ꂘꅇꇐꀳ 8

ꌧꅍꂿꅍꇁꅇꉉ

1 ꌧꅍꂿꅍꇬꊎꇳꍝꀋꐺꅀ？

ꊨꄅꀨꄅꃚꐓꄉꅇꉉꀋꐺꅀ？

2 ꋌꄇꈜꏢꁮꀊꂥꅉꇬꐺ，

ꈜꏑꈌꇬꉆ；

3 ꋌꇓꈓꄇꂿꏢꁮꇬ，ꇓꈓꄇꂿꁭꑭ，

ꇓꈓꃹꆸꅉꇬꄉꃚꐓꄉꑠꃅꏅ：

4 “ꉹꁌꊈꀋ！ꉢꆍꊇꇴ，

ꉢꃚꐓꄉꐧꇁꃰꊿꏭꅇꉉ。

5 ꌧꅍꀋꐥꌠꀋ！ꆍꊇꀑꁮꉌꑳꌠꌷ，

ꊿꇯꑴꅑꌠꀋ！ꆍꊇꉌꂵꊨꄅꃱꉻꃅꄉꐥ。

6 ꆍꊇꅲꄉ！ꉢꌤꁌꇐꈤꑠꉉꆍꇰꂿ，

ꉢꈌꋊꄉꌤꎃꊒꌠꉉꆍꇰꂿ。

7 ꉠꈂꀸꆹꇗꅉꃶꐚꌠꉉ，

ꉠꂱꀯꆹꄷꅠꌠꌁꑷ。

8 ꅇꂷꉠꈌꇬꈀꅐꇁꌠꃅꄉꑖꉬꌐ，

ꈰꏅꌠꌋꆀꇂꎎꌠꋍꇬꑋꀋꐊ。

9 ꊿꀑꁮꌠꉜꇬꑌꎃꊒ，

ꊿꌧꇐꐥꌠꉜꇬꑌꊒꆽꀕꌠꉬ。

10 ꆍꊇꐎꂷꄡꊪꃅ，ꉠꉙꅇꂘꅇꊪ，

ꏂꌃꄡꈁꃅ，ꌧꇐꂿꇐꈁ。

11 ꑞꃅꆏ，ꌧꅍꂿꅍꆹꇓꂵꁌꇐꈤꌠꏭꀋꋌ，

ꋍꑞꋍꑵꆏꇫꉌꃹꌠꃅꇬꌟꉆꑵꀋꐥ。

12 ꉡꆹꌧꅍꂿꅍꉬ，ꀑꁮꉌꑳꌋꆀꐯꈽꐥ；

ꉈꑴꌧꇐꂿꇐꌋꆀꊨꄅꃱꉻꐨꉢꊌ。

13 ꑳꀊꊆꁌꒉꏦꃪꌠꆹꄷꅠꌠꌁꑷ；

ꉡꆹꆺꒉꄇꒉ、ꀀꁁꊿꀋꐥ、ꄷꅠꌠꃅꐨꌋꆀꊾꊏꊿꉮꅇꂷꉉꌠꈂꀸꑠꌁꑷ。

14 ꉡꆹꏂꇐꇫꇐꌋꆀꌧꇐꐛꒆꌠꐥ，

ꉡꆹꀑꁮꅺꐳ，ꉈꑴꊋꃤꑌꐥ。

15 ꃰꃅꆹꉠꇇꄧꈴꄉꇩꏤꏲꂠ，

ꃰꃅꌹꑌꉠꇇꄧꈴꄉꏥꏦꊒꌠꄻ。

16 ꏃꌋꂠꌋ、ꊿꐤꒉꌠꌋꆀꀞꇽꌟꒉꊒꆽꀕꌠꈀꐥꃅ，

ꉠꇇꄧꈴꄉꌅꈌꌬꌠꉬ。

17 ꉡꉂꌠꆏ，ꉡꑌꋋꉂ，

ꈧꊰꀕꃅꉢꎷꉢꈹꌠꆏ，ꀋꎪꃅꉢꋀꎹꊊ。

18 ꇇꇐꇇꆺꌋꆀꀑꒉꑊꒉꐯꇯꉠꇇꈐꀀ，

ꀊꉗꃅꎍꌠꁨꇐꄉꇐꌋꆀꑖꉬꑌꉠꄹꐥ。

19 ꉠꂶꂷꆹꏂꅪꁌꀋꋌ，ꏂꌃꏭꀋꋌ，

ꉠꅐꇐꆹꐎꌃꏭꀋꋌꃅꄉꁌꇐꈤ。

20 ꉡꆹꑖꉬꈝꃀꍬ，

ꈛꏦꊒꆽꀕꌠꈴ，

21 ꊿꉡꉂꉡꅉꌠꁳꁨꇐꄉꇐꊪꊊꎽ，

ꋀꁨꇐꄉꑳꁳꐛꍣꂨꀕꎻ。

ꌧꅍꂿꅍꆹꇬꂾꇊꇬꂾꇯꆐꄻꄉꀐ

22 ꑳꀊꊆꁍꄻꏃꄻꇬꂾꇬ，

ꀃꌋꀊꆨꐥꇐꈀꐥꌠꀋꄻꑴꌦꇯꆐ，ꉢꇫꐥꀐ。

23 ꀃꌋꂾꀊꆨ，ꇬꂾꇊꇬꂾ，

ꃄꅉꇬꀋꐛꑴꌦꂾꇯꆐ，ꉢꋌꄻꄉꀐꌠꉬ。

24 ꎾꃝꆈꃃꃆꌠꇬꀋꐛꑴꌦ、ꄇꒉꒊꃀꇁꀦꀋꐥꑴꌦꇬꇯꆐ，

ꉢꒆꀐꌠꉬ。

25 ꁦꒉꇈꉬꅉꃀꀋꌆꌦꂾ，

ꁦꀮꌺꇬꀋꐛꌦꂾꇯꆐ，ꉢꒆꀐꌠꉬ。

26 ꀊꋨꄮꇬꆹ，ꏃꃅꌋꃄꅉꌋꆀꁍꑗꀋꄻꑴꌦ，

ꋧꃅꇬꌦꏭꇬꂾꇊꇬꂾꇱꌠꑌꀋꄻꑴꌦ。

27 ꋌꃅꃴꂿꃅꈧꌠꄺꄮꇬ，ꉢꀊꄶꇬꐥ；

ꃅꑆꃄꎸꈪꅉꑴꈜꏢꋌꑴꎿꃀꄩꄀꄉ，

28 ꄩꆹꃅꃴꈀꐯꀕꌠꋌꄻꈫꈈꃅꄉ，

ꀏꆹꅉꃴꆈꉘꉗꅉꒉꐑꋌꄻꇙꀋꑐ。

29 ꎾꃝꎿꋮꄹꌐꋌꄻꄉ，ꎿꒉꁳꆚꄹꌐꐂꁧꀋꎽ，

ꃄꅉꅉꃀꑌꋌꌆꄉ。

30 ꀊꋨꄮꇬ，ꉡꆹꋍꏢꁮꄉꇮꃀꄻ，

ꋍꑍꋑꀋꋒꉌꂵꇿ，ꋍꇅꋑꀋꋒꋍꂾꄉꇿꒉꏽ。

31 ꋍꃄꅉꋋꂷꇬꄉꉌꇿꑓꇿ，

ꐧꇁꃰꊿꈽꄉꉌꈯꑓꈜ。

32 ꀉꑳꊈꀋ！ꆍꊇꀋꃅꉠꅇꅲ，

ꋓꉪꁨꄉꉠꑗꈜꍬꌠꆹꌒꃤꊌꀐ。

33 ꉠꉙꅇꂘꅇꅲꌠꆹ，ꉪꑌꌧꋬꇁꌠꉬ，

ꉠꉙꅇꂘꅇꋍꑠꇤꇫꎭꀋꉆ。

34 ꉠꅇꅲꄉ，ꋍꑍꋑꀋꋒꉠꀃꈈꃀꄳꄉꉜ，

ꉠꀃꈈꁭꑭꄉꇁꉚꇬꎷꌠꆹ，ꌒꃤꐥꀐ。

35 ꑞꃅꆏ，ꊿꉢꋌꎹꊊꌠꆹ，ꀑꇬꋌꎹꊊꌠꉬ，

ꋌꀋꎪꃅꑳꀊꊆꄷꄉꑆꊋꊌ。

36 ꊿꉢꀋꎹꌠꆏ，ꋍꊨꏦꀑꇬꉮꌠꉬ，

ꉡꌂꉡꑷꌠꆏ，ꌦꏾꈔꏾꌠꉬ”ꄷ。