Job 3

Ya lilih Job nan Apu Dios

¹ Entanni ey immehel hi Job et lawah hu inhel tu meippanggep ni neiungngaan tu. ^2-3 Kantuy “Apu Dios, endim ew katteg hu aggew ni neiungnga-ak niya hileng ni nengapyaan idan a-ammed kun hi-gak. ⁴ Pambalin mu humman ni aggew ni engeenget et liwwanen mu. ⁵ Ey pambalin mun beken ni pan-am-amlengan humman ni aggew. Hukbungim ni kulput ma-lat eleg mabnangan. ⁶ Ekal mu humman ni hileng et eleg maibilang di toon. ⁷ Pambalin mu humman ni hileng ni endi silbitu niya ang-ang mu et endi man-am-amleng. ⁸ Ehel mudda etan ni maeyak ni wada kabaelan dan mengippebuddal etan ni Lebayatan e anggetakkut ni mategud baybay, ma-lat idutan da humman ni aggew ni neiungngaan ku. ⁹ Entan tu pahyaw etan bittuwen ni kakkabbuhhan niya entan tu pabudal hu aggew ma-lat eleg mewa-wa et mannananeng ni engeenget. ¹⁰ Em, idusim humman ni hileng, tep eleg tu upupen hu talun ina et deh e neiungnga-ak, ey nakka manligligat niya nakka umlelemyung.

¹¹ Kele eleggak ni-ngangu matey ni neiungngaan ku? ¹² Kele tuwak impenaptek e tuwak impainuinuman nan ina di huhu tu et nak netagu? ¹³ Gullat et ngu, ey neteyyak et immen nak ni kamakallinggep ni kaman-i-iyyatu. ¹⁴ Ey nak et ngu kaman-u-uggip di kulung ku e heni-ak ida etan ni papatul niyadda opisyal ni nandingngel tep yadda etta-teng ni bebley ni impebehwat da. ¹⁵ Em, heballi ngu neteyyak et man-u-uggippak et heni-ak ida etan ni netey ni u-ungngan patul e napnu baley dan balituk niya silber, ¹⁶ winu heni-ak ni gelang ni netey ni neiungngaan tu e eleg tu ang-angen hu kawwalwal. ¹⁷ Hedin netey hu tuu, man kamepappeg hu lawah ni tuka pehpehding niya kaman-iyyatu hu neatun tuu. ¹⁸ Anin idan balud et melinggep ida hedin netey ida, tep endi law guwalyan mengibbungnget winu memabba-al ni hi-gada. ¹⁹ Yadda kekeddangyan niyadda nangkewetwet ey immen ida damad kulung. Yadda himbut ey liblih idelaw di kan himbut ni hi-gada. ²⁰ Kele kai-abulut Apu Dios ni an mambi-biyag hu tuun kamanhelheltap e henin hi-gak? Ey kele eleg tu pappega hu biyag ni tuun nemahhig lemyung tu? ²¹ Daka abtui ketteyyan da, nem ayepaw ey eleg ida mettey. Daka pehebballi hu kulung nem ya hipan nebalol ni tenged. ²² Tep endi damengu amleng dad biyag da ingganah ni ketteyyan da. ²³ Kele kapannannaneng nan Apu Dios ni tegguen hu tuu ey endi damengu silbitu, tep endi namnamah tu? ²⁴ Hi-gak katteg ngu ey kan mewan anhan ey mengngannak ey eleg, tep nemahhig lemyung ku niya nakka umpalapalak. ²⁵ Emin hu nakka tattakusi ey neipahding tu-wangun hi-gak. ²⁶ Endi katteg linggep ku niya endi iyyatuk. Nemahhig ligat ku e endi pappeg tu.”