4
Narman hitay piˈtakhuwan ta-o an namati
1 Hi Kristo ja nalikhatan hichin niˈtakhuwana heto lota ja natoy, hotti meˈhakhana aju khu an miˈlikhat. Amat hi ne-etoy aju ay Kristo hotti tenaynan ju chin napukhit an ugali ju. Ja hini takhu an nanaynan ay ni napukhit an piˈtakhuwana ja ipatikhaw na an chin-ug nay pfumahulana. 2 Hotti ehakhana ju hini nomnom ju, ta mete-a ad ugwani ja ingkhana hi apogpokhan tay piˈtakhuwan ju ay tay lota, ja chuˈkhon ju hana napukhit an penhod chi achor ta hini podhon Apo Jos chi unuchon. 3 Intakhinonot niˈ chin neˈ-aneˈ-at ju an khun aton hachi agkhuy nanginnila ay Apo Jos. Hotti ammunana hato nalukhit an piˈtakhuwan ja umipapfa-in an penpenhod chi achor, ja hana pfinutong, ja hana lumapoh an an-anlan tay achor, ja hini pundayawan hi achi umannung an jos an pumaˈ-i ay ni urchin Apo Jos. 4 Hachi numpun-ibpfa ju ja achi cha ma-awatan nu anagkha ta empokhong ju an midchum ay chicha an mangat hachi akhakhaˈ-ihaw. Hijaot un chaˈju pipillohon. 5 Muti hongpfatan cha ay Kristo hay hato khun cha aton, ti nehnot chin panugijana hana mamattakhu ja anong un hana nun-atoy. 6 Ja hijah tay chi khapo na an nekasaba hitay Ebanghelyo hay hana namati an nun-atoy. Natoy chin achor cha ti hijay hortapon an amin chi tatakhu khapo hi pfahor. Muti nitudtuchu ay chicha hitay Ebanghelyo ta miˈtakhu cha hi ma-id chi pogpogna, an amat ay Apo Jos.
Usaron ta-o hana apfalinan an inchat Apo Jos hi oha-ohanna
7 Nehnot chi apogpokhan an amin chi gwah to lota, hotti mahapor an epaphod juy punnomnoman ju, ja khun ju onoˈnongon hay peˈ-at ju ta ehemad juy pungkalalakhan ju ay Apo Jos. 8 Elanna ta achi la-ahna ja ingnganuy ju hini pamhod ju hi oha-ohanna, ti nu mumpepennohhochan aju hot alichuwan ju hana pfimmahulan chi oha-ohanna ay chaˈju. 9 Mun-an-anla aju an mummangili hana namati an narpu hi uchumna an pfuglay. 10 Hana ayya inchat Apo Jos an apfalinan chi oha-ohanna, ja usaron ju an muntitinnolong ta mipfilang aju hi naˈna-unnud an pfaar Apo Jos an khun mangipatikhaw ay ni numpfino-ob-on an sagot na. 11 Hana ayya nichatan hi apfalinan an muntudtuchu, ja achi cha alichuwan an Hapit Apo Jos hini khun cha itudtuchu. Hana ayya nichatan hi apfalinan an tomolong hi tatakhu, ja achi cha alichuwan an hi Apo Jos chi khun mangchat ay ni apfalinan cha an tomolong. Ja an amin chi khun ju aton, tikhan ju ta hi Apo Jos chi pangchatan ju an amin hi dayaw khapo ay Hesu Kristo an nidchuman ju.
Hi Apo Jos chi ma-idaydayaw ja hijay mun-ap-apo hi ma-id chi pogpogna. Amen.
Hay omaˈ-atan chi punlikhatan chi namati
12 A-akhi an penpenhod u, achi aju tomakhaw khapo hay hato nunlinapoh an likhat ju, ti hijah tay chi omaˈ-atana tugwali, ta matopngan hini pammati ju nu nehamad. 13 Hay aton ju koma nu umali chi punlikhatan ja mun-an-anla aju, ti nidchum aju ay Kristo an nunlikhat chin agawwachaana heto lota, hot munnaud chi i ju pun-an-anlaan chin arkhaw an atikhan ni apfalinan ja pfinang na. 14 Akhaˈkhaja hini mapahiw khapo hi pammati ay Kristo ti hini pamahigwan cha ay chita-oy panginnilaan an gwa ay chita-o hini napfagto an Espiritun Apo Jos. 15 Muti nu khulat ta pomatoy aju, wenno omakaw aju, wenno aton juy napukhit, wenno o-ongngohan juy ibpfa juh takhu, ja hijay chumalat hi apalikhatan ju, ja achi maphod hay hato. 16 Hay alloˈ ja nu hini pammati ju ay Kristo chi chumalat hi apalikhatan ju ja achi aju pfuma-in ta un ju gwot dayawon hi Apo Jos, ti nipfilang aju hi tatakhun Kristo. 17 Nete-a gwot ad ugwani hini panugijan Apo Jos hi tatakhu, ja chita-o an pamilya na chi pahhunona ja unot hana uchumna. Hay hato punlikhatan ta-o chi ete-aana, muti munnaˈnaud pay hana ma-at hana achi umunud ay tay Ebanghelyo an impa-innilan Apo Jos. 18 Umannung hitay impatulaˈ Apo Jos hi nangarjana hi, “Anong un hana magpong an tatakhu ja nalikhat hana aton cha an miˈtakhu ay Apo Jos. Hotti un chah hana napfahulan an ngumangannu ay Apo Jos ja miˈtakhu cha?”a 19 Hotti, nu penhod Apo Jos an munlikhat aju, ja etortoloy ju gwot an mangat hi maphod ja impulang ju hini achor ju ay tay Nampfu, ti mapagtarkan hija an mangat an amin ay ni inali na.