ꏃꃅꌋꆹꑱꌝꆀꊿꋌꌋꌊꋍꁏꐚꃅꄉ
49
1 ꎿꅔꈧꌠꀋ！ꉠꅇꂷꅲ！ꈜꎴꃅꄷꀀꌠꉹꁌꊈꀋ！ ꋓꉪꁨꄉꅲ！
ꉢꀉꂿꀃꃀꇬꀀꑴꌦꇯꆐ，ꑳꀊꊆꉢꋌꌊꄻꄉꀐ；
ꉢꀉꂿꒆꎼꇁꄷꌦꆏ，ꋌꉠꂓꇴꀐ。
2 ꋌꉠꈂꀸꁳꅅꃅꄧꑠꀸꌡꎻ，
ꉢꋌꂁꋍꇇꈐꊐꄉꉡꀧꌋꃅ；
ꋌꉢꁳꉈꂷꏠꂰꑳꀕꑠꏢꐛꎻ，
ꉢꋌꂁꉈꊐꐣꁙꇬꊐꄉ；
3 ꋌꉠꏯ：“ꆎꆹꉠꁏꐚꑱꌝꆀꉬ，
ꉢꀋꎪꃅꅽꇇꄧꈴꄉꀑꒉꑊꒉꊌꌠꉬ”ꄷ。
4 ꄚꉡꆏ：“ꉢꐙꄏꌍꆜꃅꑘꁨꄷꑌꀈꈥꀕ，
ꉢꈏꇤꊋꇤꇬꑌꂿꄐꍈꀋꐥ。
ꉠꊒꆽꀕꐨꆹꑳꀊꊆꇇꈐꀀ，
ꉠꈁꁠꆹꉠꏃꃅꌋꄷꎍ”ꄷ。
5 ꀋꃅꑳꀊꊆꄹꇬ，ꉢꋌꄻꀉꂿꀃꃀꊐꄉꄮꇬꇯꆐ，ꋌꌌꋍꁏꐚꃅꄉꀐ，
ꑠꃅꄉ，ꑸꇱꁳꏮꋍꄷꇁꎻ，
ꑱꌝꆀꊿꁳꋍꄷꏓꇁꎻꄷ。
ꑳꀊꊆꆹꉢꋌꉜꌊꐤꒉꌠꃅꄉ，
ꉠꏃꃅꌋꆹꉠꊋꃤꉬ。
6 ꋌꉠꏯ：“ꆏꉠꁏꐚꄻꄉ，
ꑸꇱꑭꊂꃣꉻꈧꌠꁳꉈꑴꌄꆣꇁꎻ，
ꑱꌝꆀꊿꇫꋒꇈꈧꌠꁳꀱꇁꎻ；
ꄚꋍꑠꆹꊵꑵꍈꀋꌗ，
ꉢꉈꑴꆏꁳꀉꁁꇩꏤꈧꌠꁨꑭꄻꎻ，
ꆏꁳꉠꈭꋏꑆꊋꄜꁊꌊꃅꋮꆸꈈꑟꎻ”ꄷ。
7 ꈭꋏꌋꑳꀊꊆ-ꑱꌝꆀꃤꌃꎔꂶꌠꆹ，
ꊿꇬꉚꄸ、ꊨꏦꇩꏤꊿꈧꌠꇫꌂ、ꏲꌋꂠꌋꈧꌠꌌꁏꐚꃅꊪꂶꌠꏭ：
“ꃰꃅꈧꌠꆎꂿꑲꆏꄓꇬꉆꌐ，
ꌟꒉꌠꂾꈧꌠꅽꂾꄉꀍꃈꄚꇁ；
ꋍꑠꐯꇯꀋꎪꀋꎙꌠꑳꀊꊆ、
ꆎꌊꄻꌠꑱꌝꆀꌃꎔꂶꌠꐛꅹꉬ”ꄷꉉ。
8 ꑳꀊꊆꑠꃅꉉ：
“ꄻꈴꄮꇬꆏ，ꉢꈌꁧꆏꁳ；
ꈭꋏꄹꉇꆏ，ꉢꆎꇇꀤꇁ。
ꉢꆎꀧꌋꃅ，
ꅽꇇꄧꈴꄉꉹꁌꌋꆀꏤꐪꒃꄉ，
ꃅꄷꀊꋩꈚꁳꀱꌄꆣꇁꎻ，
ꊿꁳꃅꄷꈥꅐꀜꅐꀊꋩꈚꌌꋀꁍꑗꄉꈁꃅꎻꂿꄷꌠ。
9 ꆏꊿꈢꇬꊎꄉꈧꌠꏭ：‘ꁖꇁꌶ！’ꄷ。
ꊿꆈꋧꋪꅉꇬꐥꈧꌠꏭ：‘ꅐꇁꌶ！’ꄷ。
ꋀꊇꆹꈭꈢꈜꈢꀋꎪꃅꋠꅍꅝꒉꊌ，
ꉘꁌꌃꀠꀟꅉꈳꑌꀋꎪꃅꋠꅍꊌꌠꉬ。
10 ꋀꊇꆹꂮꀋꐚꒉꀋꌤ，
ꑬꊸꅩꌬꌫꑌꋀꀋꆗꋀꀋꃪ；
ꑞꃅꆏ，ꋀꎭꃅꉈꂶꌠꆹꀋꎪꃅꄉꋀꏃꂠ，
ꋀꊇꋌꏃꒉꐬꏢꁮꑟꌠꉬ。
11 ꉢꀋꎪꃅꁦꀑꁧꄩꄉꈝꃀꀺ，
ꄇꈜꀊꐯꌠꐼꄻ。
12 ꇬꉚ！ꋀꊇꆹꈜꎴꃅꄷꄉꇁ；
ꋍꈨꆏꒈꀑꏭꄉꇁ，ꋍꈨꆏꁮꐚꏭꄉꇁ，
ꉈꑴꋍꈨꆏꑝꆀꄉꇁ”ꄷ。
13 ꃅꃴꀋ！ ꇳꉔꄡꑟ！
ꃄꅉꀋ！ ꉌꇿꄡꑟ！
ꁦꀑꈧꌠꀋ！ ꃚꐕꉐꐓꄉꉙꑵ！
ꑞꃅꆏ，ꑳꀊꊆꆹꋍꉹꁌꉌꌒꄀꀐ，
ꋌꋍꉹꁌꎬꅧꈧꌠꎭꃅꉈ。
14 ꑭꉢꇓꈓꆹ：
“ꑳꀊꊆꉢꋌꇤꇫꎭꀐ，
ꌋꉢꀋꎺꀐ”ꃅꉉ。
15 ꀋꃀꂷꋍꀉꑳꀉꆂꅜꂷꀋꎺꉆꑴꅀ？
ꀉꑳꋌꒆꎼꇀꂷꎭꃅꀋꉈꑵꉬꑴꅀ？
ꀋꃀꋍꀉꑳꀋꎺꌠꐥꄷꑲꑌ，
ꉡꆹꆏꀋꎺꇁꀋꉆꌠꉬ。
16 ꇬꉚ！ ꅽꂓꆹꉢꉀꉠꇇꁮꇬꄀꄉ，
ꅽꇓꉻꆹꅉꀕꃅꉠꑓꐛꇁꇬꎷ。
17 ꆎꋉꆎꄻꈧꌠꇤꐳꃅꀱꇁꂯꄉꀐ，
ꆎꐆꆎꀘꈧꌠꀋꎪꃅꆎꐞꁧꌠꉬ。
18 ꆏꀑꐕꀊꈫꀊꇋꊼꇅꉜ，
ꋀꊇꐯꏑꌌꅽꄹꇁꌐꀐ。
ꉢꐩꋊꐩꍂꃅꇫꐥꂶꌠꅇꏤꒃ，
ꋀꊇꀋꎪꃅꆏꌌꅽꅑꃚꅑꅺꃅꄉꌠꉬ；
ꋀꆏꅑꐺꇬꆹ，ꆏꑮꃀꀊꏀꂷꌋꆀꐯꌟ。
ꋍꑠꆹꑳꀊꊆꉉꌠ。
19 ꅽꃅꄷꈥꅐꀜꅐꅉꌋꆀꋀꌌꐅꀘꅉꈚꌠꆹ，
ꀃꑍꋋꄮꆏꀁꐯꇨꄉꅽꉹꁌꀀꀋꇎꀐ，
ꊿꆎꋠꆎꅝꈧꌠꆹꀋꎪꃅꆎꐞꀊꎴꃅꁧꌠꉬ。
20 ꆏꌺꌦꇖꌦꈭꐨꈀꒆꄉꌠꌳꃈꅮꈧꌠꆹꅽꏯ：
“ꃅꄷꋌꈚꀁꐯꇨ，ꀀꀋꇎꀐ，
ꆏꃅꄷꀊꐯꑠꈚꄻꉪꏀꇁ”ꃅꉉꇁꌠꉬ。
21 ꀊꋨꄮꇬꆏ，ꅽꋧꁧꃅ：
“ꉡꆹꌺꌦꇖꌦꈭꐨꆏ，ꌺꒆꇖꉘꀋꄐ，
ꊿꇱꁮꌊꁧꇈ，ꄁꃰꏿꉈꏭꐺꇬꎷꑠꂷ，
ꈀꄸꂷꉠꎁꃅꌳꃈꅮꋋꈨꒆꌠꉬ？
ꈀꄸꂷꋀꋌꀨꎹꆽꃴꌊꀉꒉꌠꉬ？
ꉜꉏ！ ꉢꀉꄂꀕꃅꊿꇤꄚꎭꇈꑠꂷ，
ꀉꑳꋋꈨꇿꅐꇁꌠꉬ？”ꃅꉉꇁꌠꉬ。
22 ꌋꑳꀊꊆꑠꃅꉉ：
“ꇬꉚꄉꅊꇈ！ ꉡꆹꀋꎪꃅꇩꏤꈀꐥꌠꏭꇇꉈ，
ꉠꁈꁧꐕꄩꄉꉹꁌꈀꐥꌠꀨ；
ꋀꊇꆹꀋꎪꃅꅽꌺꋀꄌꂣꈓꊐꌊꇁ，
ꅽꀋꃋꋀꄻꇱꄓꁠꌊꇁꌠꉬ。
23 ꃰꃅꈧꌠꆹꀋꎪꃅꅽꀉꄉꌟꃅꆎꉗꄻ，
ꃰꃅꑮꃀꈧꌠꑌꀋꎪꃅꅽꀉꂿꌟꃅꆎꀨꎹ。
ꋀꊇꆹꀋꎪꃅꇇꑭꃃꇵꀕꃅꅽꏯꀍꃈꄚꇁꇈ，
ꅽꑭꁆꇬꌦꏭꑽꌠꉬ。
ꀊꋨꄮꇬꆏ，ꉡꆹꑳꀊꊆꉬꌠꆏꅉꐚꌠꉬ；
ꉡꇁꉚꌠꆹꈍꃅꑌꎲꀋꅐꁁꀋꅐ”ꄷ。
24 ꌳꈈꌠꇱꇑꑣꌊꁧꌠꆹ，ꇑꌊꉈꑴꇁꄎꑴꅀ？
ꊾꇨꁴꍂꅿꌠꇱꁮꌊꁧꌠꆹ，ꊿꇫꈭꋏꄎꑴꅀ？
25 ꄚꑳꀊꊆꑠꃅꉉ：
“ꌳꈈꌠꇱꇑꑣꌊꁧꌠꉬꄷꑲꑌ，ꇑꌊꉈꑴꇁꉆ，
ꊾꇨꁴꍂꅿꌠꁮꌊꁧꌠꉬꄷꑲꑌ，ꈭꋏꌊꉈꑴꇁꄎ。
ꆎꌋꆀꐮꉈꈽꌠꆹ，
ꉢꀋꎪꃅꋋꌋꆀꐮꉈꈽ，
ꉡꅽꌳꃈꅮꈧꌠꑌꈭꋏꌠꉬ。
26 ꉢꀋꎪꃅꊿꆎꆼꍅꆹꆋꈧꌠꁳꋀꊨꏦꎸꋠꎻ，
ꋀꁳꊨꏦꌦꅝꄉꎧꑱꌠꌡꎻ。
ꀊꋨꄮꇬꆏ，ꐧꇁꃰꊿꈀꐥꌠꃅꉢ-ꑳꀊꊆꆹꅽꈭꋏꌋ、ꌋꆏꋌꇱꋊꌌꇁꂶꌠ、ꑸꇱꃤꄐꅍꈀꇨꀕꂶꌠꉬꌠꀋꎪꃅꋀꅉꐚꇁꌠꉬ”ꄷ。