ꄊꑱꆀꆹꑱꌝꆀꊿꎁꃅꈼꂟ
3 ꄚꄉ，ꉡꆹꋚꈻ，ꃆꁁꃢꈜꈚ，ꀂꏾꈑꆠꇗꄉ，ꏮꌊꏃꃅꌋꉜꄉꈧꊰꀕꃅꋍꏭꈼꂟ、ꇖꂟ。 4 ꉡꆏꑳꀊꊆ-ꉠꏃꃅꌋꏭꑽꃤꉉꏚꄉꑠꃅꈼꂟ：“ꌋꀋ！ ꆎꆹꇰꀋꃀꇈꊽꃪꉬꌠꏃꃅꌋꉬ，ꆏꏤꐪꇬꈴꄉꀋꑍꀋꈤꌠꉂꐪꌊꊿꆎꉂꆎꅉ、ꅽꇗꅉꏦꃤꍬꈧꌠꊝꇬꎷ。 5 ꉪꊇꑽꃤꐆ，ꃅꑽꏿꑽ，ꄸꃅꅠꑽꄉꆎꆼꁏ，ꅽꏥꏦꌋꆀꄹꏦꀋꍬꃅꎎꁧ； 6 ꌋꅇꄜꊿꅽꁏꐚꈧꌠꅽꂓꄜꄉꉪꃰꃅ、ꉪꏲꌋꂠꌋ、ꉪꁍꁈꌋꆀꃅꄷꋌꈚꇬꉹꁌꈀꐥꌠꏭꅇꉉꇬ，ꉪꊇꋀꅇꃅꀋꅲ。
7 ꌋꀋ！ ꆎꆹꑖꉬꂶꌠꉬ，ꄚꉪꊇꒀꄊꊿꌋꆀꑳꇊꌒꇌꉹꁌ，ꉈꑴꑱꌝꆀꊿꆏꈹꈜꎴꃅꄷꎭꈧꌠꉬꄿꂿ、ꈛꑌꃅꄷꎭꈧꌠꉬꄿꂿ，ꐯꇯꆎꆼꁏꌐꐛꅹ，ꀃꑍꋋꄮꑠꃅꎲꄏꑊꏦꌠꉬ。 8 ꑳꀊꊆꀋ！ ꉪꊇꌋꆀꉪꃰꃅ、ꉪꏲꌋꂠꌋ、ꉪꁍꁈꐯꇯꅽꇗꐆꏦꐆꒉꄸꃅ，ꎲꄏꑊꏦꇧꁠꌐ。 9 ꌋ-ꉪꏃꃅꌋꆹꊾꎭꃅꉈ、ꑽꃤꄻꊿꏆꑠꂷꉬ，ꄚꉪꊇꆏꋋꆼꁏ。 10 ꉪꊇꆹꑳꀊꊆ-ꉪꏃꃅꌋꅇꃅꀋꅲ，ꄹꏦꅽꁏꐚꌋꅇꄜꊿꈧꌠꇇꄧꈴꄉꉉꈧꌠꑌꀋꍬ。 11 ꑱꌝꆀꉹꁌꈀꐥꃅꅽꄹꏦꐆ，ꅽꅇꃅꀋꅲꃅꄉꆎꐞꁧ，ꑠꅹ，ꁱꅽꁏꐚꃀꑭꄹꏦꄯꒉꇬꄀꄉꌠꍃꏽꌋꆀꅇꏤꈧꌠꈀꐥꃅꇁꉪꇭꀧꌸꌐ，ꑞꃅꆏ，ꉪꊇꏃꃅꌋꇗꅉꏦꃤꐆꀐ。 12 ꏃꃅꌋꆹꉮꃤꈀꇨꀕꌠꁳꇁꉪꌶꎽ，ꑠꃅꄉ，ꋍꅇꂷꉪꏭꌋꆀꉪꏲꌋꂠꌋꏭꉉꄉꈧꌠꃅꅇꅐꌐꀐ；ꇁꑳꇊꌒꇌꇓꈓꈁꌸꌠꉮꃤꑠꆹꋌꃀꃅꑆꋌꁬꇂꃴꑠꇫꅐꀋꋻꌠꉬ。 13 ꉮꃤꋋꈨꈀꐥꃅꁱꃀꑭꄹꏦꄯꒉꇬꄀꄉꌠꌟꃅꇁꉪꌶ，ꄚꉪꊇꆹꑳꀊꊆ-ꉪꏃꃅꌋꏭꂄꃅꉪꊝꄉ，ꉪꁳꑽꃤꄸꃤꐞꇈꅽꇗꅉꇯꍝꌠꅉꐚꎻꄷꀋꇖꀋꂟ。 14 ꑠꅹ，ꑳꀊꊆꆹꉪꄉꏡꄉꉮꃤꋋꈨꁳꇁꉪꌶꎽ。ꑳꀊꊆ-ꉪꏃꃅꌋꈀꃅꌠꌤꆿꆹꑖꉬꌐꌠ，ꄚꉪꊇꆏꋍꅇꃅꀋꅲ。
15 ꌋ-ꉪꏃꃅꌋꀋ！ ꆏꊋꃤꈀꇨꀕꌠꌊꉞꏹꃅꄷꄉꅽꉹꁌꆏꏃꅐꇁꇈ，ꅽꊨꏦꀃꑍꋋꄮꌟꃅꂓꒉꌗꒉꊌ。ꄚꀋꃅꉪꊇꆹꑽꃤꐆ、ꄸꃤꃅꀐ。 16 ꌋꀋ！ ꆏꈀꎭꀕꃅꅽꈀꑗꈀꉬꐨꇬꈴꄉ，ꇨꇅꃃꅩꌬꀕꃅꑳꇊꌒꇌꇓꈓꅽꌃꎔꁧꂶꌠꄡꊝꅊꇈ。ꉪꑽꃤꄸꃤꌋꆀꉪꁍꁈꄸꃅꅠꑽꒉꄸꃅ，ꑳꇊꌒꇌꇓꈓꌋꆀꅽꉹꁌꆹꊿꀊꈫꀊꇋꀀꈧꌠꌌꀑꐆꑊꐇꇧꁠꀐ。 17 ꉪꏃꃅꌋꀋ！ ꆏꀋꃅꈀꎭꀕꃅꅽꁏꐚꇖꅇꂟꅇꅲ，ꅽꊨꏦꐛꅹꃅꅽꀑꑊꁨꑭꁳꇁꌃꎔꑷꂿꈥꅐꀜꅐꂶꌠꁨꇁꎻꅊꇈ。 18 ꉠꏃꃅꌋꀋ！ ꆏꈀꎭꀕꃅꅳꀧꍔꄉꅲ，ꑓꋪꁉꄉꉜ，ꃅꄷꈥꅐꀜꅐꈚꌠꌋꆀꅽꇓꈓꂶꌠꉜꅲꇁꅊꇈ。ꉪꊇꆹꉪꊨꏦꑖꉬꑴꄷꄉꅽꏯꇖꂟꌠꀋꉬꃅ，ꆏꎭꃅꉇꑭꈁꅼꀕꌠꑌꐛꅹ，ꈧꊰꀕꃅꅽꏯꇖꂟꌠꉬ。 19 ꌋꀋ！ ꆏꈀꎭꀕꃅꅳꀧꍔꄉꅲ! ꌋꀋ！ ꆏꈀꎭꀕꃅꄻꉪꏆ! ꌋꀋ！ ꆏꈀꎭꀕꃅꉪꇖꅇꂟꅇꈴꄉꃅ！ ꆏꅽꊨꏦꐛꅹꃅ，ꄉꄡꈻꅊꇈ，ꑞꃅꆏ，ꇓꈓꋋꂷꌋꆀꉹꁌꋋꈨꐯꇯꅽꃤꉬ”ꄷ。
ꏦꀙꆀꐛꒌꇣꋲꌠꉉꀽꇁ
20 ꉢꊛꄉꅇꉉ、ꈼꂟ、ꉠꊨꏦꑽꃤꌋꆀꑱꌝꆀꉹꁌꑽꃤꉉꏚ，ꉠꏃꃅꌋꌃꎔꁧꂶꌠꎁꃅꑳꀊꊆ-ꉠꏃꃅꌋꏭꇖꂟ； 21 ꉢꈼꅇꂟꅇꉉꑌꃅꄉꇬꆏ，ꂴꏭꐛꒌꇣꋲꌠꇬꄉꉢꊌꂿꌠꉬꉎꊩꌺꏦꀙꆀꂶꌠꃅꈊꆦꑝꅍꌞꇄꌠꇬꆏꋋꇅꃅꐚꌊꉠꄹꇁ。 22 ꋌꑠꃅꄉꉉꀽꉡꇰ：“ꄊꑱꆀꀋ！ ꉢꀋꃅꄚꇁꌠꆹꆏꁳꉪꑌꌧꋬ、ꀑꁮꅺꐳꎻꂿꄷꌠ。 23 ꆏꈼꂟꄷꌦꆏ，ꅽꏯꅇꀱꀐ。ꆎꆹꉂꐪꊌꂷꉬꐛꅹ，ꉢꀋꃅꌤꆿꄛꑣꆎꇰꇁꌠꉬ；ꑠꅹ，ꌤꆿꋋꈨꆏꇬꉨꇬꏡ，ꐛꒌꇣꋲꋋꂷꆏꇫꊨꄅꄡꑟ。
24 ꅽꉹꁌꌋꆀꅽꌃꎔꇓꈓꂶꌠꎁꃅꏃꈓꏃꈓꃅꑠꏃꊰꊭꏤꄉꀐ，ꑽꃤꐆꌠꄚꄉꆏ，ꄸꃤꅠꃤꄚꄉꇔ，ꑽꃤꈬꇬꄉꋊꎼꇁꌐ，ꐩꋊꐩꍂꌠꑖꉬꇫꑟꇁ，ꐛꒌꇣꋲꌠꌋꆀꌋꅇꄜꊿꅇꂷꑠꂁꉱꄉꇫꅏꇁꀋꎽ，ꉈꑴꌃꎔꋍꉎꀋꐥꂶꌠꑌꌐꋉꄉ。 25 ꆏꅉꐚꄡꑟ，ꊨꑌꊨꄅꄡꑟ，ꅇꁵꄉꑳꇊꌒꇌꇓꈓꋈꀱꄷꄮꇬꅑꅸꌐꋉꄉꌠꃰꃅꂶꌠꇫꅐꇀꄮꑟꌠꆹ，ꀋꎪꃅꏃꈓꏃꈓꃅꑠꏃꊭꌋꆀꏃꈓꏃꈓꃅꑠꃘꊰꑋꊭꐥ。ꐤꇨꐤꊋꋋꊭꇬꆏ，ꑳꇊꌒꇌꇓꈓꇬꏢꈫꏦꈜꌋꆀꁮꐚꇊꌠꇨꁨꏡꌠꀋꎪꃅꋈꀱꄉꌠꉬ。 26 ꏃꈓꏃꈓꃅꑠꃘꊰꑋꊭꐛꈭꐨꆏ，ꌐꋉꄉꂶꌠꊿꈔꋏꇫꎭꇈ，ꑞꑌꐘꀋꈨꀐ；ꀋꎪꃅꃰꃅꂷꇂꃴꉹꁌꈧꌠꇁꌊꇓꈓꋋꂷꌋꆀꌃꎔꑷꂿꋋꂷꈔꋏꇁ，ꌐꂫꆹꀋꎪꃅꒈꅐꃪꂡꌟꃅꇫꅐꇁ。ꀋꎪꃅꌉꐥꆳꐥꅷꌐꂫꑟ，ꈥꅐꀜꅐꌠꌤꑠꆹꏤꄉꀐ。 27 ꃅꈎꏃꈓꃅꑠꊭꇬꆏ，ꃰꃅꀊꋨꂷꆹꊿꀉꑌꈨꌋꆀꐯꐉꏤꐪꈫꈈꑠꏢꒃꄉ；ꏃꈓꊬꌠꈫꁁꇬꆏ，ꋋꆹꀋꎪꃅꎇꃀꍅꑓꌋꆀꋚꒉꌊꆦꑝꌠꃅꐨꑠꋌꆏꇫꎭ；ꀋꎪꃅꊿꋋꌂꇈꈔꋏꌠꌤꀉꄂꃅꌠꁱꑠꈨꋌꄖꌃꎔꑷꂿꇬꋉꄉ；ꅑꅸꏤꄉꌠꌐꂫꇁꈔꋏꌠꌤꀉꄂꃅꂶꌠꀁꏾꌸꄮꇬꑟ。