Titus 3

Hana maphod an unuchon chi namati

¹ Epanomnom mu hana namati hina an mahapor an unuchon cha hana papangulu ja hana a-ap-apo ay tay khupferno. Ja ituchum ta mehahagkhana cha an mangat hi maphod. ² Allom ta achi cha pumahiw ja miˈhahannu, ta un cha ma-uloy ja maphod chi ipatikhaw cha an amin hi tatakhu. ³ Ti chin hopapna ja un ta-o natottot, ja ngumangannu, ja na-allilaw. Pfinalud chita-o hana cho-or an napukhit an podpodhon chi achor. Chin omaˈ-atan ni niˈtakhuwan ta-o ja un ta-o mabmapfohhor ja na-amhan. Cho-or chi achi mamhod ay chita-o ja cho-or khu chi achi ta-o podhon. ⁴ Muti nachakngan chin timpo an hi Apo Jos an nanakhu ay chita-o ja impa-innila na hini khohkhoh ja pamhod na. ⁵ Tinakhu chita-o khapo hi khohkhoh na an pfu-un hay magpong an enat ta-o. Tinakhu chita-o chin nangulahana hana pfahor ta-o, ja inchatan chita-o hi pfakhu an piˈtakhuwan an narpu ay ni Espiritu Santo. ⁶ Ja agkhuy in-ik-ikot Apo Jos an nangchat ay ni Espiritu Santo khapo ay Hesu Kristo an nanakhu ay chita-o. ⁷ Ja khapo ay ni khohkhoh na ja mipfilang ta-o hi magpong hi pannig Apo Jos, ja michatan ta-o hi piˈtakhuwan an ma-id chi pogpogna an hija hini pfanoh an hahadchon ta-o.

⁸ Nehamad hato an mitudtuchu. Hotti hay podhoˈ hi atom ja paˈpaˈ-allom ta hana munhochor ay Apo Jos ja piˈhahalichit cha an mangat hi maphod. Hay hato an tukhun ja napfalor ja aphochan an amin hi tatakhu. ⁹ Chuˈkhom hana ma-id chi poot na an punhohongngilan, ja pun-umanan cha hana i cha narpugwan ja punhohongngilan khapo hi urchin Moses. Ma-id herpfin hato ti ma-id itolong na.

¹⁰ Nu gway takhu hi chumalat hi punchichinnuˈ-ukhan chi namati, ja tukhunom hija hi mumpenghan, achi ayya ja mumpiggwa ta una ayya ilukhangeh, ja achim pi-idchumon ta un ikhad hija. ¹¹ Ja anilam an hini amat hina ja nepfahhaw chi nomnom na. Anila na an pfahor hini khuna aton ja una tugwali khurkhulaton.

Hana me-ang-angonoh an intulaˈ Paul ay Timoti

¹² Nu omatam ayya hi Artemas, ja pfu-un ayya ja hi Tikikus, an honakhoˈ an umali hina an mepallog ay he-a, ja empacheh mu adniˈ an umali ta munchittum ta ad Nikopolis. Ti inhumang u an umuy hichi ad ugwani an ahitungnin. ¹³ Atom chi mapfalin mu an tomolong ay nuy abugado an hi Zenas, ja hi Apolos, ta etoloy cha an umuy ay ni omajan cha. Tikham ta magwacha an amin chi mahapor cha. ¹⁴ Tuchugwam hana i-ibpfa ta-o an namati hina an mangat hi maphod ta tomolong cha hana munhapor hi tolong ta matikhaw an gway piherpfiyan ni pammati cha.

¹⁵ Omod a anu hina an allon an amin hato nun-ibpfaˈ heto. Pakumustaam khu hana i-ibpfa ta-o hi pammati hina an manghihi-ar ay chita-o.

Hotti hi Apo Jos chi mangkhohkhohan ay chaˈju an amin.