2
Chin engkasaban Paul ja nepognad ay ni la-eng Apo Jos, pfu-un hay la-eng chi tatakhu
1 A-akhi, chin immaliyaˈ hina an nangaskasabaan ay ni omaˈ-atan Kristo an impa-innilan Apo Jos ad ugwani, ja agkhujaˈ nunhapit ay chaˈju hi nun-a-unig an hapit, wenno hay la-eng chi takhu. 2 Ti hay nenomnom u ja nu umaliyaˈ hina ja un u ohhaon an ituchu hini omaˈ-atan Hesu Kristo, om-omod chin natajana hichi kros. 3 Ja chin nihihinnaaˈ, ja mun-og-okhonaˈ ja toma-otaˈ, ti unchani ja achiˈ ma-at an amin hini penhod Apo Jos an atoˈ. 4 Ja chin enat u an nangaskasaba ja agkhujaˈ nunhapit hi mangujukhuy ay chaˈju ta mipa-innila hini kinala-eng u, ti un hini apfalinan ni Espiritu Santo chi nipatikhaw ay ni khun u pungkaskasabaan. 5 Amat heto chi enat u an nuntudtuchu ta hini pammati ju ja achi mepognad hi kinala-eng chi takhu ta un mepognad ay ni apfalinan Apo Jos.
6 Gwacha chamchama hana na-unig an khun mi itudtuchu hana hemmeˈnad chi pammati na, muti agkhuy niˈpadchung ay ni kinala-eng chi takhu ay tay lota, ja anong un hini la-eng hana khun mun-ap-apo heto lota an mapogpog chi apfalinan cha. 7 Hitay kinala-eng an khun mi hapiton ja hini kinala-eng Apo Jos an hija chin plano na an inhumang na an aton chin agkhuy pay narmugwan tay lota, an midchum ta-o an namati ay ni kinapfagto na. Muti agkhuy na impa-innila hitay hana tatakhu hichin hopapna. 8 Hachi pangpangulu ay tay lota, ja agkhuy cha na-aw-awatan hitay an plano na. Ti nu na-awatan cha koma hot agkhuy cha empepfakhat hini napfagto an Apo ta-o ay chuy kros. 9 Hitay khun mi hapiton ja hija hitay nitulaˈ an Hapit Apo Jos hi nangarjana hi,
“Hana enhakhanan Apo Jos an michat hana mamhod ay hija
ja agkhuy tinnig chi tatakhu ja agkhuy cha chengngor, ja ad-adchi cha paˈ-anomnom.”a
10 Chita-o an namati chi nangpa-innilaan Apo Jos hay hato khapo ay ni Espiritu na an gawwacha ay chita-o. Ti hini Espiritun Apo Jos ja ma-id oh-ohha hi agkhuy na anila, anong un hana na-unig an nomnom Apo Jos. 11 Ma-id nanginnila ay ni nomnom ni ohan takhu nu achi na ipa-innila, ti hija ja angkhay chi nangila ay ni gwa ay ni nomnom na. Hotti amat hina khu ay Apo Jos an ma-id nanginnila ay ni nomnom na nu pfu-un hini Espiritu na. 12 Ay chita-o an namati ja pfu-un hay na-inlubungan an nomnom chi enagwat ta-o ta un hini Espiritun Apo Jos, ta ma-awatan ta-o an amin hana inchat Apo Jos ay chita-o.
13 Hotti gwa ayya ta muntudtuchu ami, ja hana khun mi ituchu ja agkhuy nepognad hi kinala-eng chi takhu heto lota, ti narpu ay ni Espiritu Santo. Ipa-innila mi hay hato na-ilangitan an umannung an tudtuchu hana tatakhu an nagwachaan hi Espiritu Santo. 14 Hini ayya agkhuy namati an ma-id hini Espiritun Apo Jos ay hija, ja achi na agwaton hana ipa-innilan tay Espiritun Apo Jos, ti ay ni nomnom na ja ma-id herpfi na ay hija. Ja achi na khu ma-awatan ti khahin un gwacha hini Espiritun Apo Jos ay ni ohan takhu ja una ma-awatan. 15 Hini ayya namati an gwa hini Espiritu ay hija ja kaya na an imatunan an amin nu ngachah chi maphod ja nu ngachah chi napukhit. Muti hini agkhuy namati an ma-id hini Espiritu ay hija, ja achi na ma-awatan hini gwa ay ni nomnom hana namati. 16 Ti gwa han impatulaˈ Apo Jos hi nangarjana hi,
“Un chah gway nanginnila hi nomnom Apo Jos?
Ja un chah gway takhu hi mapfalin an i manukhun ay hija?”b
Muti ay chita-o an namati ja amat ay ni nomnom Kristo hini punnomnom ta-o.