3
Agkhuy pay hemmeˈnad hini pammatin hana namati ad Korinto
1 A-akhi, chin nuntudtuchugwaˈ ay chaˈju ja agkhuy u impadchung ay ni atoˈ an manudtuchugwan hana hemmeˈnad chi pammati na an khun echalan chi Espiritu Santo. Ti ipfilang u pay chaˈju hi unga ay ni pammati ju ay Kristo, ti khun ju pay unuchon hana penhod ni achor ju. 2 Chin pengpenghana ja intuchuˈ hana nalaklaka hi ma-awatan ju an amat hi khatah an ipa-inum cha hi pfuˈjug, ti ma-id pay olog ju an mangawatan hana naliglikhat an mituchu, an mipadchung hana khun anun chi ma-ilog. Muti tayya an ingkhana ad ugwani ja un aju pay khun unga-unga, 3 ti khun ju pay unuchon hana penhod ni achor ju. Ja umannung hitay, ti un aju omarkhaw an munhohongnger ja manghen-e-ennaamoh. Ja nu amat hetoy aton ju, ja matikhaw an khun ju unuchon hana penhod ni achor ju, an amat hi tatakhu an na-inlubungan hini nomnom ja ugali cha. 4 Ja nu gway mangali an, “Hi Paul chi nidchuman mi” ja allon khuy uchumna hi, “Ja hi Apolos ay chaˈmi” ja un chah achi khu ipatikhaw ni amat heto an hini ugali ju ja un hihiya hana tatakhu an na-inlubungan chi ugali cha?
Agkhuy cha na-awatan hini aton cha Paul ay Apolos an khun munserbi ay Apo Jos
5 Mahapor an nomnomon ju hini omaˈ-atan mi ay Apolos. Ti un ami numpadchung an pfaar Apo Jos ja angkhay. Khapo ay chaˈmi ja namati aju, muti un mi enat hini tamu an eneˈchan Apo Jos hi aton chi oha-ohanna ay chaˈmi. 6 Hotti ay ha-in ja tamuˈ chi muntanum, ja hi Apolos chi nangtamu hi munhipfug, muti hi Apo Jos chi khun mangpaheˈheˈ-on ay ni nitanum. 7 Hotti achi khahin un mabigbig nu ngay nuntanum ja ngay nunhipfug, ti hini mabigbig ja hi Apo Jos an khun mangpahe-on hi nitanum. 8 Hotti ma-id nat-onan ni nangtamu hi muntanum ay ni nangtamu hi munhipfug, ti mun-oh-ohha ami ay tay tamu. Ja lagpfuwon chaˈmi ay Apo Jos an me-okor ay ni enat chi ohanna ay chaˈmi. 9 Ti chaˈmi an manudtuchu, ja un ami numpapadchung an khun munserbi ay Apo Jos. Ja chaˈju chi mipadchung hi pajaw Apo Jos an khun mi puntamuwan.
Ja mipadchung aju khu ay ni pfalay an khun pakhachon Apo Jos. 10 Ja mipadchungaˈ hi ohan takhu an nala-eng an mumpakhad hi pfalay khapo ay ni apfalinan an inchat Apo Jos ay ha-in. En-apjaˈ hini pfato an ipattu-an nuy pfalay ja entoloy hana uchumna an mumpakhad. Muti hini mangtoloy an mumpakhad ja pa-ennongana hini atona. 11 Ti achi mapfalin an maparkhan hini ne-apja an pfato an ipattu-an chi tu-ud an ma-id uchumna nu pfu-un hi Hesu Kristo. 12 Muti mapfalin an achi mumpapadchung hana e-apjan hay hana mangtoloy an mumpakhad ay tay an pfalay. Ti uchumna ja e-apja chay pfalituˈ ja hana nun-angina an khumoˈ ja pfato. Ja uchumna ja e-apja cha chi ajiw ja khulun ja chakhami. 13 Chin arkhaw an panugijan Apo Jos hi tatakhu, ja ma-innila hini pfalor ni en-apjan ni oha an numpakhad, ti pachaon Apo Jos hini penakhad na hi apoy nu maghob wenno achi. 14 Ja hini takhu an achi maghob chi penakhad na, ja gway lagpfu na an nuntamu. 15 Muti hini ayya takhu an naghob hini penakhad na ja ma-id chi hay linagpfu na. Miˈtakhu muti ma-id oh-ohha hi lamoˈ na.
16 Anila ju mit an chaˈju an namati hini templo an punhitugwan Apo Jos, ti gawwacha hini Espiritun Apo Jos ay chaˈju. 17 Hotti nu gway mamaˈ-i ay ni panuh ja aphochan tay templo ja dusaon Apo Jos hija. Ti hitay an templo ja pfalay Apo Jos, ti chaˈju hini templo na.
18 Achi ju allilagwon hini achor ju. Nu gway ohanna ay chaˈju an mangali hi un manomnom an amat ay ni allon chi tatakhu an manomnom ja uchuˈchuna una chuˈkhon hitay na-inlubungan an nomnom, ja usarona hini umannung an nomnom an marpu ay Apo Jos. 19 Ti hitay na-inlubungan an nomnom ja ma-id herpfi na ay Apo Jos. Ti allona ay ni hapit Apo Jos hi, “Hana tatakhu an mangeh-ehnger ay ni na-inlubungan an kinala-eng cha, ja hitay kinala-eng cha ja hijay pumpfalinon Apo Jos hi amat hi pfito an akhahan cha.”a 20 Ja gwa khu hitay nitulaˈ hi nangarjana hi, “Anilan Apo Jos an ma-id herpfin chi nomnom hana nun-ala-eng an tatakhu.”b 21 Hotti achi ju epa-akhaja hini ohan takhu an inunud ju. Ti an amin chi maphod ja nichat ay chaˈju ta ap-aphochan ju an amin. 22 Ha-in an hi Paul ja hi Apolos ja hi Peter, ja amat hi nichat ami ay chaˈju, ti enajakhan chaˈmi ay Apo Jos an munserbi ay chaˈju. Ja anong un hitay lota ja hini piˈtakhuwan ju ja hini atajan ju, ja hay hato arkhaw ad ugwani ja hana umali an ar-arkhaw, impulang Apo Jos an amin ay chaˈju. 23 Ja chaˈju ayya ja nidchum aju ay Kristo. Ja nidchum hi Kristo ay Apo Jos.