Titus 1

TITUS

¹ Ha-in hi Paul an oha an pfaar Apo Jos ja apostol Hesu Kristo. Piniliyaˈ an mangtudtuchu ay tay Ebanghelyo ta papfi-ahoˈ hini pammatin hana tatakhun Apo Jos an pinili na. Hitay chi nannakhanaˈ ay Apo Jos ta gway aton cha an mangannila ay tay umannung an tudtuchu ta miˈtakhu cha hi najusan. ² Hot annilaon cha an magwachaan cha hi piˈtakhuwan an ma-id chi pogpogna, ti hitay chi ingkarin Apo Jos chin agkhuy pay narmugwan tay lota ja achi munlahlah hija.

³ Ay ni enegpong Apo Jos an timpo ja impa-innila na hitay maphod an tukhun an impulang na ay ha-in ja hija hitay khun u ekasaba, ti hitay chi inalin Apo Jos an nanakhu ay chita-o.

⁴ Tayya an muntula-aˈ ay he-a Titus, an impfilang u hi umannung an empfalay u khapo hi i ta-o nun-oh-ohhaan hi pammati. Hi Jos Ama ja hi Kristo Hesus an nanakhu ay chita-o chi mangkhohkhohan ay he-a ja mangchat hi pomhochan ni piˈtakhuwam.

Hini tamun Titus ad Krete

⁵ Tenaynaˈ he-a hina ad Krete ta etoloy mu an panuhon hana agkhuy mi pay pinanuh an peˈ-at hana namati hina, ja ta unuchom chin inaliˈ an ehaad mu khu hay mangpangpangulu hana namati hi apfuglapfuglay an gwachaan cha. ⁶ Hana ehaad mu an mangpangpangulu ja ma-id koma chi hay i cha apahigwan, ja un henohhay ahagwa cha ja angkhay. Ja hana khu empfapfalay cha ja namati cha, ja achi cha mapahiw khapo hi pangatan cha hana na-inlubungan an pun-an-anlaan, ja achi cha ngumangannu. ⁷ Hini khun mangpangpangulu hana namati ja mahapor an ma-id chi hay i na apahigwan ti hija hini nipulangan ni ipatamun Apo Jos. Hotti mahapor an na-umlong, ja achi mabmapfungot ja achi khun mapfutong, ja achi malilichiˈ, ja pfu-un hay pelaˈ chi mun-o-onan ay ni nomnom na. ⁸ Hay maphod ja mangiliyonay tatakhu, ja gway pamhod na an mangat hi maphod, ja pa-ennonganay atona, magpong chi atona ja nasantuwan ja manomnom. ⁹ Mahapor an khokhotana ja etaˈchokhana hana nehamad an tudtuchu, ta papfi-ahona hini pammatin hana papadchung na an namati, ja ta apfakona hana pumahiw ay ni ituchu na. ¹⁰ Umannung an cho-or hana achi matukhun an khun munhaphapit hi ma-id chi poot na. Un cha allilagwon hana tatakhu, om-omod hachi Hudju an mangali hi mahapor an mumpakugit an amin chi namati, anong un hana pfu-un Hudju. ¹¹ Mahapor an epagwam hay hato, ti un cha allilagwon hana cho-or an pamilya khapo hana nehahalla an khun cha itudtuchu, ja un cha khun pumpihpihuwan chicha.

¹² Gwacha chin padchung cha an eKrete an manomnom an takhu, ja hijay nangali hi, “Hay hato eKrete ja un cha munlahlah, ja hini ugali cha ja hihiya hana atap an animar. Nun-ahachot cha an muntamu muti nahopo cha an mangan.” ¹³ Hitay an inalin tay an eKrete ja umannung. Hotti tikham ta pun-ihingar mu chicha ja intuchugwam chicha ta gway aton hana pammati cha an mepognad hay hana nehamad an tudtuchu. ¹⁴ Allom ta achi cha chodchonglon hana ma-id chi pootna an hudhud chi Hudju ja hana in-urchin chi tatakhu an nan-ug ay ni umannung an tudtuchu.

¹⁵ Hana maphod chi nomnom cha, ja an amin hana enephod Apo Jos ja maphod ay chicha. Muti hana tatakhu an napfahulan an achi mamati ay Apo Jos, ja ma-id anila cha hi hay maphod. Hotti cho-or hana paniyaw ay chicha ti un nalukhit hini gwa ay ni nomnom cha ja napaˈ-i hini konsensia cha. ¹⁶ Allon cha hi anila cha hi Apo Jos muti agkhuy cha, ti matikhaw ay ni khun cha aton an un cha umipahingar ja ngumangannu, ja ma-id oh-ohhah anila cha an mangat hi maphod.