Job 5

¹ Kaw hedin um-ayag ka e Job ni umbaddang ey wada menengngud ni hi-gam? Anin na-mun mampebaddang kaddan anghel et endi um-alin umbaddang ni hi-gam. ² Ikkatey mulli mannuman danag mu niya degeh ni nemnem mu. Hedin hanniman pehding mu ey heni endi nemnem mu. ³ Inenang-ang kudda tutu-un kulang nemnem dan melinggep ida, nem kekemtang ey immali ligat da. ⁴ Et endi linggep ni u-ungnga da niya endi mengi-ehneng ni hi-gadad korteh. ⁵ Et ya law edum ni tuu mengellan ennien da, anin idan kinedangyan da. ⁶ Kaw hipa nalpuan ni ligat hedin beken ni hi-gam metlaing? Amta tayu e eleg umtetmel di puyek, ⁷ tep ya tuu ey neiungnga ngu dedan et manligligat e henin emsin apuy e kametu-ug.

⁸ Heninnuy hu ittugun kun hi-gam: Attu kuma et ehelen mun emin nan Apu Dios eya kameipahpahding ni hi-gamey? ⁹ Tep dakel hu tuka pehding ni eleg tayu han-awat niya endi pappeg ni tuka ippahding ni miracle. ¹⁰ Tuka peelli udan ma-lat madenuman hu papayyew. ¹¹ Hi-gatu mewan hu kamengippeta-gey idan tuun endi bilang tu niya hi-gatu kamengippeamleng idan tuun kaumlelemyung. ¹² Tuka bahbaha planuh idan netalam ni tuu ma-lat mambalin ni endi silbitu. ¹³ Et yadda lawah ni implanuh dan pehding dan edum ni tuu ey kameippahding ngun hi-gada. ¹⁴ Henidda nekulap ni kamandapdapudap ni kawwalwal. Heni hileng ni ingganah ni hi-gada. ¹⁵ Nem yadda newetwet ey hi Apu Dios hu kamengihwang ni hi-gada et eleg ida matey. Ey tudda kabaddangi ma-lat ihwang tuddad kamengippeligligat ni hi-gada. ¹⁶ Hi-gatu kamengidwat ni namnamah idan newetwet niya tuka pappega hu kaippenahding idan lawah ni tuu.

¹⁷ Mebendisyonan etan tuun katuggunan Apu Dios. Et humman hu, entan almet mun kapehding Apu Dios ni menuggun ni hi-gam, ¹⁸ anin hedin kantu et lipputan daka et peyaggud daka mewan. Ey hedin kantu et pedgehan daka ey a-alluken daka kaya. ¹⁹ Baddangan dakan ingganah ma-lat endi lawah ni meippahding ni hi-gam. ²⁰ Ippaptek daka et tumegu ka hedin immali bisil, niya ippaptek daka hedin wada gubat ma-lat eleg ka matey. ²¹ Ippaptek daka ma-lat anin ni mengapkapya tuun bahul mu ey endi kaya an meippahding ni hi-gam ni lawah. Ey anin ni wada memahbah ni hi-gam et baddangan daka et meihwang ka. ²² Eleg ka umtakut ni anggetakkut ni kameipahpahding, anin ni um-ali bisil. Ey eleg ka umtakut idan anggetakkut ni animal di muyung. ²³ Tep endi da pehding ni lawah ni hi-gam. Anin ni payew mu et meendiddalli hu babattu. ²⁴ Melinggep kallid baley mu niya anin idan animal mu et endi hu el-eleg ni meippahding ni hi-gada. ²⁵ Dakel idalli u-ungngam niya henillin kedakkel ni helek di pattullan hu helag mu. ²⁶ Andukkey ali biyag mu et meka-a-amma kalli ey han ka netey, henin pagey e hehgeden ni meka-teng ni han ineni.

²⁷ Makulug ida huyya e Job, tep inenang-ang tayun neipahding. Et humman hu, dengel mu huyyan intugun ku, et ipahding mu.”