ꑱꌏꑸꄯꒉ 61

ꈭꋏꇁꌠꅇꃅꅇꌒꄜꉺ

1 ꌋꑳꀊꊆꒌꇁꉠꇭꀧꌵ，

ꑞꃅꆏ，ꑳꀊꊆꇁꉡꌐꋉꄉ，

ꉢꁳꅇꃅꅇꌒꄜꌢꎭꌟꁧꌠꇰꎻ，

ꉢꋌꁆꌌꉌꐒꇁꎭꌠꉌꏹꑓꏹꇁꎻ，

ꉢꁳꊿꁮꌊꁧꈧꌠꁌꄝꀐꄷꄛꇰꎻ，

ꐒꄉꈄꄉꈧꌠꄿꐨꊌꀐꄷꄜꉺꎻ；

2 ꉢꁳꑳꀊꊆꑆꊋꃅꈎꄛꇰꇁꎻ，

ꏃꃅꌋꁮꐚꄷꋪꒃꌠꃅꑍꄜꉺꇁꎻ；

ꉢꁳꊿꈁꐒꈁꊀꈧꌠꉌꌒꄀꇁꎻ，

3 ꑭꉢꇓꈓꊿꉌꐒꇁꎭꈧꌠꆹ，

ꀂꏾꈑꆠꀋꇗꃅ，ꄂꌆꀍꄟꅑꇁꀐ，

ꉌꂵꀋꐒꀋꊀꃅ，ꉌꇿꒀꒉꌎꇁꀐ，

ꄸꈐꉌꃀꀋꊰꃅ，ꉙꍗꃢꎔꈚꇁꀐ，

ꋀꊇꆹꊿꇬꏭ “ꑖꉬꌠꌩꁧ”ꄷ，

ꋋꆹꑳꀊꊆꊪꄉꌠ，

ꌌꋍꊨꏦꀑꒉꑊꒉꄀꂿꄷꌠꉬ。

4 ꋀꊇꆹꀋꎪꃅꄉꃄꅉꀊꉗꃅꈥꅐꀜꅐꀐꌠꋈꀱꇁ，

ꀋꉊꂴꏭꊿꀋꋦꃮꀋꀆꅉꈧꌠꋈꄻꇁ，

ꇓꈓꀉꑌꋊꃅꀜꐡꆿꐢꀐꈧꌠꋈꀱꇁ。

5 ꀊꋨꄮꇬꆏ，ꌞꊿꆍꊇꇬꀋꌧꌠꆍꑿꀨꎹ、ꆫꉘꇁ；

ꉇꉻꊿꑌꀋꎪꃅꆍꎁꃅꋙꊪꒉꏽ，

ꆍꎁꃅꑌꃀꌧꊈꉻꈫꀨꎹꇁ。

6 ꄚꌞꊿꆏꆍꏭ“ꑳꀊꊆꆦꑝꊿ”，

“ꉪꏃꃅꌋꁏꐚ”ꃅꄉꇴ。

ꌞꇩꏤꎆꋚꈧꌠꀋꎪꃅꇁꆍꌬꅍꈧꅍꐛ，

ꆍꊇꆹꋀꁨꇐꄉꇐꈧꌠꇁꆍꃤꐛꄉꈌꒉꌠꉬ。

7 ꑞꃅꆏ，ꆍꊇꋌꃀꑊꏦꎲꄏꅗꑴꇬ，

ꀃꑍꆏꌒꃤꋊꀱꑍꃅꊌꀐ；

ꆍꊇꋌꃀꎲꅐꁁꅐꋺꑴꇬ，

ꀃꑍꆏꆍꈁꊌꌠꐛꅹꃅꉌꇿꑓꇿꀐ，

ꑠꅹ，ꆍꊇꆹꆍꊨꏦꃅꄷꄉꁨꇐꄉꇐꋊꀱꑍꃅꊌ，

ꐩꋊꐩꍂꃅꉌꇿꑓꇿꑠꆍꊌꌠꉬ。

8 ꑞꃅꆏ，ꉢ-ꑳꀊꊆꆹꊒꆽꀕꌠꉌꃹ，

ꊿꇏꊾꑣꌠꌋꆀꄸꃅꅠꑽꌠꌁꑷ；

ꉡꆹꀋꎪꀋꎙꃅꄉꈁꁠꄻꉠꉹꁌꁵ，

ꋀꌋꆀꏤꐪꐩꋊꐩꍂꄻꀋꀱꏢꒃ。

9 ꋀꊂꋊꆹꀋꎪꃅꂓꅑꄉꇩꏤꈀꐥꌠꃅꈨꈴ，

ꋀꌺꇖꆹꐧꇁꃰꊿꃅꇬꌥꌐ；

ꊿꋀꌋꆀꐮꂿꋺꈧꌠꆏ，ꀋꎪꃅ‘ꋀꊇꆹꑳꀊꊆꋬꂻꄻꋀꇖꌠꉹꁌꉬ’ꃅꉉꌐ。

10 ꉡꆹꑳꀊꊆꐛꅹꃅꉌꇿꑓꇿꌐꀋꉆ，

ꉠꉌꂵꑌꏃꃅꌋꐛꅹꃅꉌꈯꑓꈜꏽ，

ꑞꃅꆏ，ꋋꆹꈭꋏꑆꊋꋌꄻꃢꈜꃅꉢꇢ，

ꑖꉬꑌꋌꄻꀂꄂꃅꉢꇢ，

ꀋꇊꆏꌐꃶꀍꄟꀊꏀꅑꂷꌡ，

ꑮꃀꀊꏀꅑꃚꅑꅺꅑꂷꌡ。

11 ꃄꅉꈍꃅꄉꅿꁮꁳꅿꇁꎻ，

ꉻꈫꈍꃅꄉꇗꂷꁳꅿꇁꎻꆏ，

ꌋꑳꀊꊆꑌꑠꃅꄉꑖꉬꌋꆀꍖꀴꑠꁳꇩꏤꈀꐥꌠꈬꄔꄉꅐꇁꎻꌠꉬ。