2 PETER
Hini omaˈ-atan tay an libju
Hitay an tulaˈ ja intulaˈ Peter an intolong na hana namati ay Hesu Kristo an gwa ay ni provincian chi Asia Minor. Intulaˈ Peter hitay me-aggwa an tulaˈ na ta paˈ-iyona hana khun cha aton an nehahalla ja akhakhaˈ-ihaw an pfungan chi khun itudtuchun hana achi umannung an manudtuchu. Hotti hay tukhuna ja achi cha ay makhujud hay hato an nehahalla ta un cha gwot omot-ottong ay ni aton cha an manginnila ay ni khohkhoh Apo ta-o an hi Hesu Kristo.
Hay khuh oha hi nehahalla an khun cha itudtuchu ja achi anu munpfangngad hi Hesu Kristo ti akamoh an napfajag ja ma-id umali. Hotti intulaˈ Peter an hini khapo na an ahup ja achi munpfangngad ja khapo hi pamhod na hana tatakhu an napfahulan. Ti podhon Apo Jos an ichatan hi timpo an muntutuju cha ta achi cha mamorta ta un cha koma miˈtakhu hi mid pogpogna.
Maphod hitay an tulaˈ ti papfi-ahona hini pammati ta-o an munpfangngad hi Kristo. Ja tihtikhuwona khu an hitay Biblia ja agkhuy narpu hi nomnom chi takhu, ti hana profeta ja hana uchumna an nunhapiton Apo Jos ja hini Espiritu Santo chi nangchalan ay chicha an mangali.