ꂘꅇꇐꀳ 23

ꑞꅉꐥꃅꎆꎹꋚꈹ

4 ꆏꐙꄏꌍꆜꃅꄉꌣꈚꄡꏂ，

ꀑꁮꅺꐳꃅꄉꑞꅉꐛꅉꐥꌶ！

5 ꆏꑓꌬꀕꃅꍻꎆꋚꀵꄉꇬ，ꎆꋚꋋꇅꃅꐘꀋꈨ，

ꑞꃅꆏ，ꎆꋚꆹꅐꅑꄉ，ꏨꆉꌟꃅꐚꃅꈬꇬꃹꁧ。

ꎧꑱꎸꅸꀋꉆ

19 ꀉꑳꀋ！ꆏꅲꄉ，ꉪꑌꌧꋬꃅꐥꄡꑟ，

ꅽꉌꂵꁳꈭꇁꈛꊒꍬꎻ。

20 ꊿꎧꇢꎧꑱꌠꐊꐺꀋꉆ，

ꊿꎸꇢꇰꋠꏽꌠꐋꃅꀋꉆ，

21 ꑞꃅꆏ，ꊿꎧꇢꎸꇢꇨꌠꌢꎭꇀꎂꀕ，

ꊿꀀꊋꒉꌠꀋꎪꃅꃢꈜꏧꑐꏥꑐꌠꈚꌠꉬ。

22 ꆏꅽꇜꀕꀉꄉꂶꌠꅇꃅꉐꃅꌶ；

ꅽꀉꂿꃀꌠꄮꇬ，ꆏꇬꉚꄸꀋꉆ。

23 ꆏꇗꅉꃶꐚꌠꃼꌊꇁ，ꃷꇫꎭꀋꉆ，

ꌧꅍꂿꅍ、ꉙꅇꂘꅇꌋꆀꊨꄅꀨꄅꐨꑠꑌꎹꈹ。

24 ꑖꊿꀉꄉꆹꀋꎪꃅꉌꂵꇿꐯꇿ，

ꌺꉪꑌꌧꋬꑠꂷꐥꐛꅹꋌꉌꇿꑓꇿ。

25 ꅽꀉꄉꀉꂿꐯꇯꉌꇿꑓꇿꅊꇈ，

ꆎꒆꌠꀉꂿꂶꌠꑌꉌꒉꑓꈩꅊꇈ。

26 ꀉꑳꀋ！ꅽꉌꂵꏮꉢꇯꇁ，

ꅽꑓꋪꑌꋓꉪꁨꄉꉠꈝꃀꉜ。

27 ꎲꃷꃆꅿꆹꃅꐬꉱꀋꅑꌠꉬ，

ꎲꀋꑌꌠꌋꅪꆹꒉꇸꇉꃅꐬꀁꐯꐬꉬ。

28 ꋋꆹꏄꍿꌟꃅꊾꈛꌬꄉ，

ꁦꋠꎲꀋꁨꄏꀋꁨꌠꐤꅉꀉꑌꅉꑟ。

29 ꈀꄸꉮꃤꌸ？ꈀꄸꐒꇁꊀꌠꊝ？

ꈀꄸꏟꃤꏈꃤꐥ？ꈀꄸꅫꏒꅇꂷꉉ？

ꈀꄸꀙꀋꐥꃅꄉꂷꊂꌸ？ꈀꄸꑓꋪꅩꇉꀕ？

30 ꋋꆹꊿꎧꇢꎧꃔꄉ，

ꅉꀕꃅꎧꐯꌼꐮꉔꄉꌠꎹꐺꈧꌠꉬ。

31 ꎧꏸꅩꇅꀕꃅꀞꍗꇬꀀ，ꀋꅝꉈꉩꀕ，

ꅝꀁꋌꊐꇬꑌꁦꉘꀕꑴꇬ，

32 ꄚꊁꆏꋋꆹꁮꏂꌟꃅꆎꄵ，

ꅋꑌꁮꏂꌟꃅꆏꅋꌠꉬ。

33 ꅽꑓꋪꆹꀋꎪꃅꌤꆿꂸꇡꀕꌠꆏꂿꇁ，

ꅽꉌꂵꇬꀋꎪꃅꁍꇑꎴꇉꅇꂷꇫꅐꇁ。

34 ꆎꆹꀋꎪꃅꎾꃝꆈꃃꀕꅉꇬꀀꌠꌡ，

ꅀꎇꆳꂾꌷꁧꀒꁵꇬꎍꌠꌡ。

35 ꆎꆹ：“ꊿꉢꅣꉡꇤꇬ，ꉢꀋꆅ，

ꊿꉢꏶꉢꄁꇬꑌ，ꉢꇬꀋꌋ。

ꉢꈍꄮꑱꁯꆏ，ꈍꄮꀱꉈꑴꎧꎹꅝꁧꑴꌦ”ꃅꉉ。