ꏤꐪꄛꇰꌠꊩꌺꂶꌠꇫꑟꇁꂯꄉꀐ
3
1 ꄙꀕꃪꀕꂽꑼꌊꁈꑳꀊꊆꑠꃅꉉ：“ꇬꉚ！ ꉡꆹꉠꊩꌺꉢꁆꌌꉠꂴꆽꄉꈭꄐꈜꏤꇁꎻ。ꆍꇬꎷꐺꌠꌋꂶꌠꆹꋋꇅꃅꇁꋍꑷꂿꇬꑟ；ꇬꉚꄉ！ ꏤꐪꄛꇰꌠꊩꌺꆍꇫꇁꉚꂶꌠꇫꑟꇁꂯꄉꀐ”ꄷ。 2 ꄚꋌꇫꑟꇁꄹꉇ，ꈀꄸꂷꇬꄽꄎꀋ？ ꋌꇫꅐꇀꄮꇬ，ꈀꄸꂷꇬꉆꄐꀋ？ ꑞꃅꆏ，ꋋꆹꇔꇷꌌꏁꏸꌠꃆꄔꇤꌡ，ꊿꌌꃢꈜꒈꋌꌠꏤꒀꂷꌡ。 3 ꋋꆹꊿꇫꑌꄉꐍꏸꂷꌡ，ꋌꐍꏸꏁꏸꌠꌟꃅꆺꃥꊿꋌꏸꁦꎴꃅꄉ；ꑠꃅꄉ，ꋀꊇꑖꉬꇬꈴꄉꆦꑝꅍꌞꌌꑳꀊꊆꁵꇁ。 4 ꀊꋨꄮꇬꆏ，ꒀꄊꌋꆀꑳꇊꌒꇌꌞꌊꇁꌠꆦꑝꅍꈧꌠꆹꑳꀊꊆꉌꇿꃅꇫꊪꌠꉬ，ꋍꑠꀋꉊꂴꏭꌋꆀꐯꌟ，ꀃꌋꂾꀊꆨꌋꆀꐯꌟ。5 ꄙꀕꃪꀕꂽꑼꌊꁈꑳꀊꊆꑠꃅꉉ：“ꉢꀋꎪꃅꆍꄷꄉꆍꀞꇽꇁ。 ꉢꐳꐯꐳꃅꇁꌊꅇꊪꌬꄉ，ꊿꃔꌤꌌꌠ、ꎼꃅꃏꑽꌠ、ꅇꊪꃶꀋꐚꌠꌬꌠ、ꌞꊋꃅꁌꁁꁒꋠꌠ、ꃆꍸꌺꇜꆼꍅꌠ、ꅑꑘꀋꐥꃅꌞꊿꋀꁠꀀꌠꊝꌠꌋꆀꉡꁌꀋꒉꏦꀋꃪꌠꋍꑠꊂꅇꎹꌠꉬ ”ꄷ。
ꊯꁧꋊꋍꁧꌞꄡꑟ
6 ꉢ-ꑳꀊꊆꆹꐩꋊꐩꍂꃅꄻꀋꀱ；ꑠꅹ，ꑸꇱꌺꇖꊈꀋ！ ꆍꊇꈔꑍꀋꁧꌠꉬ。 7 ꆍꁍꁈꐤꄮꄉꅑꅸꇁꇬꇯꆐ，ꆍꊇꉠꏥꏦꀋꍬꃅꄉꎎꁧꇬꎷ。ꀋꃅꆍꊇꏮꉈꑴꉠꄹꇁꑲꆏ，ꉡꑌꀋꎪꃅꏮꆍꉚꌠꉬ。ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。
ꄚꆍꊇꆏ：‘ꉪꊇꈍꃅꄉꏮꉈꑴꇁꄷꌠꉬ？’ꃅꉉ。 8 ꊾꂷꏃꃅꌋꃤꇑꑣꉆꑴꅀ？ ꄚꆍꊇꆹꉠꃤꆍꇑꌊꁧꇈ， ꀱꌊꉈꑴ：‘ꅽꃤꑞꈨꉪꇑꌊꇁ？’ꃅꉉꐺ。 ꉠꃤꆍꇑꌊꁧꈧꌠꆹꆍꌞꉢꁳꄡꑟꌠꊯꁧꋊꋍꁧꌋꆀꌞꉢꁳꄡꑟꌠꆦꑝꅍꈧꌠꉬ。 9 ꆍꇩꏤꋋꂷꑭꊂꃅꉠꆦꑝꅍꈧꌠꇑꑣꒉꄸꃅ，ꆍꊇꍃꃆꏿꑘꊌꇁꌠꉬ。 10 ꆍꊇꌞꄡꑟꌠꊯꁧꋊꋍꁧꌞꌌꉠꋙꄉꑳꇬꊐꇁꑲꆀ，ꉠꑷꈓꋚꀀꒉꀀꎻ；ꆍꊇꑠꃅꄉꉡꎖꉢꉺꉚ，ꉢꆍꎁꃅꉬꉎꌍꑓꁉꄉꌒꃤꉷꆍꁳꇈ，ꆍꁳꌒꃤꊐꅉꎷꀋꊌꇁꎻꀕꉏ？ ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。 11 ꉡꆹꀋꎪꃅꆍꎁꃅꍈꀮꏭꊨꀖꄉ，ꍈꀮꁳꆍꋚꁧꒉꁧꋠꇁꀋꎽ； ꆍꃄꅉꇬꑌꃀꌧꊈꂶꂷꑌꀋꂔꃅꊰꁧꌠꀋꐥ。ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。 12 ꀊꋨꄮꇬꆏ，ꇩꏤꈀꐥꌠꃅꆍꏭꊿꌒꃤꐤꈨꉬꃅꉉꌠꉬ，ꑞꃅꆏ，ꆍꀀꅉꆹꀋꎪꃅꇁꉌꇿꑓꇿꌠꃅꄷꈚꐛꌠꉬ。ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。
ꏃꃅꌋꀋꎪꃅꑱꌝꆀꊿꎭꃅꉈꇁ
13 ꑳꀊꊆꆹ：“ꆍꊇꅇꇨꉏꇨꉉꄉꉡꄙꉡꑣꐺ”ꄷꉉ。
ꄚꆍꊇꆏ：“ꉪꊇꅇꇨꉏꇨꑞꉉꄉꆎꄙꆎꑣꋺ？”ꄷ。 14 ꆍꊇꆹꑠꃅꉉ：“ꏃꃅꌋꎁꃅꌤꃅꇬꃅꌊꀈꈥꀕ，ꉪꊇꏃꃅꌋꅇꃅꇈ，ꄙꀕꃪꀕꂽꑼꌊꁈꑳꀊꊆꂾꄉꉌꐒꇁꎭꃅꐺꇬꑞꈲꏣꐥ？ 15 ꀋꃅꋋꇅꇬ，ꉪꊇꆏꊿꆺꒉꄇꀋꉆꈧꌠꏭꌒꃤꊌꈧꌠꄷ，ꄷꀋꁧꊿꄸꃅꅠꑽꈧꌠꄈꌤꆿꑞꑌꁣꀋꐥ；ꋀꊇꏃꃅꌋꌌꉪꐺꑴꇬ，ꉮꃤꀋꌸꃅꋀꆶꈭꅐꁧ”ꄷ。