1 Korinto 1

1 KORINTO

¹ Ha-in hi Paul an enajakhan Apo Jos an numpfalin hi apostol Kristo Hesus, ti hitay chi penhod na. Tayya an chaˈmi ay tay ibpfa ta-o an hi Sostenes ja muntulaˈ ami ² ay chaˈju an tatakhun Apo Jos an khun ma-am-amamung an mummeha hina ad Korinto. Numpfalinon chaˈju ay Apo Jos hi nasantuwan an tatakhu na khapo hi nidchuman ju ay Kristo Hesus. Ja pfu-un chaˈju ja angkhay chi enajakhana muti nidchum an amin hana tatakhu hi apfuglapfuglay an khun mundayaw ay Apo Hesu Kristo ti hijay Apo ta-o an amin.

³ Hi Apo Jos an Ama ta-o ja hi Apo Hesu Kristo chi mangkhohkhohan ay chaˈju ja mangchat hi pomhochan ni piˈtakhuwan ju.

Chin nunyamanan Paul khapo chin nangkhohkhohan Apo Jos hay hana namati ad Korinto

⁴ Achiˈ epokhong an munyaman ay Apo Jos ti matikhaw an engkhohkhohan chaˈju ay hija khapo hi nidchuman ju ay Hesu Kristo. ⁵ Ti, khapo ay tay neˈ-oh-ohhaan ju ay hija, ja nichatan aju hay hana nun-apfalor an khun ichat Apo Jos hi tatakhu na, an amat ay ni nanginnilaan ju ay ni umannung an tudtuchu ja ay ni apfalinan ju an khun mangi-ali. ⁶ Ti limmamot ay ni nomnom ju hana tinihtikhuwan mi an omaˈ-atan Kristo. ⁷ Hijaot un ma-id i ju nungkulangan hana numpfino-ob-on an na-ispirituwan an apfalinan ay tay i ju punhohhoochan ay ni pumpfangngachan Hesu Kristo an Apo ta-o. ⁸ Hijay mangpapfipfi-ah ay ni pammati ju ta ma-id pungkulangan ju chin arkhaw an pumpfangngachana an Punhugijana hi tatakhu. ⁹ Ti matalek hi Apo Jos an nangajakhan ay chaˈju ta meˈ-oh-ohha aju ay tay Empfalay na an hi Hesu Kristo an Apo ta-o.

Chin himminglan Paul hana pumapaˈ-i hi pun-oh-ohhaan

¹⁰ A-akhi, tayya han itukhun u ay chaˈju khapo ay ni apfalinan tay Apo ta-o an hi Hesu Kristo. Mahapor an munlalammong aju ta achi la-ahna ja i aju ma-aggwa-aggwa ta un aju mun-oh-ohha hi nomnom. ¹¹ Alloˈ hitay, a-akhi, ti gwa han chengngor u an impa-innilan ni pamiryan Kloe an khun aju munhohongnger. ¹² Hini chengngor u ja gwa anu hana khun mangali hi, “Chaˈmi ayya ja hi Paul chi nidchuman mi.” Ja allon khuy uchumna hi, “Ja chaˈmi ja hi Apolos chi nidchuman mi.” Ja allon khuy uchumna hi “Ja hi Peter chi nidchuman mi.” Ja hana uchumna khu ja allon cha hi, “Ti chaˈmi ayya ja hi Kristo chi nidchuman mi.” ¹³ Un agkhu kaykhu la-ahna ja i ju khinaggwakhaggwa hi Kristo! Un chah ha-in an hi Paul chi natoy hichi kros khapo hi pfahor ju? Ja un chah ha-in khu chi nidchuman ju chin numpabautisaran ju? ¹⁴ Hinaot niˈ kaen ta ma-id chi hay binautisaraˈ ay chaˈju, an angkhay cha Krispus ay Gayus. ¹⁵ Hotti ma-id chi oha ay chaˈju hi gway panghiˈ-ingana an mangali hi numpabautisar ta midchum ay ha-in. ¹⁶ Aa taˈgwa, ja gwacha khu cha Stefanas an pamilya an binautisaraˈ ja angkhaynana khuh niˈ hi anilaˈ. ¹⁷ Ti agkhujaˈ hennag ay Kristo ta ujaˈ mumbautisar, muti unaˈ hennag an i mangkaskasaba ay tay Ebanghelyo. Ja achiˈ khun pa-akhaˈkhajaon hini atoˈ an mangaskasaba ta ipatikhaw u hini kinala-eng u, ti achiˈ podhon an ma-aˈ-aanan hini apfalinan ni puntudtuchugwaˈ ay ni enat Kristo an natoy hichi kros.

Chin natajan Hesu Kristo chi atikhan ni kinala-eng Apo Jos

¹⁸ Hitay khun mekasaba an enat Kristo chin natajana hichi kros, ja achi pfalolan hana tatakhu an ma-utaw chi piˈtakhuwana. Muti ay chita-o an khun takhuwon Apo Jos ja anila ta-o an hitay chi atikhan ni otong an apfalinan Apo Jos an manakhu hi tatakhu. ¹⁹ Amat ay tay nitulaˈ an hapit Apo Jos hi nangarjana hi,

“Paˈ-iyoˈ hana enat chi tatakhu an nangehchor ay ni kinala-eng cha,

Ja hini la-eng chi tatakhu an epa-akhaja cha, pumpfalinoˈ hi ma-id herpfina.”

²⁰ Ja emmat, ti anong un hana manomnom an tatakhu, ja hana gway achar na, ja hana khun mundibati hana omaˈ-atan hana gwah to lota, ja ma-id itolong na. Ti impatikhaw Apo Jos an ma-id herpfin tay na-inlubungan an kinala-eng. ²¹ Ja hay eneˈchan Apo Jos khapuh kinala-eng na, ja umad-adchi hini kinala-eng chi tatakhu ta ma-annila cha hini omaˈ-atana. Hay penhod na ja takhuwona hana mamati ay Kristo khapo ay ni umannung an tudtuchu an khun mi ekasaba, an allon hana agkhuy namati hi ma-id herpfi na. ²² Achi pfalolan hachi Hudju ti hay penhod cha hi tikhagwun ja hana milagro an pangtikhan ay ni apfalinan Apo Jos ja un cha mamati. Ja pahigwon khu hachi Hentil ti hay penhod cha ja hana na-unig an tudtuchu an narpu hi nomnom chi takhu. ²³ Muti hay khun mi ekasaba ja chin natajan Kristo hichi kros, ja pahigwon hachi Hudju ti apfopfohor hi pangngolan cha, ja hachi ayya Hentil ja ma-id herpfi na ay chicha. ²⁴ Muti ay chita-o an enajakhan Apo Jos, Hudju man wenno Hentil, ja anila ta-o an hitay enat Kristo chi panginnilaan ay ni apfalinan ja kinala-eng Apo Jos. ²⁵ Ti hana enat Apo Jos an allon chi tatakhu hi ma-id chi pfalor na, ja najunaot ja hijay napfarpfalor mu hini kinala-eng cha. Ja hini allon cha an na-apfakan Apo Jos khapo hi natajan Kristo ja najunaot ja hijay atikhan ni apfalinan Apo Jos an ot-ottong mu hini apfalinan chi tatakhu heto lota.

²⁶ A-akhi, nomnomon ju chin omaˈ-atan ju chin nangajakhan Apo Jos ay chaˈju. Ma-id chi cho-or ay chaˈju hi nun-achar ay ni kinala-eng chi takhu. Ja ma-id khu chi cho-or ay chaˈju an gway nangato hi haad na, ja empfapfalay chi gway mapfalina. ²⁷ Ti pinilin Apo Jos hana ma-id achar na ja la-eng na hi pannig chi tatakhu ta mapfa-inan hana mangeh-ehnger ay ni achar cha. Ja pinili na khu hana amat hi ma-id pfirpfilang na an tatakhu ta mapfa-inan hana mangeh-ehnger hi apfalinana. ²⁸ Pinilin Apo Jos hana milulumlum an tatakhu heto lota, ja hana mapahpahiw, ja hana allon cha hi ma-id herherpfi cha, ta ipatikhaw na an ma-id herpfin hana khun pfalolan chi tatakhu. ²⁹ Hotti ma-id oha hi takhu hi mumpa-akhaja hi sangwanana. ³⁰ Ja hi Apo Jos chi nangidchum ay chita-o ay Kristo Hesus an hijay pangmatunan ay ni umannung an kinala-eng Apo Jos. Khapo ay Kristo ja nipfilang ta-o hi magpong, ja numpfalin ta-o hi nasantuwan an tatakhun Apo Jos, ja nawayawaya-an ta-o hi pfahor ja patoy. ³¹ Hotti unuchon ta-o hitay impatulaˈ Apo Jos hi nangarjana hi, “Hini mamhod an gway eh-ehnger na, ja hini koma enat Apo Jos chi ehnger na.”