ꂸꇁꏸꄯꒉ 2

ꑳꀊꊆꊛꄉꆦꑝꊿꏭꊨꀖ

1 ꄙꀕꃪꀕꂽꑼꌊꁈꑳꀊꊆꑠꃅꉉ：“ꆦꑝꊿꈧꌠꀋ！ ꀋꃅꄚꁵꅇꋋꈨꆹꄻꆍꁳꌠꉬ。 2 ꀋꄸꄷꆍꊇꇬꀋꅲ，ꆍꄻꉌꂵꑌꊐꀋꄉ，ꀑꒉꑊꒉꏮꉢꀋꄀꑲꆏ，ꉢꍃꃆꏿꑘꁳꇁꆍꌶꎽ，ꆍꌒꃤꁳꇁꍃꃤꏿꃤꐛꎻꌠꉬ；ꇯꍝꃅꇬ，ꆍꌒꃤꉢꄻꍃꃤꏿꃤꐛꇫꎭꀐ，ꑞꃅꆏ，ꆍꊇꆹꉠꁵꅇꆍꄻꉌꂵꊐꀋꄉ。 3 ꇬꉚꄉ！ ꉢꀋꎪꃅꆍꌺꇖꊂꋊꏭꊨꀖ，ꆦꑝꎇꃀꍅꑓꐔꉢꃬꌊꆍꈁꑓꍀ；ꆍꊇꆹꎆꐔꈧꌠꌋꆀꐯꇯꊿꐔꌊꉈꏭꎭꌠꉬ。 4 ꑠꃅꑲꆏ，ꁵꅇꋋꏢꉢꄻꆍꁳꄉ，ꉡꌋꆀꆺꃥꊿꇢꊭꇬꏤꐪꏡꌠꇫꎍꇬꎷꌠꆍꅉꐚꌠꉬ。ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。 5 ꉢꋋꌋꆀꈀꒃꄉꌠꏤꐪꆹꀑꇬꌋꆀꋬꂻꃆꂮꉬ。ꋋꑍꑵꐯꇯꉢꄻꋌꇕꄉ，ꋌꁳꉡꏦꉢꃪꌠꉌꂵꑌꄉꉡꁌꒉꎻ。 6 ꋍꈂꀸꁳꀋꑗꀋꉬꌠꐭꀋꎽꃅ，ꇯꍝꌠꄻꊿꂘꎻ。ꋋꆹꋬꂻ、ꊒꆽꀕꃅꉡꐊꐺꄉ，ꊿꈍꑋꁳꑽꃤꄸꃤꐞꄉꀱꇁꎻ。

7 ꆦꑝꊿꈂꀸꆹꌧꇐꂿꇐꇬꈴꄉꉉꄡꑟ，ꊾꑌꋍꄷꉙꅇꂘꅇꎹꈹꄡꑟ，ꑞꃅꆏ，ꋋꆹꄙꀕꃪꀕꂽꑼꌊꁈꑳꀊꊆꊩꌺꉬ。 8 ꆍꊇꈛꊒꀋꍬꃅꇂꎎꁧꐛꅹ，ꊿꈍꑋꃅꆍꉙꅇꂘꅇꅲꄉꃪꐛꀐ。 ꉡꌋꆀꆺꃥꊿꇢꊭꇬꏤꐪꏡꌠꆍꀜꐆꇫꎭ。ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。 9 ꑠꅹ，ꉡꆹꉹꁌꋍꏅꁳꆍꉚꄸꎻ，ꆍꊇꋀꉜꌊꊾꁘꊿꇁꈨꃅꄉ；ꑞꃅꆏ，ꆍꊇꉠꏦꃤꀋꍬꃅ，ꊾꀑꑊꉜꄉꏥꏦꌬ”ꄷ。

ꑱꌝꆀꊿꏃꃅꌋꊂꀋꈹꃅꎩꎙꁧ

10 ꉪꊇꐯꇯꀉꄉꋍꂷꀋꉬꅀ？ ꉪꊇꐯꇯꏃꃅꌋꋋꂷꄻꄉꌐꌠꀋꉬꅀ？ ꉪꊇꑞꃅꐈꋓꐮꊝꄉ，ꏃꃅꌋꌋꆀꉪꁍꁈꐯꏤꄉꌠꏤꐪꏡꌠꍍꋉꄸꄀꌠꉬ？ 11 ꒀꄊꊿꀋꎪꀋꎙꃅꀋꐛ，ꋀꊇꆹꑱꌝꆀꃅꄷꌋꆀꑳꇊꌒꇌꇓꈓꄉꌤꊽꉌꁕꌠꃅ；ꑞꃅꆏ，ꒀꄊꊿꋋꈨꑳꀊꊆꇫꉌꃹꌠꌃꎔꑷꂿꂶꌠꍍꋉꄸꄀ，ꉇꉻꊿꋅꌋꅪꌦꌋꏭꇗꅉꃅꑠꋀꒃꌊꑮꃀꃅ。 12 ꌤꋍꑠꈀꃅꌠꆏ，ꋍꊨꏦꉪꏡꄉꃅꌠꉬꄿꂿ，ꌞꊂꈹꄉꃅꌠꉬꄿꂿ，ꋌꆦꑝꅍꌞꌌꄙꀕꃪꀕꂽꑼꑳꀊꊆꁵꇁꄷꑲꑌ，ꋋꆹꀋꎪꃅꑸꇱꄰꁁꑳꇬꄉꑳꀊꊆꇱꆼꇽꇫꎭꌠꉬ。

13 ꆍꊇꉈꑴꌤꋍꑠꃅꐺ： ꑳꉨ、ꆄꇖ、ꑓꁴꅐꄉꑳꀊꊆꆦꑝꅉꋌꉱꇬꀋꁮꀐ，ꑞꃅꆏ，ꑳꀊꊆꆹꆍꆦꑝꅍꈧꌠꉜꂯꋌꇬꀋꉜ，ꆍꇇꈐꇬꆦꑝꅍꈧꌠꋌꇫꊪꀋꅲ。 14 ꆍꊇꀋꃅꇯꆎ：“ꋍꑠꑞꒉꄸꉬ？”ꃅꅲꑴꌦ。ꑞꃅꆏ，ꑳꀊꊆꆹꆎꌋꆀꅽꑮꃀꆏꀊꏀꄮꇬꒃꄉꂶꌠꇢꊭꇬꄉꅇꊪꌬꀐ。ꋋꆹꅽꑮꃀꃚꐨꃙꏦꈴꄉꒃꄉꂶꌠꉬꑴꇬ，ꋌꀋꎪꀋꎙꃅꇬꀋꊝ。

15 ꏃꃅꌋꆹꆐꑊꋌꄻꋍꂷꃅꄉ，ꇭꀧꌋꆀꉌꂵꐯꇯꋍꃤꐛꎻꌠꀋꉬꅀ？ꋌꑞꃅꑠꃅꌠꉬ？ ꋋꆹꆐꑊꁳꌺꇖꊂꋊꀋꎪꀋꎙꃅꋍꊂꈹꌠꐥꎻꂿꄷꌠ。ꑠꅹ，ꆏꅽꊨꏦꉌꂵꐏꁇꄉ，ꀋꎪꀋꎙꃅꅽꑮꃀꆏꀊꏀꄮꇬꒃꄉꂶꌠꊝꑲꆀꍑ。 16 ꑳꀊꊆꑱꌝꆀꏃꃅꌋꑠꃅꉉ：“ꉡꆹꊿꋍꑮꃀꋌꇤꇫꎭꌠꌋꆀꑮꃀꅥꄁꌠꌤꑠꌁꑷ。ꑠꅹ，ꆏꏟꈯꀕꃅꅽꉌꂵꐏꁇꄉ，ꌤꆿꎩꎙꑠꄡꃅ”ꄷ。ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。

17 ꆍꅇꂷꉐꂷꈧꌠꑳꀊꊆꇫꉌꅧꑓꇤꇧꁠꀐꇬ，ꆍꊇꀱꌊ：“ꑳꀊꊆꑞꐛꅹꃅꉪꂿꇬꉌꅧꑓꇤꌠꉬꂯ？”ꃅꅲꐺ。ꑞꃅꆏ，ꆍꊇꄹꇬ：“ꄸꃅꅠꑽꌠꆹ，ꑳꀊꊆꉜꌊꂄꌠꎔꌠꃅꄉ，ꄷꀋꁧꋍꄻꈴ”ꄷ。ꆍꊇꉈꑴ：“ꊒꆽꀕꌠꏃꃅꌋꂶꌠꇿꇬꐥ？”ꄷꑌꄹ。