ꑳꇊꌒꇌꊁꇁꋍꑍꀑꒉꑊꒉꊌꇁ
60
1 ꄓꇁ，ꁤꇅꀕꇁ！ ꑞꃅꆏ，ꅽꁨꑭꇫꑟꇁꀐ！ꑳꀊꊆꀑꒉꑊꒉꁤꇅꀕꃅꇁꆏꌶꀐ。
2 ꇬꉚ！ ꆈꋧꋪꌠꇁꃄꅉꄩꉱ，
ꆈꏸꀕꌠꐧꇁꃰꊿꋌꂄꄉ，
ꄚꑳꀊꊆꆹꀋꎪꃅꄓꌊꁤꇅꃅꇁꆏꁦ，
ꋍꀑꒉꑊꒉꑌꅽꇭꀧꇬꄉꇫꅐꇁ。
3 ꇩꏤꈀꐥꌠꃅꅽꁨꑭꇂꃴꐥꇁꌐ，
ꃰꃅꈀꐥꌠꃅꅽꏁꌬꀕꌠꁨꑭꈬꇬꐥ。
4 ꆏꀑꐕꀊꈬꀊꇋꉜ，
ꉹꁌꈀꐥꌠꃅꅽꄹꏓꇁꌐ。
ꅽꌺꈧꌠꈜꎴꃅꄷꄉꇁ，
ꅽꀋꃋꈧꌠꑌꊿꄌꂣꈐꊐꌊꇁ。
5 ꋍꑠꆏꊌꂿꇬꆏ，ꆎꆹꀑꑊꁤꇅꀕ，
ꅽꉌꂵꇿꐯꇿ，ꇯꑌꆏꋌꇰ；
ꑞꃅꆏ，ꎿꃀꅶꁉꏯꎆꋚꀋꎪꃅꇁꅽꃤꐛ，
ꌞꇩꏤꁨꇐꑌꇁꅽꃤꐛ。
6 ꁖꅖꉼꃀꋍꊈꋍꊈꃅꄉꇁ，
ꂰꄆꌋꆀꑳꃔꃅꄷꁖꅖꉼꃀꀄꊭꈧꌠꅽꃄꅉꃅꋌꉱꄉ，
ꏂꀠꊿꑌꀋꎪꃅꏂꅪꌋꆀꅿꉗꌒꋌꑠꌞꌌꆏꁳꇁ，
ꉈꑴꑳꀊꊆꍖꀴꌠꅇꂷꑠꄜꁊ。
7 ꏸꄊꃅꄷꑌꑿꈀꐥꃅꇁꅽꄹꏓꌐ，
ꆀꀠꒄꃅꄷꑻꇅꊿꌌꆏꁳꇁꇈ，
ꆏꌞꆦꑝꅉꇬꅞꄉ，ꉢꉌꇿꃅꇫꊪ。
ꉢꀋꎪꃅꀑꒉꑊꒉꄻꉠꑷꂿꂶꌠꄀꄉꀊꅰꃅꁤꇅꀕꎻ。
8 ꃅꄂꌟꃅꐙꃰꏿ、ꄤꆳꌟꃅꐚꈋꀧꏭꉜꄉꇁꈧꌠꆹꈀꄸꉬ？
9 ꊿꎿꅔꇬꀀꈧꌠꃅꉡꇁꉚ，
ꄣꏂꃅꄷꆳꂾꈧꌠꂴꐊꄉꈜꏁ，
ꅽꌳꃈꅮꌋꆀꋀꐎꏂꈧꌠꈜꎴꃅꄷꄉꋀꏦꌊꇁ，
ꋍꑠꆹꑱꌝꆀꌃꎔꂶꌠ、ꑳꀊꊆ-ꅽꏃꃅꌋꂓꐛꅹꉬ，
ꑞꃅꆏ，ꋋꆹꀑꒉꑊꒉꋌꄻꆏꄀꀐ。
10 ꉇꉻꊿꅽꇓꈓꇓꉻꋈꄻꇁ，
ꋀꃰꃅꈧꌠꑌꀋꎪꃅꅽꎁꃅꌤꃅꇁ，
ꉢꋌꃀꇨꇅꃃꄉꆎꇇꇩꍈꋺ，
ꄚꀃꑍꋋꄮꆏꉌꆓꑌꄉꆎꎭꃅꉈ。
11 ꅽꇓꈓꄇꂿꆹꀋꎪꃅꁉꄉꇬꎷ，
ꑍꇁꌋꀋꐥꃅꁉꄉ，
ꊿꁳꌞꇩꏤꎆꋚꑠꌌꆏꁳꇁꎻ，
ꋀꃰꃅꈧꌠꑌꊿꏃꅽꄹꇁ。
12 ꇩꏤꅽꎁꃅꌤꀋꃅꌠꆹꀋꎪꃅꈔꑍ，
ꇩꏤꀊꋨꈨꆹꈍꃅꑌꀜꐡꆿꐛꁧ。
13 ꆀꀠꇍꋦꌠꌩꎔꇓꃨꄮꁧ、ꌿꁧ、ꀠꆿꐯꇯꇁꅽꃤꐛꄉ，
ꆏꌌꉠꑷꂿꋥꅉꇬꇏꑳ；
ꉡꑌꉠꑭꁆꀕꄔꈀꋉꅉꁳꀑꒉꑊꒉꊌꎻ。
14 ꊿꆎꆽꍅꈧꌠꆹ，ꋀꌳꃈꅮꀋꎪꃅꅽꂾꀑꃈꄚꇁ，
ꊿꆏꉚꄸꈧꌠꆏ，ꀋꎪꃅꅽꑭꁆꂾꄉꁡꊭꃅꇴꄂꄉꀍꃈꄚ。
ꋀꊇꅽꏯ“ꑳꀊꊆꃤꇓꈓ”ꄷ，
ꅽꏯ“ꑱꌝꆀꌃꎔꂶꌠꃤꑭꉢꇓꈓ”ꃅꉉꌠꉬ。
15 ꆏꋌꃀꊿꍞꇫꎭ，ꊿꆎꌂꆎꑷꋺ，
ꄷꀋꁧꊿꂷꂯꅽꄹꈴꇁꌠꀋꊌ，
ꄚꉡꆹꆏꁳꐩꋊꐩꍂꃅꀑꒉꑊꒉꊌꎻ，
ꆏꁳꋍꋏꇈꋍꋏꃅꇁꊽꉌꇿꑓꇿꅍꐛꎻ。
16 ꆎꆹꌞꇩꏤꈧꌠꇌꑍꏶ，
ꃰꃅꈧꌠꀉꆂꄻꆏꄎ。
ꀊꋨꄮꇬꆏ，ꉢꑳꀊꊆꆹꅽꈭꋏꌋ、ꆏꋊꆎꁌꌋꂶꌠ、ꑸꇱꄰꀋꄐꅍꀋꐥꂶꌠꉬꌠꆏꅉꐚꇁꌠꉬ。
17 ꉡꆹꏂꉢꌌꐯꎃꊐꇁ，
ꐎꉢꌌꎸꅍꎃꊐꇁ，
ꐯꉢꌌꌩꎃꊐꇁ。
ꎸꅍꉢꌌꇓꂵꎃꊐꇁ。
ꉡꆹꄮꐽꁳꇁꅽꌟꒉꌠꂠꄻꎻ，
ꑖꉬꁳꇁꅽꏲꌋꂠꌋꐛꎻ。
18 ꅽꇩꏤꇬꌤꆿꊋꒉꊋꁧꅷꑠꈨꀋꇁꀐ，
ꅽꃅꄷꑌꌤꆿꀜꐆꌠꌋꆀꈔꋏꌠꈨꀋꇁꀐ。
ꅽꇓꉻꏭꌠꆏꄻ“ꈭꋏ”ꂓꄉ，
ꅽꄇꂿꁬꌠꆏꄻ“ꍖꀴ”ꂓꄉ。
19 ꂵꆪꉘꁮꑭꁳꅽꁨꑭꃅꎻꄻꀋꅐꀐ，
ꈊꃀꆧꁨꊛꑭꁳꆏꁦꎻꄻꑌꀋꅐꀐ，
ꑞꃅꆏ，ꑳꀊꊆꐩꋊꐩꍂꃅꅽꁨꑭꄻ，
ꅽꏃꃅꌋꇁꅽꀑꒉꑊꒉꐛꀐ。
20 ꅽꉘꁮꆹꈢꆈꃹꀋꁧꀐ，
ꅽꆧꁨꑌꑍꀋꁧꀐ，
ꑞꃅꆏ，ꑳꀊꊆꐩꋊꐩꍂꃅꅽꁨꑭꄻ。
ꅽꐒꊀꌠꃅꑍꀋꎪꃅꈢꋒꁧ。
21 ꅽꉹꁌꈀꐥꅉꃅꑗꊿꐛꌐ，
ꃄꅉꐩꋊꐥꍂꃅꇁꋀꁍꑗꄉꈁꐛ；
ꋀꊇꆹꉢꊪꄉꌠꌩꆧ，ꉠꃅꐨꇇꊂꉬ，
ꌌꄉꉠꀑꒉꑊꒉꄀꂿꄷꌠꉬ。
22 ꊿꇬꀁꑌꌠꇁꊿꋅꈀꄿꀕꁯꐛ，
ꊋꁧꌗꁧꌠꇁꇩꏤꈀꇨꇧꂷꐛ。
ꃅꑍꄮꈉꑞꄮꇬꆏ，ꉢ-ꑳꀊꊆꆹꇤꐳꃅꌤꋍꑠꉢꃅꐛꇁꌠꉬ。