Job 4

Ya nemangulun humang Eliphas nan Job

¹ Immehel hi Eliphas ey kantuy ² “Job, entan tu balaw hedin um-ehellak. Eleg mabalin ni nak pemegga i-ineng.

³ Yan nunman ey hi-gam simmugutugun idan neligatan, ma-lat hi Apu Dios pandinnelan da niya binaddangam ida hu kamanheppul ni baddang. ⁴ Indawtam ni kayyaggud ni tugun ida etan endi namnamah da et petuled mudda. ⁵ Nem yan nunyan hi-gam hu wada ligat tu ey kaka metemman pehding mu. ⁶ Dinaydayaw mu hi Apu Dios niya endi nambahulam. Et humman hu, gullat et, ey e-etteng dinel mu niya namnamah mu.

⁷ Nemnem mu kedi, kaw wada hakey ni kayyaggud ni tuun nekalligatan? ⁸ Hedin ya ngu inamtak, man hedin lawah kapehpehding ni hakey ni tuu, ey lawah dama hu kameippahding ni hi-gatu. ⁹ Ey kabahbahan Apu Dios ni bunget tu hu hanniman ni tuu. ^10-11 Ya hanniman ni tuu ey heni mabunget ni layon ni kaman-elmem ni an menemmak ni animal ni petteyen tu ma-lat kanen tu. Nem hedin naplag hu ngipen tu ey eleg tu han-ipahding huyya et mettey ida impah tun upeda.

¹² Wada neipeamtan hi-gak ni endi hu edum ni nengamta, tep intuttubbu etan ni nanghel ni hi-gak. ¹³ Heni lemam humman e impabsik tu ugip ku. ¹⁴ Ey gimmeneygeyyak ni takut ku. ¹⁵ Entanni ey nelabah dibdib di angah ku ey nebugittak. ¹⁶ Nesiked etan dibdib ey wada inang-ang kun kaman-eh-ehneng, nem eleg meimmatuni. Entanni ey dingngel ku intuttubbu tun hi-gak e kantuy ¹⁷ ‘Kaw wada hakey ni tuun endi liwat tu e kakkayyaggud di hinanggan Apu Dios?’

¹⁸ Tam anin idan anghel di kabunyan et eleg medinnel ni hi-gada. ¹⁹ Et humman hu, kaw kammu nem kamakaddinnel hi Apu Dios di tuun nekapyad puyek e nelakah ni pepditen e henin pappayya? ²⁰ Ya tuu ey anin ni mategun kakkabbuhhan et endi maptek ey netey ni mahmahdem. ²¹ Et humman hu, mettey hu tuu et hi-yanen tu emin limmu tu, et al-en ni edum ni tuu ey eleg tu awatan hu elaw ni neitu-wan tu.