ꑱꌏꑸꄯꒉ 50

ꑱꌝꆀꑽꃤꌋꆀꅇꃅꅲꌠꁏꐚ

1 ꑳꀊꊆꑠꃅꉉ：

“ꆍꀉꂿꉢꊐꇫꎭꀐ，

ꋍꃜꇽꄯꒉꁬꌠꇿꇬꎍ？

ꆍꊇꉢꃷꎝꉢꁭꌠꌌꁈꑞꂷꁵ？

ꇬꉚ！ ꆍꊇꉢꃷꇫꎭꌠꆹ，ꆍꊨꏦꑽꃤꐛꅹꉬ；

ꆍꀉꂿꉢꊐꇫꎭꌠꆹ，ꆍꊇꃅꑽꏿꑽꒉꄸ。

2 ꉢꇀꄮꇬ，ꑞꃅꊾꂷꇬꀋꐥꌠꉬ？

ꉢꇳꍝꄮꇬ，ꑞꃅꊾꂷꉠꅇꀱꌠꀋꊌ？

ꉠꇇꀁꎴꇨꄉꆍꈭꋏꀋꄐꅀ？

ꉢꊾꈭꋏꄎꌠꊋꃤꀋꐥꅀ？

ꇬꉚ！ ꉢꋍꏭꊨꀖꄷꌦꆏ，ꎿꃀꀊꃶꀐ；

ꒊꃀꒈꌺꉢꄻꇈꈬꅔꈋꐛꄉ，

ꒉꇬꉛꈧꌠꒉꀋꊌꃅꄉꌦꌐ，ꍹꅿꏢꅿꇧꁠ。

3 ꆈꋧꋪꌠꉢꄻꃢꈜꃅꄉꃅꃴꈧꌠꇢ，

ꃆꁁꉢꄻꋀꉱꅍꃅꄉ”ꄷ。

4 ꌋꑳꀊꊆꆹꊿꉗꊿꂘꌠꉐꆂꋌꄻꉡꇖꄉ，

ꉢꁳꈍꃅꅇꂷꉐꂷꌊꊿꐙꄏꌍꆜꌠꊋꁧꄏꌠꅉꐚꎻ。

ꌊꆹꋍꑍꋑꀋꋒꃅꄜꀕꄷꉢꋌꀀꄖꎼꇁꇈ，

ꉠꅳꀧꋌꁉꄉ，ꉢꁳꌶꌺꂷꌟꃅꅲꎻꇬꎷ。

5 ꌋꑳꀊꊆꆹꉠꅳꀧꋌꁉꄉꀐ，

ꉢꇬꀋꁏꇬꀋꑣ，ꎞꉈꑴꑌꀋꁧ。

6 ꊿꉠꇱꄓꅥꇬꑌ，ꉢꈁꏾꃅꄻꇬꁳꅥꎻ，

ꊿꉠꂴꊨꍠꇬꑌ，ꉢꈁꏾꃅꄻꇬꁳꍠꎻ；

ꊿꉡꍍꋉꄸꄀ，ꊫꃺꁐꉢꉖꇬꑌ，ꉢꈁꑓꀋꉱ。

7 ꌋꑳꀊꊆꀋꎪꃅꉡꇇꀤ，

ꑠꅹ，ꉡꆹꎲꄏꑊꏦꅍꀋꐥ。

ꉠꀑꑊꇓꈯꌟꃅꇨ，

ꑠꅹ，ꉡꆹꈍꃅꑌꎲꀋꅐꁁꀋꅐꌠꉢꅉꐚ。

8 ꉠꏯꑖꉬꄷꂶꌠꆹꇁꌊꉠꏢꁮꑟ；

ꈀꄸꂷꉠꊂꅇꎹꐺ？

ꉪꊇꋍꈜꄉꐮꈌꊪꇁ。

ꈀꄸꂷꉠꄹꃆꏈꑘꏈꇁ？

ꋌꁳꁨꇁꎻ！

9 ꇬꉚ！ꌋꑳꀊꊆꆹꀋꎪꃅꉡꇇꀤ，

ꈀꄸꂷꑽꃤꋌꏤꉢꁳꄎ？

ꇬꉚ！ꋀꊇꆹꃢꈜꌟꃅꀅꌳꀅꌳꃅꀉꁘꆼꈘꁧꇈ，

ꁯꑌꇱꇣꋠꌐꌠꉬ。

10 ꆍꊇꈬꄔꇬꑳꀊꊆꁌꒉꏦꃪꇈ，

ꋍꁏꐚꅇꃅꉐꃅꅲꌠꈀꄸꂷꐥ？

ꊿꁨꑭꀋꂿꃅꆈꋧꋪꅉꇬꐥꌠꆹ，

ꑳꀊꊆꉘꇉꄡꑟ，ꊨꏦꏃꃅꌋꊫꁱꄡꑟ。

11 ꄚꆍꊇꃆꄔꏦ、ꄔꊏꄔꌌꊨꏦꈭꇍꇊꄉꈧꌠꆹ，

ꁨꆍꊨꏦꃆꄔꌋꆀꄔꋒꁨꑭꇬꐺꇬꎷ！

ꉡꆹꆍꎁꃅꋍꑠꉢꄐꏤꄉ：

ꆍꊇꀋꎪꃅꎭꇂꅦꇨꈬꇬꀀꌠꉬ。