ꂘꅇꇐꀳ 6

ꌞꊿꎁꃅꏚꊿꄡꄻ

1 ꀉꑳꀋ！ꀋꄸꄷꆏꅽꐋꀨꎁꃅꏚꊿꄻ，

ꊿꀋꌧꀋꂿꌠꎁꃅꐮꇇꁮꏪꄉꏚꊿꄻꑲꆏ，

2 ꆎꆹꅽꈂꀸꈀꅐꇁꌠꅇꂷꇱꆼꒆꄉ，

ꆏꈁꉉꄉꌠꅇꂷꇱꐒꈄꄉꌠꉬꀐ。

3 ꀉꑳꀋ！ꆏꇁꅽꐋꀨꇇꈐꃹꌠꉬꑲꆏ，

ꑠꃅꄉꃅꑲꆀꅽꊨꏦꈭꋏ：

ꆏꆺꄡꒉꄇꄡꒉꃅꄉꈧꊰꀕꃅꅽꐋꀨꏭꇖꂟꒉ。

4 ꅽꑓꋪꄝꀀꑌꇴꄡꎽ，

ꑓꐴꊋꀋꑌꃅꄉꑋꉞꏿꀋꉆ。

5 ꆎꆹꃪꍶꂷꉆꈹꊿꇇꈐꄉꁈꇁ、ꉌꊭꂷꉌꊭꂦꊿꇇꈐꄉꆶꇁꌠꌟꃅ，

ꅽꊨꏦꈭꋏꑲꆀꍑ。

ꐵꑷꀋꉆ

6 ꐵꑷꌠꀋ！ꆏꁬꃷꃄꄟꑽꄟꊼꇅꉜꑲꆏ，

ꌧꅍꂿꅍꐥꇁꌠꉬ。

7 ꁬꃷꆹꏃꌋꂠꌋꂷꀋꐥ，

ꌟꒉꌠꂾꂷꑌꀋꁨ，ꃰꃅꂷꑌꀋꐥ。

8 ꑠꃅꑴꇬ，ꋀꊇꃅꎸꄮꐰꆏꋚꎷꒉꈹ，

ꒇꋩꄮꐰꆏꋙꊭꒉꄎꇬꊎꄉ。

9 ꐵꑷꌠꀋ！ꆏꀀꅸꈍꄮꑟꌠꉬ？

ꆏꈍꄮꑲꆀꀀꐚꇁꂯ？

10 ꉈꑴꊼꇅꀀꌦ，ꊼꇅꑋꇴꏿꌦ，

ꇇꄻꐯꏍꄉꎇꇬꊼꇅꎌꌦꃅꇬꆹ，

11 ꅽꎭꁮꎭꆱꆹꏄꍿꌟꃅꇫꅐꇁ，

ꅽꀋꇎꀋꂪꅍꆹꊿꇇꌭꇇꂿꌌꂷꌟꃅꅽꏯꇁ。

ꑳꀊꊆꇫꌂꇫꑷꅍ

12 ꊿꄸꌬꍩꀋꐥꑠꆏ，

ꅇꈱꉏꏅꀉꄂꉉꐺꇬꎷ。

13 ꑓꃈꋏꄉꍩꉙꃅ，

ꏸꑭꐕꄉꄐ，ꇇꏸꄖꄉꄂ。

14 ꐈꋓꉌꂵꑌ，ꄸꇁꅠꌠꏂꇫ，

ꊿꊢꊿꀖꀋꇮꆺꌋꀕ。

15 ꑠꅹ，ꑗꉘꉜꅊꇈꆏꇁꋌꌶ，

ꋌꋋꇅꃅꈔꑍꄉ，ꉃꅉꇬꀋꐛꌠꉬ。

16 ꌤꑳꀊꊆꇫꌂꇫꑷꌠꆹꃘꑵꐥ，

ꋍꉌꁕꌠꇱꑲꆏꏃꑵꐥ：

17 ꆺꒉꄇꒉꀏꉜꀋꇁꌠꑓꋪ，

ꅇꈱꉏꏅꌠꉐꆂ，ꊿꅑꑘꀋꐥꌠꌉꌠꇇ，

18 ꄷꅠꌠꌤꆿꏂꇫꌠꉌꂵ，

ꐳꃅꀥꄉꄸꃅꅠꑽꐺꌠꏸꑭ。

19 ꊿꈌꈱꉏꏅꄉꅇꊪꃶꀋꐚꌠꌬꌠ，

ꃺꑌꈬꄔꄉꊿꊢꊾꂖꐺꌠ。