ꀊꈫꀊꇋꇩꏤꈧꌠꀞꇽꇁ
9
1 ꄚꐰꋋꈨꆹꑳꀊꊆꄷꄉꇁꌠꅇꂷꉬ： ꐧꇁꃰꊿꌋꆀꑱꌝꆀꃣꉻꈧꌠꐯꇯꑓꏮꑳꀊꊆꉜꄉꐛꅹ， ꑳꀊꊆꅇꂷꇁꌊꉳꄒꇂꃅꄷ、ꄊꂷꌧꇱꇓꈓꑟ； 2 ꇁꌊꄊꂷꌧꇱꇓꈓꏢꁮꐛꌠꉐꂸꃅꄷꑌꑟ； ꄫꇊꌋꆀꑭꄓꇓꈓꊿꀑꁮꄷꑴꇬ，ꑳꀊꊆꅇꂷꇁꌊꋀꄷꑌꑟ。 3 ꄫꇊꆹꊨꏦꎁꃅꁾꇓꈫꈈꌠꋈꄻ，ꐎꂷꂤꏂꌟꃅꐮꁧꄉ，ꏂꌃꏦꈜꌦꏭꌟꃅꃷꂿꑖꀋꉬ。 4 ꇬꉚꄉ！ꌊꆹꀋꎪꃅꄫꇊꈁꁨꈀꄉꃅꋌꇑꌊꁧꌐ，ꋌꎾꃝꄩꌄꇤꌠꊋꃤꌋꇱꈔꋏꇫꎭ，ꋍꊨꏦꑌꀋꎪꃅꃆꄔꇱꐗꇫꎭꌠꉬ。 5 ꋍꑠꑸꏃꏸꇍꇓꈓꊌꂿꇬꆏ，ꀋꎪꃅꋍꃨꆰꇁꌠꉬ；ꋍꑠꏦꌒꇓꈓꊌꂿꇬꆏ，ꀋꎪꃅꆄꇖꏽꇁꌠꉬ；ꑱꇱꇍꇓꈓꆹꉘꇉꅍꀋꊌꒉꄸꃅꑊꏦꎲꄏ；ꏦꌒꇓꈓꀋꎪꃅꃰꃅꂷꀋꐥꆘꅝ；ꑸꏃꏸꇍꇓꈓꊿꀋꋦꃮꀋꀆꇁꌠꉬ。 6 ꊿꍒꐯꌼꈧꌠꑸꏃꄲꇓꈓꀀ，ꃏꆺꌧꊿꆺꒉꄇꒉꐨꀋꎪꃅꉢꈔꋏꇫꎭ。 7 ꋀꈂꀸꇬꎆꎸꌦꅑꌠꌋꆀꎐꂷꇬꊽꉌꁕꈧꌠꉢꇑꉢꑣꇫꎭ。 ꋀꊇꀋꎪꃅꉹꁌꇫꋒꇈꌠꐛꄉꇁꉪꏃꃅꌋꇂꃴꐥꌠꉬ，ꇁꒀꄊꄰꑭꊂꊿꑠꁯꌡ；ꑱꇱꇍꊿꑌꀋꎪꃅꇁꑳꀯꌦꊿꌡꌠꉬ。 8 ꉢꉠꑳꈫꑳꇋꍆꄉ，ꈁꏾꃅꁮꐚꁳꈏꃹꉇꅐꀋꎽ；ꊾꆼꍅꆹꅷꌠꄝꉠꉹꁌꇧꊋꇁꀋꎽ，ꑞꃅꆏ，ꉠꊨꏦꑴꅉꋀꉚꋀꅲꌠꉬ。ꊁꇁꋍꑍꇫꅐꇁꌠꃰꃅ
9 ꑭꉢꇓꈓꉹꁌꊈꀋa！
ꆍꊇꉌꂵꇿꐯꇿꄡꑟ！
ꑳꇊꌒꇌꉹꁌꊈꀋb！ ꈮꈜꄡꑟ！
ꇬꉚ！ ꅽꃰꃅꅽꄹꑟꇁꀐ！
ꋋꆹꑖꉬꂶꌠꉬ，ꄷꀋꁧꊋꐛꀐ，
ꑖꈈꀕꃅꑾꃅꏷꏸꋩꄉꇁ，
ꑾꃅꏷꀕꃆꌺꋩꄉꇁ。
10 ꉢꀋꎪꃅꑱꃔꆃꌉꈿꍮꊪꈧꌠꆼꐡꇫꎭ，
ꑳꇊꌒꇌꌉꈿꃆꀞꈧꌠꈔꋏꇫꎭꌠꉬ；
ꌉꉂꌉꈾꉹꉈꑠꑌꉢꆸꐔꇫꎭ。
ꋋꆹꇩꏤꈧꌠꏭꄮꐽꃆꂮꄜꉺ；
ꋍꏲꄸꂠꉻꆹꎾꃝꋋꂷꇬꄉꅑꅸꀊꋨꂷꇬꑟ，
ꒀꃔꇁꄂꒊꃀꄉꅑꅸꃅꑆꃄꎸꈪꅉꑟ。
11 ꑭꉢꇓꈓꀋ！ ꉢꌦꋊꄉꆎꌋꆀꏤꐪꒃꐛꅹ，
ꆍꊇꏮꉈꑴꁾꇓꇬꇁ。
ꉢꀃꑍꑠꃅꄛꇰ： ꉢꀋꎪꃅꋊꀱꑍꃅꄻꆍꁳꌠꉬ。
13 ꒀꄊꉢꌌꉹꃅꉤ，
ꑱꃔꆃꉢꌌꉈꃅꁻ，
ꑭꉢꇓꈓꀋ！ ꉢꅽꌺꈧꌠꄖꄑꌊꄉ，
ꋀꁳꌳꈄꀋꃀꇇꇬꂗꍵꑱꃀꌟꃅ，
ꑭꇂꌺꇖꌉꁧꎻꌠꉬ。
14 ꑳꀊꊆꀋꎪꃅꋀꄩꅐꇁ，
ꋍꉈꁻꎼꇁꇬꃅꊭꆗꃅꆗ；
ꌋꑳꀊꊆꆹꀋꎪꃅꉶꁱꄏ，
ꒈꂪꏭꆲꇨꋩꄉꇁ。
15 ꄙꀕꃪꀕꂽꑼꌊꁈꑳꀊꊆꀋꎪꃅꋀꀧꌋꃅ；
ꋀꊇꀋꎪꃅꀜꇓꉈꄉꁮꐚꅥꄁ、ꁮꐚꈔꋏ；
ꋀꊇꀋꎪꃅꎧꑱꌠꌟꃅꇳꉔꄉ，ꁮꐚꋀꌉꉗꌦꅩꐥꀕ，
ꉈꑴꍔꌺꇬꌦꅪꐛꃅꊐꄉ，
ꌌꆦꑝꅉꇖꎏꇬꎭꌠꑌꌡ。
16 ꀊꋨꄹꉇꆏ，ꑳꀊꊆ-ꋀꏃꃅꌋꆹꀋꎪꃅꑌꑿꆫꌠꌟꃅꋍꉹꁌꆫꉘ，
ꋍꉹꁌꈭꋏꇁ；
ꑞꃅꆏ，ꋀꊇꆹꃰꃅꄂꌆꀍꄟꇬꇓꂵꁌꇐꈤꈧꌠꌡ，
ꋍꃄꅉꇬꄉꏁꇅꁤꇅꒉꇁꌠꉬ。
17 ꑠꆹꈍꃅꉾꃪꉏ！
ꑠꆹꈍꃅꋽꎔꉏ！
ꌠꆗꆿꍯꋠ，ꇷꄙꊋꌭꏽ，
ꑮꆜꎧꏀꅝ，ꅪꎔꃭꇤꏂ。