ꊽꐬꆠꌠꃅꇨꉮꃤꇫꅐ
14
1 ꑳꀊꊆꅇꂷꇁꌊꑱꆀꂱꄷꑟꇈ，ꃅꇨꉮꃤꃆꂮꄜꄉꇬꏭ：2 “ꒀꄊꀊꇷꇖ，ꇓꈓꄇꂿꐡꈥꅐ；
ꉹꁌꋍꏅꃄꅉꇬꑌꄉꐒꉩꏽ，
ꑳꇊꌒꇌꇕꃚꂟꃚꈧꌠꄩꏯꑟꀐ。
3 ꊿꐤꒉꈧꌠꆹꁏꐚꋀꇤꅷꀆꐒꇸꒉꎻ，
ꁏꐚꈧꌠꇁꌊꒉꇸꇉꋮꑟꇬꆏ，
ꒉꇸꇉꇬꀆꐒꀋꀀꄉ，ꒈꀮꀈꈥꀕꃅꀱꌊꇁ，
ꋀꊇꉈꊰꑓꊰꄉ，ꈁꑓꉱꌌꉈꑴꇁ。
4 ꂿꃅꂷꉐꀋꐛꄉ，ꃄꅉꀣꈜꁮ，
ꑘꃅꊿꉈꊰꑓꊰꌊꈁꑓꉱꌊꐺꀐ。
5 ꇈꈬꊴꃀꏜꀋꊌꃅꄉ，
ꊴꌺꏃꎼꇁꄷꆏꋌꇤꇫꎭꀐ。
6 ꇈꈬꑾꃅꏷꀕꁦꀮꌃꀠꀕꅉꇬꉆꄉ，
ꀉꐩꌟꃅꌗꁮꌗꆐꏂ；
ꋀꊇꏜꋠꅍꀋꊌꄉꑓꋪꂿꀋꐚꀐ”ꄷ。
7 ꑳꀊꊆꀋ！ꉪꑽꃤꆹꉪꊂꅇꎹ，
ꉪꊇꈍꑍꃢꃅꆎꆼꁏ、ꅽꂾꑽꃤꐆꇬꎷꑴꇬ，
ꆏꈀꎭꀕꅽꂓꌗꐛꅹꃅꉪꈭꋏꇁꅊꇈ！
8 ꑱꌝꆀꊿꇫꉘꇉꂶꌠꀋ！
ꋀꉮꃤꊜꄮꇬꋀꈭꋏꌋꄻꂶꌠꀋ！
ꆏꑞꃅꊿꀂꉗꍈꀉꄂꄚꇬꁠꀀꑠꂷꌡꌠꉬ？
ꆏꑞꃅꈛꎼꈜꈴꐹꂷꌟꃅꄚꇬꋍꉔꀉꄂꀀꌠꉬ？
9 ꆏꑞꃅꊿꃨꆰꏸꈧꑠꂷꌡꌠꉬ？
ꑞꃅꂽꑼꌳꈄꊾꈭꋏꀋꄐꑠꂷꌡꌠꉬ？
ꑳꀊꊆꀋ！ ꆏꉪꈬꄔꐥ，
ꉪꊇꆹꅽꊿꈨꉬꄷ， ꆏꈀꎭꀕꃅꉪꐞꄡꁧ。
10 ꉉꅷꉹꁌꋋꈨꑟꇬꆏ，ꑳꀊꊆꑠꃅꉉ：
“ꉹꁌꋋꈨꆹꄂꏷꄁꃰꐺꌠꋀꉌꃹ，
ꋀꑭꁘꉌꂵꈁꏾꅉꇬꄔ，
ꑠꅹ，ꉡꆹꋀꊪꀋꏾ，
ꀃꑍꋋꄮꆏ，ꋀꑽꃤꄸꃤꉢꎺꇁ，
ꋀꄸꃤꅠꃤꈧꌠꐛꅹꃅꉢꋀꇇꇩꍈꌠꉬ”ꄷ。
11 ꑳꀊꊆꉈꑴꉠꏯ：“ꉹꁌꋋꈨꎁꃅꋬꇖꈨꂟꌋꀋꌸ。 12 ꋀꊇꋚꈻꄷꑲꑌ，ꉢꋀꇖꅇꂟꅇꀋꅲꌠ；ꋀꊇꐗꌐꆦꑝꅍꌋꆀꋚꂷꒉꂷꆦꑝꅍꌞꄷꑲꑌ，ꉢꇬꀋꊪꌠ。ꉡꆹꀱꆽꃅꂗꍵꑱꃀ、ꃱꉩꄸꌋ、ꇵꆅꁠꆅꑠꌊꋀꈔꋏꇁꌠꉬ”ꄷ。
13 ꄚꉡꆏ：“ꀊꃂ！ꌋꑳꀊꊆꀋ！ꆏꅉꐚ，ꌋꅇꄜꊿꀊꋨꈨꅉꀕꃅꋀꏭ：‘ꆍꊇꆹꈍꃅꑌꂗꍵꑱꃀꑠꊌꀋꂿ，ꃱꉩꄸꌋꑠꑌꊝꀋꇁ；ꑳꀊꊆꃅꄷꋌꈚꇬꄉꋬꂻꃶꐚꌠꄻꆍꊇꇖꌠꉬ’ꃅꉉꇬꎷ”ꄷ。
14 ꑳꀊꊆꆏꉠꏯ：“ꌋꅇꄜꊿꀊꋨꈨꉠꂓꄜꄉꅇꂷꃶꀋꐚꌠꉉ，ꉢꋀꁆꄻꀋꋻ，ꋀꏭꅇꁵꀋꋻ，ꋀꏭꅇꂷꈨꑌꉉꀋꋻ；ꋀꊇꆍꏭꈁꉉꌠꆹꃶꀋꐚꌠꐛꒌ、ꈎꌋꆪꄏꌠ、ꀨꀋꐥꄩꀋꐥꌠꌋꆀꄸꈐꇬꐈꋓꌠꃆꂮꑠꉬ”ꄷ。 15 ꑠꅹ，ꑳꀊꊆꑠꃅꉉ：“ꉉꅷꌋꅇꄜꊿꉠꂓꄜꄉꅇꂷꃶꀋꐚꌠꉉꈧꌠꑟꇬꆹ，ꉢꋀꁆꄻꀋꋻ；ꋀꊇꄹꇬꃅꄷꋌꈚꇬꂗꍵꑱꃀꌋꆀꃱꉩꄸꌋꑠꇫꅐꀋꇁꄷ。ꇯꍝꃅꇬ，ꌋꅇꄜꊿꀊꋨꈨꊨꏦꑴꅉꂯꂗꍵꑱꃀꌋꆀꃱꉩꄸꌋꈬꇬꄉꈔꌐꌠꉬ。 16 ꉹꁌꋀꅇꂷꅲꈧꌠꑌꀋꎪꃅꂗꍵꑱꃀꌋꆀꃱꉩꄸꌋꑠꒉꄸꃅ，ꊿꇱꍞꑳꇊꌒꇌꏦꈜꇬꄉ，ꊾꂷꇫꐗꇬꄁꌠꀋꊌꌠꉬ 。ꋀꀋꃀꀉꑳꈧꌠꑌꑠꃅꐙꌐ。ꉡꆹꀋꎪꃅꋀꄸꃤꅠꃤꈧꌠꉢꉷꋀꇭꀧꇬꎭꌠꉬ”ꄷ。
17 ꑳꀊꊆꉈꑴꉠꏯ： “ꑱꆀꂱꀋ！ꆏꋀꏭ：
‘ꉡꆹꑍꇁꌋꀋꐥꃅꄉꑓꁴꑰꀕꇤ，
ꑞꃅꆏ，ꉠꊿꋅꃺꑌꈧꌠꅥꇁꄁꌠꑗꉘꊝ，
ꂷꊂꌸꀙꐯꀙꀐ。
18 ꉢꁖꉈꏭꃄꅉꒉꇬꑌ，
ꀊꁣ！ꊿꂗꍵꑱꃀꌉꌦꇬꅜꄉ；
ꉢꇓꈓꈐꏭꃹꆹꇬꑌ，
ꀊꁣ！ꃱꉩꄸꌋꄉꊿꆄꁮꈺꁘꊌꌠꌐꀋꉆ；
ꌋꅇꄜꊿꌋꆀꆦꑝꊿꑌ，
ꑞꃅꄡꑟꌠꋀꋌꀋꌧꃅꄁꃰꐺa’ꄷ”ꄷ。
ꉹꁌꈧꊰꀕꃅꑳꀊꊆꏭꇖꂟ
19 ꑳꀊꊆꀋ！ꆏꇯꍝꃅꄉꒀꄊꋋꁯꆏꇤꇫꎭꀐꌠꅀ？
ꆏꑭꉢꇓꈓꂿꇬꅽꉌꅧꑓꇤꀐꅀ？
ꆏꑞꃅꉪꇇꇩꍈꄉ，ꉪꆅꃤꁳꉃꌒꇁꀋꉆꎻꌠꉬ？
ꉪꊇꋬꂻꊌꌠꉘꇉ，ꄚꌒꃤꉪꋌꀋꊌ；
ꉪꊇꉃꄻꌠꇁꉚ，ꄚꐬꆠꑓꆠꌠꊝꀐ。
20 ꑳꀊꊆꀋ！ꉪꊇꉪꊨꏦꑽꃤꌋꆀꉪꁍꁈꑽꃤꉉꏚ，
ꑞꃅꆏ，ꉪꊇꆹꅽꇗꅉꏦꃤꐆꀐ。
21 ꆏꑴꌠꈀꎭꀕꃅꅽꂓꌗꐛꅹꃅ，
ꉪꂿꇬꅽꉌꄡꅧꑓꄡꇤ，
ꅽꃰꃅꑋꅉꀑꒉꑊꒉꂶꌠꁳꎲꅐꁁꅐꄡꎽ。
ꆏꑴꌠꈀꎭꀕꃅꅽꉪꇢꊭꏤꐪꏡꌠꎺꄉꄡꐆꅊꇈ。
22 ꌞꀉꁁꇩꏤꌦꌋꂿꄐꀋꐥꈧꌠꈬꄔꇬ，
ꂿꃅꁳꂷꉐꐛꇁꄎꎻꑠꂷꐥꑴꅀ？
ꂿꃅꋍꊨꏦꃅꄉꉐꍑꐛꇁꄎꑴꅀ？
ꑳꀊꊆ-ꉪꏃꃅꌋꀋ！
ꆏꀉꄂꑠꃅꄎꌠꀋꉬꅀ？
ꉪꊇꆹꆎꇁꉚ，
ꑞꃅꆏ，ꋋꈨꈀꐥꃅꆏꄻꄉꌐꌠꉬ。