James 2

Punchichipaton hini aton hi tatakhu

¹ Chaˈju an a-akhi an namati ay tay napfagpfagto an Apo ta-o an hi Hesu Kristo, punchichipaton ju hini aton ju hi tatakhu ta ma-id koma chi hay ipfilang ju hi akhaˈkhaja. ² Nu khulat ta mummeha aju ja gway chugwa hi takhu hi umali hi midchum. Pfuher hini lopfong ni oha ja nunhehengheng hi pfalitoˈ, ja hini oha ja napubli an nakhaykhajot chi lopfong na. ³ Ja achi maphod nu allon ay ni achangjan hi, “Maphod ti tayya an immali a, hotti umpfun a ay tay nehakhana an umpfunan,” ja inali ay ni napubli hi, “Tumaˈchug a ay chuy wenno umpfun a ay tay cholong.” ⁴ Napukhit hini amat heto an nomnom ja un chumalat hi achi pun-oh-ohhaan chi namati. ⁵ Chonglon ju akay niˈ hitay, a-akhi an podpodhoˈ! Hana napubli an ma-id mapfalinana heto lota ja pinilin Apo Jos ta ipatikhaw na hini otong an khohkhoh na ay chicha khapo hi pammati cha, ja midchum cha ay ni pun-ap-apugwana. Ti hijah tay chi inali na hi atona hay hana mammamhod ay hija. ⁶ Muti niya an chaˈju ja pumpfa-inan ju hay hana napubli. Ja ngay tugwali khun mamalikhat ay chaˈju, ja ngay khun mangchalom ay chaˈju nu pfu-un hay hana achangjan? ⁷ Chicha khu chi khun munhapit hi mepfohor ay Hesu Kristo an hija hini magpong an Apo an nidchuman ta-o.

⁸ A-akhi, hay maphod hi aton ja unuchon ta-o hitay napfalor an in-urchin Apo Jos hi nangarjana hi, “Podpodhon ju hini padchung ju an takhu an amat ay ni pamhod ju ay ni achor ju.” ⁹ Muti nu achi munchichipat hini aton ta-o hi tatakhu ja pfimmahor ta-o, ti agkhuy ta-o inunud hitay an urchin Apo Jos. ¹⁰ Ti anong un ta-o unuchon an amin hay hana urchin Apo Jos ja gwacha ayya chi oha hi agkhuy ta-o inunud, ja hihiya an intulli ta-o hini urchin Apo Jos ja mahugwi ta-o ay hija. ¹¹ An amat ay tay urchin Apo Jos an achi ta-o umilugtap, ja inali na khu hi achi ta-o pomatoy. Mapfalin an achi ta-o umilugtap muti pemmatoy ta-o ayya ja hihiya an intulli ta-o hini urchina.

¹² Pa-ennongan ju hini hapiton ju ja hini aton ju hi ibpfa ju hi tatakhu, ti anila ju an hugijon chita-o ay Apo Jos an mepognad ay ni in-urchina an aton an miˈtakhu ta mergwang ta-o hay adusaan khapo hi pfahor. ¹³ Ti hitay hini allona, an hini takhu an achi omekhohkhoh ja achi ekhohkhohan Apo Jos ay ni arkhaw an punhugijana. Ja hini takhu an ma-agkhohkhoh ja mun-an-anla, ti ma-id i na tomaˈtan ay ni umali an Punhugijan Apo Jos.

Hini nahamad an pammati ja ipfunga nay maphod

¹⁴ A-akhi, ngay herpfi na nu gway mangali hi namati ay Hesu Kristo muti ma-id ipatikhaw na hi maphod an khuna aton hi padchung na an takhu? Un chah takhuwon Apo Jos hini takhu an amat hina chi pammati na? ¹⁵ Nu khulat ta gway ibpfa hi namati an ma-id pohodna hi peˈlopfong na ja peˈ-ana, ¹⁶ ja ngay inherpfi na nu allom ay hija hi, “Un adniˈ hi Apo Jos chi tomolong ay he-a ta ep-ephod mu an meˈlopfong ja mangan!” muti ma-id oh-ohha hi ichat mu hi tolong ay hija? ¹⁷ Hotti anong un allon hi gway pammati, nu achi midchum hi maphod an khun aton ja ma-id herpfi na.

¹⁸ Unchani ja gway mangali hi, “Hana uchumna ja miˈtakhu cha khapo hi pammati cha ay Apo Jos ja angkhay, ja hana uchumna ja miˈtakhu cha khapo hana maphod an khun cha aton hi tatakhu.” Ja hay alloˈ ay hija ja, “Ngay panginnilaan un nahamad hini pammatin ni ohan takhu nu ma-id midchum hi maphod an khuna aton? Muti ha-in ayya ja ipatikhaw u an nahamad hitay pammatiˈ khapo hana maphod an khun u aton.”

¹⁹ Manu ti pattiyon ju an un oh-ohhay Apo Jos, muti achi omanay hinuy. Ti anong un hay hana napukhit an espiritu ja pattiyon cha ja munggwoggwog cha hi ta-ot cha. ²⁰ Ja he-a an natottot an takhu, ipatikhaw u ay he-a an ma-id pfungan chi pammati an un khun hapiton ja angkhay ja ma-id maphod hi khun aton. ²¹ Nomnomon ta-o akay niˈ nu anagkha ta impfilang Apo Jos hi Abraham hi magpong. Khapo ta inunud na hini inalin Apo Jos an i na patajon hini empfalay na an hi Isaak ta idatona ay Apo Jos. ²² Hotti matikhaw ta-o an muntunud hini pammati na ja chin enat na an nangunud chin inalin Apo Jos. Ti hitay an enat Abraham ja impatikhaw na an nahamad hini pammati na. ²³ Ja impatikhaw na an umannung hitay nitulaˈ an hapit Apo Jos hi nangarjana hi, “Pinatin Abraham hi Apo Jos, hijaot un impfilang Apo Jos hija hi magpong.” Ja impfilang na khuh hi Abraham hi khayyum na. ²⁴ Hotti matikhaw ta-o an achi angkhay hini pammati ja ipfilang chita-o hi magpong, an mahapor an midchum hini maphod an khun aton. ²⁵ Amat khu ay Rahab an putah, an impfilang Apo Jos hi magpong ay chuy enat na an nummangili chin hennag Joshua ja intuchu na hay agwun cha an lomajaw. ²⁶ Amat khu ay tay achor an nakak ayya hini lennagwa ja ma-id ma-at na, ti natoy. Amat hina khu an ma-id herpfin chi pammati an ma-id ipfunga na hi maphod an khun aton.