ꒀꄉꊿꑗꉘꃴꇉꀕꌠꊝ
15
1 ꑳꀊꊆꉠꏯꑠꃅꉉ：“ꃀꑭꌋꆀꌒꃆꇓꑋꉠꂾꉆꄉꉹꁌꋋꈨꎁꃅꇖꂟꄷꑲꑌ，ꉢꋀꊇꉈꀋꇬ。ꆏꉠꂾꄉꊿꋋꈨꈹꇫꎭ，ꈹꉈꏭꎭ！ 2 ꀋꄸꄷꋀꊇꅽꏯ：‘ꉪꊇꇿꇬꉜꄉꁧꂯ？’ꃅꅲꑲꆏ，ꆏꋀꏭꉉ，ꑳꀊꊆꄹꇬ： ‘ꌦꄡꑟꌠꆏ，ꀋꎪꃅꄉꌦ；
ꊿꌉꌦꄡꑟꌠꆏ，ꀋꎪꃅꄉꂗꍵꑱꃀꇂꃴꌦ；
ꂮꐚꈠꆺꌦꄡꑟꌠꆏ，ꀋꎪꃅꄉꂮꐚꈠꆺꌦ；
ꊿꁮꌊꁧꄡꑟꌠꆏ，ꀋꎪꃅꄉꊿꁮꌊꁧ’ꄷ。
3 ꉮꃤꇖꑵꉢꄐꉢꏤꄉꇁꋀꌶꎽ，ꉮꃤꋋꈨꆹꂗꍵꑱꃀꌊꌉ、ꊿꂿꈌꈻꌊꁧ、ꃅꃴꇬꉌꊭꇱꄴꅝ、ꃄꅉꇬꑋꁮꉆꁮꇣꋠꃅꑠꉬ。ꋍꑠꆹꑳꀊꊆꉉꌠꉬ。 4 ꉢꀋꎪꃅꋧꃅꇩꏤꈀꐥꌠꁳꋀꐛꅹꃅꄉꋌꇷꄸꌋꊪꇖꀕꎻ，ꌤꆿꋍꑠꇫꅐꌠꆹꑭꀕꏦꄰꌺꒀꄊꃰꃅꂸꇂꑭꂶꌠꑳꇊꌒꇌꄉꈀꃅꈀꑽꌠꒉꄸꉬ。
5 ꑳꇊꌒꇌꀋ！ꈀꄸꂷꆎꎭꃅꉈꇁꂯ？
ꈀꄸꂷꅽꎁꃅꉌꐒꇁꎭꂯ？
ꈀꄸꂷꏮꆏꉚꄉꅽꏯꋬꂻꄜꇁꂯ？
6 ꆎꆹꉢꆏꇤꇫꎭꇈ，ꇱꄓꏮꉢꉚꄉꁧꀐ；
ꑠꅹ，ꉢꇇꎇꌊꆎꇇꇩꍈ、ꆎꈔꋏ，
ꉢꆎꎭꃅꉇꉈꌋꆀꉌꅧꑓꇤꀐ。
ꋍꑠꆹꑳꀊꊆꉉꌠꉬ。
7 ꉡꆹꃅꄷꋌꈚꇓꈓꄇꂿꈧꌠꇬꄉꀊꏢꌊꉠꉹꁌꏢꄉ，
ꋀꁳꌺꌦꇖꆅꎻ，
ꋀꊇꉢꇱꈔꋏꇫꎭꌐ，
ꑞꃅꆏ，ꋀꊇꄡꇗꄸꈜꅠꈜꐞꇁꀋꅲ。
8 ꉡꆹꋀꃆꍸꃀꈧꌠꁳꎿꋮꂤꏂꑘꀋꋌꎻ；
ꊾꈔꋏꂶꌠꁳꂵꆪꈨꌬꌫꄮꇬꇁꌊꌠꆗꈧꌠꀉꂿꌉꄉ，
ꐒꊀꌠꌋꆀꐬꆠꑠꁳꋋꇅꃅꇁꀉꂿꈧꌠꇭꀧꇬꌸꎻ。
9 ꀋꃀꌳꃈꅮꏃꑹꁨꌠꉈꊰꑓꊰ、ꈏꌦꊋꌦꏽ；
ꂵꆧꈨꌬꌫꄮꉬꑴꇬ，ꉘꁮꋋꇅꃅꈞꆈꃹꁧꀐ，
ꀉꂿꂶꌠꄚꄉꀑꊰꑊꊰꎲꅐꁁꅐꏽ。
ꉢꀋꎪꃅꋀꈬꄔꇫꋒꇈꈧꌠꁳꁮꐚꂗꍵꑱꃀꇂꃴꌦꎻ。
ꋍꑠꆹꑳꀊꊆꉉꌠꉬ”ꄷ。
ꑱꆀꂱꎭꐨꅦꑌꌌꑳꀊꊆꏭꑌꊈ
10 ꀉꂿꀋ！ ꉢꉮꃤꌸꀐ！ꑞꃅꆏ，ꉢꋋꂷꆏꒆꎼꇁꇈ，ꊿꃅꄉꉡꉈꈽ、ꉠꊂꅇꎹꇁꌐ。ꉢꐥꅷꇁꎆꄻꌞꊿꉛꀋꋻ， ꌞꊿꑌꎆꄻꉡꉛꀋꋻ，ꄚꊿꋍꂷꋑꀋꋒꉢꍁꉢꏽꌐ。 11 ꑳꀊꊆꑠꃅꉉ：“ꉢꀋꎪꃅꆎꈭꋏꄉ，ꆏꁳꌒꃤꊌꎻ。ꎭꃤꉮꃤꇫꅐꇀꄮꇬꆏ，ꉢꀋꎪꃅꁮꐚꁳꈧꊰꀕꃅꆎꇖꆏꂟꇁꎻꌠꉬ。 12 ꈀꄸꂷꒈꀑꏭꄉꇁꌠꎸꅍꌋꆀꐯꑠꋌꆸꐔꇫꎭꄎ？
13 ꆏꅽꃅꄷꄉꈀꐆꌠꑽꃤꈧꌠꐛꅹꃅ，ꉡꆹꅽꁨꇐꄉꇐꈧꌠꁋꍈꀋꈁꃅꉢꄻꁮꐚꁳꁮꌊꁧꎻ。 14 ꉡꆹꆏꁳꃅꄷꆏꇬꀋꌧꑠꈚꇬꄉ，ꅽꁮꐚꇂꃴꐥꄉꋀꎁꃅꌤꃅꁧꎻa，ꑞꃅꆏ，ꆍꊇꆹꉠꇨꇅꃃꄉꐞꇁꌠꃆꄔꇱꐗꇫꎭꌠꉬ”ꄷ。
15 ꑳꀊꊆꀋ！ꆏꅉꐚ；
ꆏꈀꎭꀕꃅꉢꎺꉡꄅ、ꉢꉚꉡꅲ，
ꉠꎁꃅꊿꉢꉮꇁꈧꌠꄷꋪꒃ；
ꆏꑴꌠꉠꀑꇬꄡꒃꅊꇈ，
ꑞꃅꆏ，ꆎꆹꈝꐮꃅꄉꇨꇅꀋꃃ，
ꉢꅽꎁꃅꄉꊿꌌꐔꏼꇧꁠꌠꑌꆏꅉꐚ。
16 ꑳꀊꊆ-ꄙꀕꃪꀕꉬꉎꂽꑼꌊꁈꏃꃅꌋꀋ！
ꅽꅇꂷꉢꊌꄷꌦꆏꉢꇣꋠꀐ，
ꅽꅇꂷꆹꉠꄸꈐꇬꉌꇿꑓꇿꐨꌋꆀꉌꃈꑓꌒꐨꉬ；
ꑞꃅꆏ，ꉡꆹꅽꊿꉬꑴꄷ。
17 ꉡꆹꊿꈩꌒꀜꌒꃅꋟꅝꌠꑠꐊꀋꐺ，
ꉢꆏꇱꌄꇤꌊꐹꒉꄸꃅ，
ꉢꇨꇅꃃꌌꉠꊨꏦꀉꄂꀕꃅꇫꑌ。
18 ꉠꎭꃤꅧꃤꈧꌠꑞꃅꑠꉗꏢꃅꆏꇁꀋꉆꌠꉬ？
ꉠꂷꊂꈧꌠꑞꃅꉃꅉꇬꀋꐛ、ꉃꌒꇁꀋꉆꌠꉬ？
ꆏꒈꌺꈳꌦꀋꈴꌦꃅꑠꏢꌟꃅꈱꉡꊏꌠꅀ？
19 ꑠꅹ，ꑳꀊꊆꉠꏯꑠꃅꉉ：
“ꀋꄸꄷꆏꉪꁏꄺꀱꑲꆏ，
ꉢꀋꎪꃅꆏꁳꀱꉠꂾꄉꌤꃅꇁꎻ。
ꀋꄸꄷꆏꅇꂷꂿꄐꀋꐥꈧꌠꄡꉉꃅ，
ꅇꂷꁌꇐꈤꈧꌠꉉꑲꆏ，
ꆎꆹꉠꎁꃅꅇꂷꉉꂶꌠꄻꉆ。
ꉹꁌꈧꌠꀋꎪꃅꀱꅽꄹꇁꌠꉬ，
ꄚꆎꆹꋀꄷꒉꀋꉆ。
20 ꉢꀋꎪꃅꆏꁳꐯꇓꉻꈫꈈꑠꏮꐛꄉꉹꁌꋋꈨꄘꑣꎻ，
ꋀꊇꀋꎪꃅꆏꅣꆏꌉꇁ，ꄚꈍꃅꑌꅽꄩꊋꀋꄐ，
ꑞꃅꆏ，ꉢꆏꈽꐥ、ꆎꀧꌋꃅ、ꆎꈭꋏ。
ꋍꑠꆹꑳꀊꊆꉉꌠꉬ。
21 ꉢꀋꎪꃅꊿꄷꅠꈧꌠꇇꈐꇬꄉꆎꈭꋏꇁ，
ꆏꋋꂷꈭꋏꌊꊾꇨꁴꍂꅿꈧꌠꐞꌠꉬ”ꄷ。