ꂸꇁꏸꄯꒉ 4

ꑳꀊꊆꇫꑟꇁꌠꃅꑍꀊꋨꄹꉇ

1 ꄙꀕꃪꀕꂽꑼꌊꁈꑳꀊꊆꑠꃅꉉ：“ꇬꉚ! ꃅꑍꀊꋨꄹꉇꑟꇁꇬꆏ，ꇤꄸꃆꄔꉙꄹꐞꌠꌡ，ꆺꒉꄇꒉꌠꌋꆀꄸꃅꅠꑽꌠꐮꇰꀖꏜꌟꃅꋌꐗꇫꎭꌐ；ꀊꋨꄮꇬꆏ，ꐴꀕꌋꆀꇇꀕꋍꍈꀋꋒꃅꋌꐗꉱꇤꌠꉬ。 2 ꄚꆍꊇꉡꁌꒉꏦꃪꈧꌠꆹ，ꑖꉬꌠꈧꌺꂶꌠꀋꎪꃅꇁꆍꁦ，ꋍꁨꑭꆹꆅꉁꆄꄻꄎ。ꆍꊇꀋꎪꃅꇂꇤꌺꇌꉻꇬꄉꁖꉈꏭꇁꌠꌟꃅꉌꇿꃅꄉꀥꐂꐺꌠꉬ。 3 ꆍꊇꀋꎪꃅꊿꄸꈧꌠꆍꌌꄔꈻ；ꃅꑍꉢꏤꄉꀊꋨꄹꉇꑟꇁꄮꇬꆏ，ꋀꊇꆹꀋꎪꃅꌦꏭꌟꃅꆍꌌꑭꁆꇂꃴꄉꄔꌠꉬ。ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。 4 ꆍꊇꉠꁏꐚꃀꑭꄹꏦꈧꌠꎺꄉꄡꑟ，ꑠꆹꉢꉼꆺꉘꁌꄉꑱꌝꆀꉹꁌꋍꏅꎁꃅꋍꏭꉉꄉꌠꇗꅉꏦꃤꉬ。 5 ꇬꉚꄉ！ ꑳꀊꊆꃅꑍꇰꀋꃀꇈꊽꃪꉬꄹꉇꌠꑟꇁꂾ，ꉢꀋꎪꃅꌋꅇꄜꊿꑱꆀꑸꉠꁆꌌꆍꄷꒉꎻꌠꉬ 。 6 ꋌꀋꎪꃅꀉꄉꉌꂵꁳꀱꉈꑴꌳꃈꅮꇱꇁꎻ，ꌳꃈꅮꉌꂵꁳꀱꉈꑴꀉꄉꇱꇁꎻ，ꑠꀋꉬꑲꆏ，ꉢꃅꄷꋌꈚꁳꍃꊌꏿꊌꄉꈔꑍꎻꂵ”ꄷ。