo, aamwi na abheeyigisibhwa abho kwa omwanya mureera.