Titus 2

Hana maphod an itudtuchun Titus

¹ He-a ayya Titus, ja tikham ta ituchum hana meˈ-annolot ay ni umannung an tudtuchu. ² Tukhunom hana lallakay ta pa-ennongan cha ja neˈ-ep-ephod cha hini peˈ-at cha, ta uncha peˈhemad hini pammati ja pamhod cha, ja edpor chay likhat. ³ Ja amat khu hetoy itukhun mu hana pfabpfakit, ta miˈtakhu cha an meˈ-annolot ay ni penhod Apo Jos. Mahapor an achi cha munhaphapit hi apukhitan chi hay ibpfa cha, ja achi cha khun mapfutong. Un chaot ituchu hana maphod an podpodhon Apo Jos ⁴ ta matukhun hana ungunga an pfinapfai ay ni aton an mangpatikhaw hi pamhod cha hana enah-ahagwaan ja empfapfalay cha. ⁵ Ja mahapor an pa-ennongan cha ja magpong chi ugali cha, ja ipanuh chay pfalay cha. Ma-uloy cha ja naˈna-unnud hana enah-ahagwaan cha, ta ma-id chumalat hi pamahigwan cha ay ni Hapit Apo Jos an inunud cha. ⁶ Piˈtukhun mu hana ungunga an linala-e ta pa-ennongan cha hini peˈ-at cha.

⁷ Hotti he-a ja ep-ephod mu an amin chi hay peˈ-at mu ta hijay tuntunchon hana i-ibpfam an tatakhu. Nu muntudtuchu a ja ipatikhaw mu an nehamad ja napfalor hini atom an muntuchu. ⁸ Tikham khu ta an amin hini ituchum ja umannung an achi mapahiw. Nu amat hetoy aton hot pfuma-in hana pumapaˈ-i ay chita-o ti ma-id chi hay allon cha hi hay impukhit ta-o.

⁹ Ituchugwam hana himpfut an namati ta naˈna-unnud cha hi hay allon chi apo cha, ja enep-ephod cha an munserbi. Achi cha hallengpfat ¹⁰ ja achi cha elepfahan hana apo cha, ta uncha gwot ipatikhaw an mapagtarkan cha ja magpong an amin hini peˈ-at cha, ta annilaon ni apo cha an nehamad hini nitudtuchu ay chicha an omaˈ-atan Apo Jos an nanakhu ay chita-o.

¹¹ Ti impa-innilan Apo Jos an amin hi tatakhu hini khohkhoh na ta gway aton cha an miˈtakhu. ¹² Ti hitay an khohkhoh Apo Jos ay chita-o ja hijay pun-achalan ta-o an mahapor an taynan ta-o an amin hana achi meˈ-annolot ay ni podhon Apo Jos ja chuˈkhon ta-o hana napukhit an podpodhon chi achor. Mahapor an khun ta-o onoˈnongon chi peˈ-at, ja magpong ja najusan hini aton ta-o an miˈtakhu ad ugwani an a-adchaan ta-o ay tay lota, ¹³ an panpanochan ay ni arkhaw an pumpfangngachan Hesu Kristo an mamahhod, hija an madayaw an Jos an nanakhu ay chita-o. ¹⁴ Inapfulut nay natajana ta mipfu-aan ta-o hay hana pfahor ta-o ja ta ulahana an amin chi napukhit ay tay piˈtakhuwan ta-o. Enat na hitay ta pumpfalinon chita-o hi tatakhu na an mangpipitti-an an mangat hi maphod.

¹⁵ Hay hato an nun-aliˈ ja ituchum. Achi a mun-okhon ta tukhunom hana namati, ja inhingar muy mangat hi napukhit, ti hi Apo Jos chi nanghaad ay he-a. Hotti tikham ta achi cha ngongohmolon hana allom.