ꏃꃅꌋꑱꌝꆀꊿꋋꐞꁧꌠꉂ
11
1 ꑱꌝꆀꆹꀉꑳꌺꃅꄉꄮꇬꇯꆐ，ꉢꇫꉂꀐ；ꉞꏹꇩꏤꄉꉠꌺꉢꇳꍝꌊꇁ。
2 ꄚ，ꉢaꀊꅰꃅꋀꇳꍝꑲꆏ，
ꋀꊇꀊꅰꃅꉡꐞꁧ；
ꋀꊇꀠꆀꌦꌋꈧꌠꏭꆦꑝꁧ，
ꌩꁱꇓꁱꑠꏭꅿꉘꌒꋌꄀꁧ。
3 ꑱꃔꆃꉢꇱꂘꄉꈛꎼꎻꌠꉬ，
ꉠꇇꎇꄉꋀꉢꄌꌊꐺ，
ꄚꋀꊇꆹꋀꉃꄻꂶꌠꉢꉬꌠꋀꇫꅉꀋꐚ。
4 ꉡꆹꉂꏣꉂꑟꌊꄉꋀꊇꉢꏃꉢꈻꌊꐺ；
ꉢꇂꁮꇁꄉꊿꇔꇫꎭꌠꌟꃅꋀꊝ，
ꐧꊭꈎꌌꋀꉗꄻ。
5 ꋀꊇꀋꎪꃅꀱꉞꏹꃅꄷꁧꇈ，
ꑸꎽꊿꇁꌊꋀꄩꏲꂠꌠꉬ，
ꑞꃅꆏ，ꋀꊇꀱꉈꑴꉠꄹꇁꀋꅲ。
6 ꂗꍵꑱꃀꀋꎪꃅꋀꇓꈓꇬꆗꇁ，
ꄇꂿꏮꅍꊿꐷꆸꐔ，ꉹꁌꋍꏅꊿꌉꇫꎭ，
ꑞꃅꆏ，ꋀꊇꆹꋀꊨꏦꏡꁈꉘꇉ。
7 ꉠꉹꁌꉪꄉꏡꄉꉡꐞꁧ，
ꋀꊇꋍꉎꀋꐥꂶꌠꏭꇖꂟꑴꇬ，
ꄚꋋꆹꋀꄎꑣꀋꇁ。
8 ꑱꃔꆃꀋ！ ꉢꈍꃅꄉꆏꋋꂷꇤꇫꎭꉆꂯ？
ꑱꌝꆀꀋ！ ꉢꈍꃅꄉꆏꋋꂷꍞꇫꎭꉆꂯ？
ꉢꈍꃅꄉꆏꁳꑸꂷꇓꈓꌡꎻꉆꂯ？
ꈍꃅꄉꆏꁳꑭꀝꇓꈓꌡꎻꉆꂯ？
ꉢꉠꉪꐨꄺꀱ，
ꉠꉌꂵꎭꃅꉇꑭꑌ，ꃆꄔꐞꃅꐞꀐ。
9 ꉢꇨꇅꃃꅩꌬꀕꃅꀋꐛꀐ，
ꑱꃔꆃꑌꈔꀋꋏꀐ。
ꑞꃅꆏ，ꉡꆹꏃꃅꌋꉬ，ꃰꊿꀋꉬ。
ꉡꆹꆍꈬꄔꇬꌃꎔꂶꌠꉬ，
ꉢꈍꃅꑌꇨꇅꃃꋩꀕꃅꆍꄷꀋꇁ。
10 ꑳꀊꊆꆹꆿꅪꌟꃅꏅ，
ꋍꌳꃈꅮꈧꌠꀋꎪꃅꋍꊂꈹ。
ꋌꋍꇅꏅꄷꌦꆏ，
ꋀꊇꁮꐚꁆꏯꄉꑑꃹꏾꌌꀕꃅꀱꇁ。
11 ꋀꊇꀋꎪꃅꉌꊭꌟꃅꉞꏹꄉꑑꃹꏾꌌꀕꃅꀱꇁ，
ꄤꆳꌟꃅꑸꎽꄉꀱꉈꑴꇁ。
ꉢꀋꎪꃅꋀꁳꋀꊨꏦꑳꇬꀀꎽ。
ꋍꑠꆹꑳꀊꊆꉉꌠꉬ。
ꏃꃅꌋꑱꌝꆀꄰꏯꊨꀖ
12 ꑱꃔꆃꆹꈰꏅꌊꉠꈭꉠꇍꏮꐺ，
ꑱꌝꆀꄰꆹꐈꋒꄉꉡꊝ；
ꄚꒀꄊꄰꆏꄡꇗꏃꃅꌋꐊꐺꑴꌦ，
ꀋꎪꀋꎙꃅꌃꎔꂶꌠꊝꑴꌦ。