ꑱꆀꂱꄯꒉ 7

ꑱꆀꂱꉹꁌꏭꉪꁏꄺꀱꄷꅇꈪꊐ

1 ꑳꀊꊆꅇꂷꇁꌊꑱꆀꂱꄷꑟꄉ，ꇬꏭ： 2 “ꆏꑳꀊꊆꑷꂿꀃꈈꁭꑭꉆꄉ，ꅇꂷꋋꈨꄛꇰ：ꒀꄊꊿꄚꀃꈈꋋꈨꈴꄉꑳꀊꊆꏭꇗꅉꃅꈀꇁꈧꌠꀋ！ ꆍꊇꑳꀊꊆꅇꅲꄡꑟ。 3 ꄙꀕꃪꀕꉬꉎꂽꑼꌊꁈꑳꀊꊆ-ꑱꌝꆀꏃꃅꌋꑠꃅꉉ： ꆍꃅꐨꑽꑌꈧꌠꄺꀱꑢꀱꑲꆏ，ꉢꆍꁳꄡꇗꋬꂻꃅꄉꃅꄷꋌꈚꀀꎻꌠꉬ。 4 ꆍꊇꑴꌠꈱꅇꏅꅇ‘ꋋꂷꆹꑳꀊꊆꑷꂿꉬ，ꑳꀊꊆꑷꂿꉬ，ꑳꀊꊆꑷꂿꉬ’ꃅꑠꄡꑇ！ 5 ꀋꄸꄷꆍꊇꇯꍝꃅꆍꃅꐨꑽꑌꈧꌠꄺꀱ，ꆍꈬꄔꇬꊒꆽꀕꃅꐮꊝ， 6 ꊿꆍꁠꀀꌠꌋꆀꃆꍸꌺꇜꆽꄡꍅ，ꃅꄷꋌꈚꄉꊿꅑꑘꀋꐥꌠꄡꌉ，ꉈꑴꀉꁁꌦꌋꊂꈹꄉꊨꏦꄡꉮꑲꆏ， 7 ꉢꆍꁳꄡꇗꃅꄷꀋꉊꉢꄻꆍꁍꁈꁵꄉꋌꈚꀀꎻ，ꅑꅸꐩꋊꐩꍂꑟ。

8 ꇬꉚ! ꆍꊇꆹꅇꈥꉐꈣꈲꏣꀋꐥꑠꉘꇉ。 9 ꆍꊇꊾꈐꊾꈱ、ꊿꌉꊾꆳ、ꎼꃅꃏꑽ、ꅇꏤꃶꀋꐚꌠꒃ、ꀠꆀꌦꌋꏭꅿꉗꌒꅍꄀ，ꀉꁁꌦꌋꆍꇬꀋꌧꑠꊂꈹꁦꌦ， 10 ꀱꉈꑴꉠꑷꂿꂶꌠꇬꉠꏯꇗꅉꃅꇁꄉ：‘ꉪꊇꋬꂻꁣꀋꐥ’ꃅꉉꇈ，ꄡꇗꊛꄉꌤꆿꄷꅠꑠꃅꁦꌦꃅ。ꆍꊇꑠꃅꉆꑴꅀ？ 11 ꉠꑷꂿꋋꂷꆍꌌꏄꍿꀀꅉꂷꃅꄉꉆꑴꅀ？ ꑞꑌꇯꍝꃅꉢꊌꂿꌐꀐ。ꋍꑠꆹꑳꀊꊆꉉꌠꉬ。 12 ꆍꊇꐯꇯꏂꇊꇓꈓꀋꉊꂴꌌꉠꏯꇗꅉꃄꅉꈚꌠꆹ，ꉢꑱꌝꆀꉹꁌꑽꃤꐆꐛꅹꈍꃅꋀꇇꇩꍈꌠꉜꆹ。 13 ꀋꃅꆍꊇꌤꆿꋍꑠꆍꃅꇬꅜꐛꅹ，ꉢꀱꇊꀱꃅꆍꏭꅇꈪꊐ，ꄚꆍꊇꇫꅲꀋꅲ；ꉢꆍꇴꇬꑌ，ꆍꊇꉠꅇꀱꀋꅲ。ꋍꑠꆹꑳꀊꊆꉉꌠꉬ。 14 ꑠꅹ，ꉢꀋꉊꈍꃅꏂꇊꇓꈓꊜꆏ，ꀋꃅꑌꈍꃅꉠꑷꂿꆍꇫꉘꇉꂶꌠ、ꃄꅉꉢꄻꆍꊇꌋꆀꆍꁍꁈꁵꈚꌠꊝꌠꉬ。 15 ꀋꉊꆍꃺꑌꑱꃔꆃꊂꋊꈧꌠꉠꈹꇫꎭꌠꌟꃅ，ꆍꊇꑌꀋꎪꃅꉠꂾꄉꉢꈹꇫꎭꌠꉬ。

ꑱꌝꆀꉹꁌꏃꃅꌋꅇꃅꀋꅲ

16 ꑠꅹ，ꆏꉹꁌꋋꈨꎁꃅꄡꈼꄡꂟ；ꋀꎁꃅꄡꇖ，ꉈꑴꋀꎁꃅꉠꏯꄡꇖꄡꂟꀐ，ꑞꃅꆏ，ꉢꅽꅇꀋꅲ。 17 ꋀꒀꄊꇓꈓꌋꆀꑳꇊꌒꇌꏦꎫꄉꈀꃅꈁꑽꈧꌠ，ꆏꇬꊊꀋꂿꅀ？ 18 ꋀꊇꆹꀉꑳꌩꉅ，ꀉꄉꃆꄔꏦ，ꌋꅪꈧꌠꆏꋚꍀꌊꎬꁱꃅꄉꌞꌌꌦꀋꃋꌋꀋꃋꉬꉎꃰꃅꀋꃀꄷꂶꌠꁵ，ꉈꑴꎧꉷꌊꀉꁁꌦꌋꑠꏭꑌꆦꑝꁧꄉ，ꉠꇨꇅꃃꌦꄉꏽ。 19 ꋀꊇꉢꁳꇨꇅꃃꎻꌠꉬꑴꅀ？ꋀꊇꆹꊨꏦꃅꌊꊨꏦꉮꄉ，ꑊꏦꎲꄏꏽꌠꀋꉬꅀ？ꋍꑠꆹꑳꀊꊆꉉꌠꉬ。 20 ꑠꅹ，ꌋꑳꀊꊆꑠꃅꉉ：ꇬꉚꄉ！ ꉢꀋꎪꃅꇨꇅꃃꅩꌬꀕꃅꇁꃅꄷꋌꈚꇬꊿ、ꎇꃀꍅꑓ、ꌩꁧꇓꁧꌋꆀꃄꅉꇬꅐꇐꑠꊝꄉ，ꃆꄔꊿꇬꌉꀋꄐꑠꌊꐗꌠꉬ”ꄷ。

21 ꄙꀕꃪꀕꉬꉎꂽꑼꌊꁈꑳꀊꊆ-ꑱꌝꆀꏃꃅꌋꑠꃅꉉ：“ꆍꊇꐗꌐꆦꑝꎸꌋꆀꀉꁁꆦꑝꅍꈧꌠꐯꇯꌌꆍꊨꏦꋠꁧ！ 22 ꑞꃅꆏ，ꆍꁍꁈꉢꏃꉞꏹꄉꅐꇁꀊꋨꄹꉇ，ꉢꋀꏭꐗꌐꆦꑝꅍꌋꆀꀉꁁꆦꑝꅍꃆꂮꑠꉉꀋꋻ，ꋀꏭꑠꌞꌌꇁꄷꅇꁵꀋꋻ。 23 ꉢꋀꏭꌤꋍꑵꀉꄂꅇꁵꋺ：‘ꆍꊇꉠꅇꅲ，ꑠꃅꑲꆏ，ꉢꆍꏃꃅꌋꄻ，ꆍꊇꑌꉠꉹꁌꐛ。ꆍꊇꈝꃀꉢꆍꏭꈁꉉꈧꌠꍬꑲꆏ，ꌒꃤꊌꌠꉬ’ꄷ。 24 ꄚꋀꊇꆹꇬꀋꅲ，ꋀꅳꀧꆹꈢꀋꎰ，ꀱꌊꊨꏦꏂꇐꇫꇐꌋꆀꆸꉈꆽꁁꌠꉌꂵꄷꅠꂶꌠꇬꈴꄉꃅꐛꅹ，ꁨꏭꀋꆹꃅꀱꉈꑴꇁ。 25 ꆍꊇꁍꁈꉞꏹꄉꅐꇁꀊꋨꄹꉇꅑꅸꀃꑍꋋꄮꑟꌠꃅ，ꉢꋍꑍꋑꀋꋒꌋꅇꄜꊿꉠꁏꐚꈧꌠꉢꁆꌌꆍꄷꒉꎻꑴꇬ， 26 ꄚꆍꄡꇗꉠꅇꅲꀋꅲ，ꉠꅇꂷꆍꅳꀧꆹꈢꀋꎰ，ꆸꉈꆽꁁꌊꆍꁍꁈꏭꀋꋌꃅꄉꄸꃅꅠꑽꇬꎷ。

27 ꆏꑴꌠꅇꂷꋋꈨꈀꐥꃅꉉꋀꇰꒉ，ꄚꑠꃅꑴꇬ，ꋀꊇꈍꃅꑌꅽꅇꅲꀋꅲ；ꆏꋀꇴꇬꑌ，ꋀꅽꅇꀋꀱꌠꉬ。 28 ꆏꋀꏭꑠꃅꉉꒉ：‘ꊿꋋꈨꆹꑳꀊꊆ-ꋀꏃꃅꌋꅇꂷꋀꇬꀋꅲ，ꋍꉙꅇꂘꅇꋀꇬꀋꊪꌠꉹꁌꈧꌠꉬ；ꋀꈁꉉꌠꆹꀋꎪꀋꑴꅇꂷꑠꍈꇬꀋꐊꀐ。 29 ꑳꇊꌒꇌꀋ！ꀑꑐꈧꌠꑐꌊꍞꇫꎭ，ꀭꇐꌃꀠꀕꅉꇬꄉꌦꏷꉙꇐꉙ，ꑞꃅꆏ，ꑳꀊꊆꆹꃅꋊꋍꇨꇅꃃꋋꋏꋌꍞꋌꇤꇫꎭꀐ’ꄷ”ꄷ。

ꑭꇍꊪꇁꄿꑽꃤꆈꒉꀕꌠꇫꅐ

30 ꑳꀊꊆꉈꑴꑠꃅꉉ：“ꒀꄊꊿꆹꌤꆿꉢꉜꇬꄷꅠꑠꀉꄂꃅ，ꌩꁱꇓꁱꊿꋋꌂꑠꋀꄻꉠꑷꂿꇬꅞꄉ，ꑷꂿꂶꌠꋌꍍꋌꆀꇧꁠꀐ。ꋍꑠꆹꑳꀊꊆꉉꌠꉬ。 31 ꋀꊇꆹꑭꇍꊪꇁꄿꄉꄬꃏꄯꌦꌋꆦꑝꅉꋀꄻꄉꇈ，ꋀꌳꃈꅮꋀꌌꃆꄔꄩꐗ。ꉢꋀꏭꑠꃅꅇꁵꀋꋻ，ꉠꉌꂵꑌꐥꅷꇁꑠꉪꀋꋻ。 32 ꑠꅹ，ꃅꑍꑟꇁꀐ，ꃅꄷꋌꈚꆹꄬꃏꄯꌋꆀꑭꇍꊪꇁꄿꀋꂓꃅ，ꀱꌊꊿꌉꇁꄿꂓꀐ。ꋀꊇꊿꂿꋀꌌꄬꃏꄯꄃꇈ，ꄃꅉꎷꀋꊌꀐ。ꋍꑠꆹꑳꀊꊆꉉꌠꉬ。 33 ꄷꀋꁧꉹꁌꋋꈨꂿꆹꃅꃴꇬꉌꊭꉌꇓꌋꆀꃄꅉꇬꑋꁮꉆꁮꇣꋠꇬ，ꊾꂷꇫꇷꇬꈹꌠꀋꊌꌠꉬ。 34 ꀊꋨꄮꇬꆏ，ꉢꀋꎪꃅꒀꄊꃅꄷꇓꈓꌋꆀꑳꇊꌒꇌꏦꎫꇬꉌꇿꑓꇿꌠꃚꋒ、ꌐꃶꌋꆀꑮꃀꃚꋒꑠꁳꇫꈌꀋꐚꎻ，ꑞꃅꆏ，ꃅꄷꋌꈚꀋꎪꃅꇁꊿꀋꋦꃮꀋꀆꅉꐛ”ꄷ。