ꂸꇁꏸꄯꒉ
ꑳꀊꊆꑱꌝꆀꊿꉂ
ꄚꆍꊇꆏ：“ꆏꈍꃅꄉꉪꉂꋺ？”ꄷꉉ。
4 ꀋꄸꄷꑱꄏꊿ：“ꉪꊇꑳꀊꊆꐅꀘꇧꁠꑴꇬ，ꈥꅐꀜꅐꅉꈧꌠꈍꃅꑌꉪꋈꀱꎼꇁꌠꉬ”ꄷꉉꑲꆏ。
ꄙꀕꃪꀕꂽꑼꌊꁈꑳꀊꊆꆹꑠꃅꉉ：“ꋀꁳꈁꏾꃅꋈꀱꎻ，ꄚꋀꋉꀈꈥꋉ，ꈍꃅꑌꉢꐆꇫꎭꌠꉬ；ꌞꊿꀋꎪꃅꋀꏭ‘ꄷꅠꌠꃅꄷ’、‘ꑳꀊꊆꐩꋊꐩꍂꃅꇨꇅꃃꋀꊝꌠꉹꁌ’ꃅꇴꌠꉬ”ꄷ。
5 ꆍꊇꆹꋍꑠꄇꇖꀕꃅꆍꊌꂿꇁꌠꉬ，ꄷꀋꁧꆍꊇ：“ꑱꌝꆀꃅꄷꀉꄂꀋꉬꃅ，ꀉꁁꃅꄷꑌꑳꀊꊆꊿꌌꇰꀋꃀꃅꄉ！”ꃅꉉꇁꌠꉬ。
ꑳꀊꊆꆦꑝꊿꏭꊨꀖ
6 ꄙꀕꃪꀕꂽꑼꌊꁈꑳꀊꊆꆍꏭ：“ꆍꊇꉢꉚꄸꌠꆦꑝꊿꋋꈨꇆ！ꌹꆹꀉꄉꁌꒉꑵ，ꁏꐚꑌꌌꁈꏦꃪꑵ。ꉢꀉꄉꉬꑴꇬ，ꉡꁌꒉꈧꌠꇿꇬꐥ？ ꉢꌌꁈꉬꑴꇬ，ꉡꏦꉢꃪꈧꌠꇿꇬꐥ？ ”ꄷ。
ꄚꆍꊇꆏ：“ꉪꊇꈍꄮꇬꆏꉚꄸꋺ？”ꃅꉉ。 7 ꑳꀊꊆꆏꑠꃅꉉ：“ꆍꊇꆹꋚꒉꁧꀋꎴꌠꆍꌞꌌꉠꆦꑝꅉꇬꇁꇈ，ꈂꀸꆏ‘ꉪꊇꈍꃅꄉꅽꆦꑝꅉꉪꌌꍍꆀꌠꉬ ？’ꃅꉉ。ꑞꃅꆏ，ꆍꊇꉜꇬ，ꑳꀊꊆꆦꑝꄉꈤꆹꌗꅍꀋꐥ。 8 ꎇꃀꑓꁖꌠꆍꈻꌌꆦꑝꅍꃅꇁ，ꋍꑠꆹꑽꌠꀋꉬꅀ？ ꍅꑓꐂꀜꌠ、ꆅꅑꌠꆍꌞꌌꆦꑝꅍꃅꇁ，ꋍꑠꆹꑽꌠꀋꉬꅀ？ ꆍꊇꎇꃀꑠꃅꐙꌠꁨꌞꌌꆍꌜꇬꇛꌺꂶꌠꁵꆹꉚ，ꋌꆍꃤꑠꊪꅲꀕꉏ？ ꋌꆍꁌꒈꀕꉏ？”ꄷ。 ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。
9 ꉢꀋꃅꆍꏭꉉ，ꆍꊇꈧꊰꀕꃅꑳꀊꊆꏭꇖꂟꄉ，ꋌꁳꂄꃅꉪꊝꎻ。ꌤꋍꑠꆍꃅꆍꑽꇬꅜꄉꑲꆏ，ꋌꈍꃅꆍꉚꒉꂯ？ ꋍꑠꆹꄙꀕꃪꀕꂽꑼꌊꁈꑳꀊꊆꉉꌠꉬ。 10 ꄙꀕꃪꀕꂽꑼꌊꁈꑳꀊꊆꑠꃅꉉ：“ꉡꆹꆍꈬꄔꊿꌃꎔꑷꂿꀃꈈꈢꑠꂷꐤꑟꉂ，ꑠꀋꉬꑲꆏ，ꆍꊇꉠꆦꑝꅉꇬꄉꃆꄔꏦꌊꀈꈥꀕꂵ。 ꆍꋋꈨꉠꄻꀋꈴ，ꆍꇇꇬꆦꑝꅍꈧꌠꑌꉢꇬꀋꊪ”ꄷ。 11 ꄙꀕꃪꀕꂽꑼꌊꁈꑳꀊꊆꑠꃅꉉ：“ꉘꁮꅏꅉꄉꅑꅸꉘꁮꈞꆈꃸꅉꑟꌠꃅ，ꉠꂓꆹꀋꎪꃅꇩꏤꈧꌠꌌꇰꀋꃀꃅꄉꌠꉬ。ꃅꄷꇿꇬꑌꊿꀋꎪꃅꉠꂓꄜꄉꅿꉗꌒꋌꐔꄀ，ꆦꑝꅍꁦꎴꌠꌞ，ꑞꃅꆏ，ꉠꂓꆹꀋꎪꃅꇩꏤꈧꌠꌌꇰꀋꃀꃅꄉꌠꉬ。