Yeesu kaagenda Yerusareemu mu‑chikukuru ya Ebhiwuuna
7
1 Ejo jejire jaawa, Yeesu ˆnaamba okwiyinda mu‑mukoowa gwa Gariraaya. ꞉Ateendere okwiyinda mu‑mukoowa gwa Yuudeya, kwa okubha abhatangasya bha Abhayawudi bhaayenjaga okumwita. 2 Omwanya ogwo, ichikukuru ya Abhayawudi ya ebhiwuuna yaariga iri yeeyi.a 3 Niwo abhatooto bhaaye nibhamubhwira ati, “Sooka anu, ugende Yuudeya, korereki abheeyigisibhwa bhaawo bharore ebhiruguusyo bhinu owukora. 4 Araabha omuunu keenda okumenyekana ku‑bhaanu, atakukora emirimu jaaye bhumbise. Mbe, araabha chimari owutura okukora emisango ejo, genda wiiyeresye ku‑bhaanu bhoone, korereki bhakumenye.” 5 Abhatooto bhaaye ꞉bhaayikire kutyo, kwa okubha noorwo abheene ꞉bhataamwikirisiisye. 6 Niwo Yeesu ˆnaabhabhwira ati, “Omwanya gwani gwa okuja eyo, guchaari kukinga, nawe emwe omutura okugenda omwanya gwonegwone. 7 Abhaanu bha ku‑chaaro kunu, bhatari na injuno ya okukora bhabhasoke. Nawe abhansoka anye, kwa okubha enibhabhwira ati, ebhikorwa bhyebhwe ni bhibhiibhi. 8 Emwe neemwe, mugende Yerusareemu ku‑chikukuru eyo. Anye nitakugenda eyo woori anu, kwa okubha omwanya gwani guchaari kukinga.” 9 Yeesu ejire aamara okwayika emisango ejo, ˆnaasigara mu‑mukoowa gwa Gariraaya.10 Abhatooto bhaaye bhejire bheemuka okugenda Yerusareemu mu‑chikukuru eyo, Yeesu wone ˆnaagenda eyo, nawe bhumbise, okwiswerura abhwerubhweru wuri. 11 Mbe, omwanya gwa ichikukuru, abhatangasya bha Abhayawudi nibhayenja Yeesu. Nibhabhuusyaga abhaanu ati, “Ari aaki omuunu urya?” 12 Abhaanu bhaafu bhaayaajanaga inguru ya Yeesu. Abhandi nibhaayika ati, “Yeesu ni muunu wa kisi,” nawe abhandi nibhaayikaga ati, “Wuri, kaajiga abhaanu.” 13 Nawe ꞉ataabheeye‑wo omuunu unu ꞉aayikire abhwerubhweru inguru ya Yeesu, kwa okubha ꞉bhoobhayire abhatangasya bha Abhayawudi.
Yeesu keeyigisya abhaanu mw‑Iyekaru
14 Omwanya gunu jisiku ja jichikukuru ꞉jaakingire agatigati, Yeesu ˆnaagenda, ˆneengira mu‑rubhuga rwa Riyekaru, ˆnaamba okwiyigisya abhaanu omwo. 15 Niwo abhatangasya bha Abhayawudi nibharuguura inguru ya ameeyigisyo gaaye, nibhaayika ati, “Omuunu unu kaatura kutiki okumenya emisango joone jinu, keenu ꞉ataasomere?” 16 Mbe, Yeesu ˆnaabhabhwira ati, “Ameeyigisyo ganu eniiyigisya, gatari gaani, tari gasookere ku‑Nyamuwanga unu ꞉aantumire. 17 Omuunu woonewoone unu keenda okukora kutyo Nyamuwanga keenda, oyo kaja okusombookerwa ati, ameeyigisyo gaani gasookere ku‑Nyamuwanga. Ka wone kaja okusombookerwa ati, nitakwayika ku‑bhuturo bhwani omwene. 18 Omuunu woonewoone unu kaayika ku‑bhuturo bhwaye omwene, oyo keeyenjera echibharo chaaye omwene. Nawe unu kaayenja echibharo inguru ya unu ꞉aamutumire, oyo kaayika echimari, atakwayika orubheeyi wuri.”
19 Yeesu ˆnaagenderera okwayika ati, “Mumenyere ati, Muusa ꞉aabhayaaye ebhiraagiro bhya Nyamuwanga. Nawe atari‑wo omuunu noorwo umwi mw‑imwe unu kaagayuka ebhiraagiro ebhyo. Kurwa ki woori omwenda okunyita?” 20 Abhaanu abho nibhamusubhya ati, “Awe uri na risambwa! Niga unu keenda okukwita?” 21 Yeesu ˆnaabhasubhya ati, “꞉Naakorere echiruguusyo chimwi anu orusuku rwa Isabhaato, emwe bhoone nimuruguura.b 22 Ringira, Muusa ꞉aabharagiriiye okutendac abhaana bheemwe bha echirume. Jitari ati akatungiiywe ako ꞉kaasookere ku‑Muusa omwene, tari ꞉kambiiye ku‑bhasaaja weemwe bha okwamba.d Ka emwe woori omutenda abhaana bheemwe noorwo ku‑rusuku rwa Isabhaato. 23 Omwikomeesya okuruubha ebhiraagiro bhya Muusa mu‑kutenda abhaana bheemwe bha echirume noorwo ku‑rusuku rwa Isabhaato. Nawe kurwa ki omumbiyirirwa nikawosya omuunu chimwi ku‑rusuku rwa Isabhaato? 24 Mwasiga okuramura omuunu okuruubhana na jinu omurora na ameeso era, tari muramure omuunu ku‑bhurengeresi.”
Abhaanu abhabhuusyanya araabha Yeesu niwe Kirisito
25 Mbe, abhaanu abhandi bha Yerusareemu awo, nibhabhuusyanyaga ati, “Angu, omuunu oyo atari unu abhatangasya bheeswe abhayenja, korereki bhamwite? 26 Ringira woori, kaayika abhwerubhweru, nawe abheene bhatakumubhwira omusango gwonegwone! Amwi abhatangasya bheeswe bhaambire okwiganirisya ati, oyo niwe Kirisito.e 27 Omuunu unu atakutura okubha Kirisito, kwa okubha eswe chimenyere anu asookere. Nawe Kirisito omwene aribha aaja, atari‑wo omuunu unu arimenya enu asookere.”
28 Omwanya gunu Yeesu eeyigisyaga mu‑rubhuga rwa Riyekaru, ˆnaamura obhuraka ˆnaayika ati, “Chimari mummenyere, na mumenyere anu nisookere. Anye ꞉niteejire ku‑bhuturo bhwani, tari nitumirwe na Nyamuwanga wa echimari. Oyo, emwe mutakumumenya. 29 Anye nimumenyere, kwa okubha nisookere ku‑mwene. Omwene niwe ꞉aantumire.” 30 Niwo abhaanu nibheenda okumugwata, nawe ꞉ataabheeye‑wo omuunu wa okumugwata, kwa okubha omwanya gwaye gwariga guchaari okukinga.
31 Nawe abhaanu bhaafu mu‑bhanu bhaariga bhari arya, nibheekirisya Yeesu. Abhaanu abho nibhaayika ati, “Araabha omuunu kaakora ebhibharikisyo bhyafu kutyo, itari ati omwene niwe Kirisito?”
Abhasirikare abhatumwa okugwata Yeesu
32 Mbe, Abhafarisaayo nibhoongwa kutyo abhaanu bhaariga nibhabhobhootana inguru ya Yeesu. Kurwa ejo, Abhafarisaayo abho, aamwi na abhakuru bha abhagabhisi, nibhatuma abhasirikare, korereki bhamugwate. 33 Niwo Yeesu ˆnaabhwira abhaanu abho ati, “Nichaari aamwi na emwe katungu katooto era. Aribha neeya nirisubha ku‑unu ꞉aantumire. 34 Murinyenja, nawe mutarimbona. Noorwo anu anye niribha, emwe mutaritura okuuja‑wo.” 35 Niwo Abhayawudi nibhabhuusyanya abheene kwa abheene ati, “Angu, omuunu unu arija aaki anu eswe chitarimubhona? Angu, keenda okugenda ku‑Bhayawudi bhanu bhanyarambukiiye mu‑bhyaro ebhindi, na okwiyigisya abhaanu bhanu bhatari Bhayawudi? 36 Angu, obhugajuro bhwaye niki okwayika ati, ‘Murinyenja, nawe mutarimbona. Noorwo anu anye niribha, emwe mutaritura okuuja‑wo’?”
Yeesu kaayika inguru ya okuuja kwa Mwoyo Mweru
37 Orusuku rwa obhuteero rwa ichikukuru ya ebhiwuuna, rwariga ruri rusuku orukuru muno. Mbe, Yeesu ˆneemereeguru mu‑rubhuga rwa Riyekaru, ˆnaamura obhuraka ˆnaayika ati, “Omuunu akoongwa obhwiro bhwa amanji, aaje kw‑anye, anywe! 38 Jikaamirwe mu‑Bhikaame Ebhyeru ati, omuunu woonewoone unu kaanyikirisya, ‘emimiro ja amanji ganu agasoosya obhuwanga jiriwurura okusooka mu‑mwene.’”f 39 Yeesu aariga ˆnaayika emisango ejo inguru ya Mwoyo Mweru, unu abhaanu bhanu abheekirisya Yeesu bhaakayaaywe. Omwanya ogwo, Nyamuwanga aariga achaari okutuma Mwoyo waaye ku‑bhaanu abho, kwa okubha Yeesu aariga achaari okwingʼengibhwa inguru mw‑ikusyo.
Abhaanu abhaawukana ku‑songa ya Yeesu
40 Abhaanu abhandi mu‑chise omwo bhejire bhoongwa emisango ejo, nibhaayika ati, “Chimari, omuunu unu niwe omuragi unu echirindirira okusooka ku‑Nyamuwanga.”g 41 Abhaanu abhandi nibhaayika ati, “Omuunu unu niwe Kirisito.” Nawe abhandi nibhaayika ati, “Wuri, Kirisito atakutura okusooka mu‑mukoowa gwa Gariraaya. 42 Jitakaamirwe mu‑Bhikaame Ebhyeru ati, Kirisito arisooka mu‑rwibhuro rwa omukama Dawudi? Ka wone ati, atariibhurirwa Bhetereyeemu, mu‑musi gunu Dawudi ꞉eebhuriiywe‑mo?”h 43 Kurwa ejo, abhaanu nibhataasyanya mu‑bhwiganirisya bhwebhwe ku‑songa ya Yeesu. 44 Abhaanu abharebhe nibheenda okumugwata, nawe ꞉ataabhee‑yo omuunu wa okumugwata.
Abhatangasya bha Abhayawudi bhatakwikirisya Yeesu
45 Mbe, abhasirikare abho nibhasubha ku‑bhakuru bha abhagabhisi na ku‑Bhafarisaayo. Abhatangasya abho nibhabhabhuusya ati, “Kurwa ki mutaagwata Yeesu na okumureeta anu?” 46 Abhasirikare abho nibhasubhya ati, “Chichaariga okuungwa omuunu owundi unu kaatura okwayika rwa kutyo omuunu unu kaayika.” 47 Nibheeya Abhafarisaayo abho nibhabhabhuusya ati, “Si, noorwo emwe wone mwajigwa nage? 48 Angu, ari‑wo omutangasya woonewoone wurya amwi Omufarisaayo noorwo umwi unu kaamwikirisya? 49 Tari ni chise cha abhaanu era bhanu abhamwikirisya, abheene bhatakumenya ebhiraagiro bhya Muusa. Abhaanu abho bheeyiimirwe na Nyamuwanga!”
50 Niwo Nikodeemu, owumwi wa abhatangasya bha Abhafarisaayo unu ꞉aagendere ku‑Yeesu rusuku rumwi mu‑ngeta, ˆnaabhuusya abheejaabho ati, 51 “Angu, ebhiraagiro bhyeswe ebhiikirisya okuramura omuunu keenu chichaari okumutegeresya na okusombookerwa emisango jinu akorere?” 52 Abheene nibhasubhya Nikodeemu ati, “Si, noorwo awe wone usookere Gariraaya? Genda utatirisye kisi mu‑Bhikaame Ebhyeru, owuja okusombookerwa ati, atari‑wo omuragi unu kaasookerera mu‑mukoowa gwa Gariraaya.”