ꌋꅪꊾꈌꊏꉐꅰꌠꋓꉪꁨ
7
1 ꀉꑳꀋ！ꉠꅇꃅꉐꃅ，ꉠꏥꏦꎺꉌꂵꇬꊐꄉ。
2 ꉠꏥꏦꍬꑲꆏꇫꐥꄎ，
ꆏꅽꑓꋪꇬꑓꂷꂶꌠꀧꌋꃅꌠꌟꃅꉠꂘꅇꍬ。
3 ꉠꂘꅇꉊꅽꇇꏸꇬꁍꄉ，
ꁶꅽꉌꂵꇬꄀꄉ。
4 ꆏꌧꅍꂿꅍꏭ‘ꆏꉠꅫꃀꉬ’ꃅꉉ，
ꊨꄅꀨꄅꏭꏣꑟꃅꇴ，
5 ꋋꆹꆎꀧꌋꃅꄉꆏꁳꌋꅪꋒꀋꌧꑠꋑꈌꀋꎽ，
ꉇꉻꌋꅪꊾꈌꊏꉐꅰꌠꏢꁮꒉꀋꎽꌠꉬ。
6 ꉢꉠꑳꈐꏭꌍꑓꇬꈴꄉꉈꏭꉜꇬꆏ，
7 ꊾꇰꑴꅑꑠꈨꉢꊌꂿ，
ꋀꈬꄔꇬꌠꆗꌧꅍꀋꐥꑠꂷꆏ，
8 ꏦꈜꇬꈴꇈ，ꌋꅪꂶꌠꄰꑶꑐꍬꄉ，
ꌋꅪꂶꌠꅍꉜꄉꆹꀐ。
9 ꋋꆹꉘꁮꈢꆈꃸꄮꇬꆹ，
ꃅꈊꄮꇬꄉꀊꄶꐥꅷꌋꐓꌊꁁꆈꋧꋪꄮꇬꑟ。
10 ꀊꄶꉜ！ꌋꅪꂷꁖꌌꇫꋩꇫꏦꇁ，
ꋋꆹꎲꃷꃆꅿꂷꌟꃅꄻꎳꄉꇈꉌꂵꐈꋓꑠꂷꉬ。
11 ꌋꅪꋋꂷꆹꇫꏟꇫꏈꇬꎷꑠꂷ，ꊿꋋꏢꇋꀋꄐ，
ꉥꑣꃅꀁꇬꑌꀋꐥ；
12 ꋍꇅꋋꇅꆏꏦꈜꇬꏮꐺ，ꋍꇅꋋꇅꆏꈩꅉꐦꀞꐺ，
ꅀꏦꈜꈛꈌꇬꄉꇁꉚꐺ。
13 ꌠꆗꀊꋨꂷꋌꇱꆼꃬꌊꁬꏶ，
ꉈꏠꀋꇮꃅꇬꏭ：
14 “ꉢꄮꇱꆦꑝꅍꌞꀐ，
ꀃꑍꅇꏤꈴꄉꆦꑝꅍꌞꀐa。
15 ꑠꅹ，ꉢꁖꉈꏭꄉꆎꋩꆎꏦꇁ，
ꉢꆏꎷꀕꌋꆀꇧꁠꀋꇊꀐ，ꆏꄚꇬꐥꅊꇈ！
16 ꀀꈤꈈꇉꉢꈈꄉꀐ，
ꈈꇉꆹꉞꏹꃅꄷꃆꑟꌊꌕꅮꋦꃅꍹꄉꌠꉬ。
17 ꉈꑴꃀꒀꁬꋌ、 ꅿꉗꌒꋌ、ꇭꌩꁰꇷꑠꌊꀀꈤꉢꌧꄉꀐ。
18 ꁨꇁ！ꉣꑊꉁꅉꃅꄉꈩꅷꃅꄜꑟꑲꆀ，
ꉌꂵꈁꏾꃅꄉꐯꈽꈩꂿ。
19 ꑞꃅꆏ，ꉠꌐꃶꀁꇬꀋꐥ，
ꋌꉈꏭꈜꎴꃅꄷꁧꀐ；
20 ꋌꎆꃀꋌꄻꐣꁙꊐꌊꁧꀐ，
ꆧꁨꐛꒆꄮꇬꑲꆀꀱꀁꇬꇁ”ꄷ。
21 ꌋꅪꂶꌠꅇꎔꉏꃨꑠꌊꋋꊏ，
ꈌꍚꉏꑐꈩꄉꋌꅰ。
22 ꌠꆗꂶꌠꋋꇅꃅꇫꐊꁧꀐ，
ꀋꇊꆏꇋꏢꇌꌉꈉꇬꉜꄉꁧꌠꌡ，
ꉈꑴꌺꇰꂷꑬꎤꊐꄉꌌꇇꇩꍈꁧꌠꑌꌡ。
23 ꅑꅸꉇꏢꁻꋍꉌꂵꇬꊐꄮꑟ；
ꋋꆹꉌꊭꂷꐚꇁꐱꂦꇬꃹꌠꌟꃅ，
ꋍꀑꇬꄚꄉꆺꌠꋌꇬꀋꌧ。
24 ꀉꑳꊈꀋ！ꑠꅹ，ꆍꊇꀋꃅꉠꅇꃅ，
ꋓꉪꁨꄉꉠꅇꅲ。
25 ꅽꉌꂵꎎꌊꌋꅪꀊꋨꂷꈜꇬꍬꄡꁧ，
ꑬꎪꇇꎪꋍꈭꈜꇬꃹꄡꁧ。
26 ꑞꃅꆏ，ꊿꈍꑋꃅꋌꈔꋏꇫꎭ，
ꊿꋌꌉꇫꎭꌠꀋꃷꎵꃅꐥ。
27 ꋍꀁꇬꆹꌦꊿꐤꅉꃹꁧꌠꈝꃀꉬ，
ꌦꃤꈔꃤꑷꂿꃹꁧꅉꉬ。