Hebrews i

HEBREWS

Hini omaˈ-atan tay an libju

Hitay an tulaˈ ja nitolong hana namati an Hudju wenno Hebrew ta pfumi-ah cha hi pammati. Ti cho-or chi likhat cha, ja gwa an inganuy cha hini pammati cha ay Kristo ta munpfangngad cha hana tudtuchun chi Hudju. Hotti hini enat ni nuntulaˈ an mangpapfi-ah ay chicha ja una inpa-innilana hini apfagton Hesu Kristo.

Gwa han tolo an importante an nipa-innila ay tay an tulaˈ an omaˈ-atan Hesu Kristo. Hini mahhun ja hija hini Empfalay Apo Jos hi mid chi pogpogna. Ja khapo ta hijay Empfalay Apo Jos ja napfagpfagto hija mu hana profeta ja hi Moises ja hay hana angher. Me-aggwa ja hini enat Kristo ja napfarpfalor mu hini khun aton chi pachin chi Hudju. Hotti hi Kristo chi nepallog an khun mangtaˈchukhan hi tatakhu ay Apo Jos hi mid chi pogpogna. Me-atlo ja umannung an miˈtakhu hini takhu an mamati ay hija, ti hija hini magpong an daton an namogpog hana ugali ja animal an daton chi Hudju ay Apo Jos.

Hini nuntulaˈ ja ipatikhaw na hini omaˈ-atan chin pammatin hachi Hudju chin nahup, ta hay hato Hudju an namati ay Hesus ja etortoloy cha an mamati anong un munnaud chi icha apalikhatan. Ay ni angonoh tay an tulaˈ ja itukhuna an achi cha ay umachawwi ay Apo Jos ta un cha gwot unuchon hini maphod an piˈtakhuwan an mangchat hi icha pun-an-anlaan.