ꑳꌝꆀꊿꏃꃅꌋꈝꃀꍬꀋꅲ
6
16 ꑳꀊꊆꑠꃅꉉ：“ꆍꊇꈛꁧꇬꉆꄉꍤꉚ，
ꈝꃀꀉꆹꎹꈹꅲꇫ，
ꈝꃀꎃꊒꌠꇿꐛꆏ，ꇿꇬꈴ；
ꑠꃅꑲꆏ，ꆍꊨꏦꆹꀋꎪꃅꀀꌒꑌꌒꌠꉬ。
ꄚꆍꊇꆏ：‘ꉪꊇꈝꃀꑠꀋꈴ’ꄷ。
17 ꉢꆍꎁꃅꐏꁈꊿꉢꌐꋉꄉ，
ꆍꏭ：‘ꋓꉪꁨꃅꉶꁱꄎꃚꅲ’ꄷꉉ，
ꄚꆍꊇꆏ：‘ꉪꊇꑠꀋꅲ’ꄷ。
18 ꑠꅹ，ꇩꏤꈀꐥꌠꀋ！ ꅲꄉ！ ꉹꁌꋍꏅꊈꀋ！ ꌤꆿꀋꎪꃅꋀꊝꇁꈧꌠꅉꐚꌶ！
19 ꃄꅉꀋ! ꅲꄉ！
ꇬꉚꄉ! ꉢꀋꎪꃅꉮꃤꁳꇁꉹꁌꋋꈨꌸꎻ，
ꋍꑠꆹꋀꏂꋀꇭꊨꏦꀂꏽꄀꌠꉬ；
ꑞꃅꆏ，ꋀꊇꆹꋓꉪꁨꄉꉠꅇꂷꀋꅲ，
ꉠꄹꏦꈧꌠꑌꋀꇬꀋꊪꃅꋀꍞꇫꎭ。
20 ꏂꀠꃅꄷꄉꌌꇁꌠꅿꉗꌒꌠꌩꌅ，
ꈜꎴꃅꄷꄉꌌꇁꌠꅿꉗꌒꌠꃅꐴ，
ꑠꌞꌌꉢꁳꇁꇬꑞꇿꋌꐥꀋ？
ꆍꐗꌐꆦꑝꅍꉠꄻꀋꈴ，
ꆍꆦꑝꅍꑌꉠꉌꀋꃹ”ꄷ。
21 ꑠꅹ，ꑳꀊꊆꑠꃅꉉ：
“ꇬꉚꄉ！ ꉢꑭꇹꇓꂵꂷꄻꉹꁌꋋꈨꂾꅞꄉ，
ꀋꁧꀉꌺꐯꇯꊰꇁꋍꄩꄚꄉ，
ꃷꇎꌋꆀꐋꀨꐯꇯꈔꑍꎻ”ꄷ。
ꌉꇁꆳꌠꒈꀑꏭꄉꄓꇁ
22 ꑳꀊꊆꑠꃅꉉ：
“ꇬꉚꄉ！ꊿꋅꑠꁯꒈꀑꄉꅐꇁ；
ꇩꏤꀉꇨꑠꂷꌉꄐꌉꏤꌊꃅꋮꆸꈈꄉꄓꇁ。
23 ꋀꊇꐳꉹꇇꁉꊭ，
ꊿꌉꇇꃶꀋꑳ，ꊾꎭꃅꉈꑲꀋꌧ；
ꋀꃚꋒꆹꒈꂄꒊꆱꄓꌠꌡ。
ꑭꉢꇓꈓꀋ！
ꋀꊇꐯꇯꃆꀠꋩꄉꇁ，
ꌉꈿꌠꌟꃅꐮꎆꄉꆏꌉꇁꀐ。
24 ꅇꌐꋍꑠꉪꊇꈨꇬꆏ，ꋌꇷꇇꆹꊋꀋꑌ；
ꆅꃤꆼꒆꉪꎏꇁ，
ꆅꈻꐨꆹꀋꃀꂷꀉꑳꒆꌠꌡ。
25 ꆍꊇꁖꉈꏭꃄꅉꇬꄡꒉ，
ꈛꎼꈜꈴꇬꄡꐺ，
ꑞꃅꆏ，ꉪꈫꉪꇋꁮꐚꂗꍵꆗꐥꀕ，ꊽꐬꆠꑓꆠꏽ。
26 ꉠꉹꁌꊈꀋ！ ꃆꁁꃢꈜꈚ，ꈑꆠꈬꇬꄉꂃꄡꑟ。
ꐒꇁꊀꄉꀋꃀꌺꄂꌦꌠꌟꃅꉩ，
ꑞꃅꆏ，ꀑꇬꈔꋏꌠꋋꇅꃅꇁꉪꌶꂯꄉꀐ”ꄷ。
27 ꑳꀊꊆꉠꏯ：“ꉢꆏꁳꉠꉹꁌꈧꌠꎖꉺꄉ，
ꀋꇊꆏꎷꏸꌠꌟꃅ，ꋀꃅꐨꑽꑌꈍꃅꐙꌠꎕꑣꎻ。
28 ꋀꊇꆸꉈꆽꁁꇨ，
ꌞꊂꍍꋉꄸꄀꐺꇬꎷ。
ꋀꊇꆹꐮꌋꆀꎸꅍꌡ，ꐯꇯꀜꅐꌐꀐ。
29 ꒊꆱꃆꄔꂡ，ꍩꂷꋌꃚꐯ，
ꀱꇉꀱꃅꏷꑌꀈꈥꏸ，
ꑞꃅꆏ，ꀉꀜꀊꇁꈧꌠꏸꇬꀋꎭꑴꌦ。
30 ꌞꊿꆹꀋꎪꃅꋀꏭꊿꍞꇫꎭꌠꐎꏷꀜꈨꉬꄷ，
ꑞꃅꆏ，ꋀꊇꆹꑳꀊꊆꇱꇤꇫꎭꀐ”ꄷꉉ。