3
1 Nu gway mangpfokha hi, “Hot ngay nin henawwar ni Hudju ay ni Hentil? Ja un chah ma-id pfalor tay enat ta-o an nakugit?” 2 Ja hay alloˈ ja munnaud an napfalor hitay kinaHudju ta-o. Hay oha ja chita-o an Hudju chi nangpulangan Apo Jos hana Hapit na an impitulaˈ na. 3 Ja mapfalin an allona khu hi, “Aa, muti nu gwacha hana uchumna an agkhuy immunud ay ni Hapit na, ja un chah hay podhona an hapiton ja epfahhaw Apo Jos hana ingkari na ay chita-o an Hudju?” 4 Nehalla hitay allona. Munlahlah an amin chi tatakhu muti hi Apo Jos ja munchochodcha an magpong an achi munlahlah. Ti nitulaˈ ay ni Hapit Apo Jos an allona hi,
“Ma-innila an umannung, Apo Jos, hana khun mu allon,
ja anong un chi-a hugijon hi takhu ja achi a ma-apfak.”a
5 Nu hay hato i ta-o pfimmahulan an Hudju ja ipatikhaw na an magpong hi Apo Jos, ja un chah hay allon ta-o ja achi maphod hini aton Apo Jos an mangdusa ay chita-o an Hudju? Amat hetoy aton chi takhu an munhapit. 6 Muti nehalla hitay i cha allon, ti nu achi magpong hi Apo Jos an manugwi ay chita-o an Hudju, chaad chi apfalinana an manugwi hana uchumna an tatakhu?
7 Mapfalin an gway tompfar ja allona chi, “Achiyaˈ koma hugijon ay Apo Jos khapo hi pfahor u. Ti nu matikhaw hini impukhit tay lahlah u, ja maˈ-attikhaw an umannung hi Apo Jos ja mangchat hi choˈchoˈ-or pay hi dayaw ay hija.” 8 Hini munhapit hi amat heto ja hihiya una inali hi, “Ti anong ja aton ta-oy napukhit ta ipfunga nay maphod.” Achi mapfalin hitay, muti gwacha chamchama hana pumapaˈ-i ay ha-in an papfaholonaˈ an inaliˈ anu hay hato. Hotti neˈcha hini dusa hi hoˈmon cha.
Ma-id oh-ohhah takhu hi magpong
9 Un chah hay allon ta-o ja akhaˈkhaja ta-o an Hudju mu hay hana uchumna? Achi. Ti hitay chi inaliˈ ay chaˈju, an himpfut an amin chi tatakhu hi pfahor, Hudju ja Hentil. 10 Ti hitay chin nitulaˈ an Hapit Apo Jos hi nangarjana hi,
“Ma-id chi hay takhu hi magpong hi pannig Apo Jos, anong un hay oh-ohha.
11 Ma-id chi hay oha hi manginnila ay ni omaˈ-atan Apo Jos
Ja achi cha khu epacha an annilaon.
12 An amin hana tatakhu ja chin-ug cha hi Apo Jos ja pimmukhit an amin hini piˈtakhuwan cha.
Ma-id chi hay mangat hi maphod, anong un hay oh-ohha.b
13 Hana ta-o cha ja amat hi lupfuˈ an napnu hi mun-akhub ti napukhit hana hapit an pfumutay.
Munhapit cha hi pfumarpfali hana i-ibpfa cha.
Ja munhapit cha khu hi apaˈ-iyan chi ibpfa cha an amat hi pfumininu an angiw chi ulog.c
14 Munhapit cha ayya ja un hay tubtub ja pfungot chi pfumutay ay ni ta-o cha.d
15 Ja un ak-akidchi hon pomatoy cha.
16 An amin chi hay omajan cha ja chichay chumalat hi apaˈ-iyan ja apalikhatan chi takhu.
17 Ma-id anila cha an miˈtakhu hi maphod an mangpfunga hi malenong an piˈtakhuwan.e
18 Ja ma-id anila cha an toma-ot ay Apo Jos.”f
19 Ja tayya an anila ta-o an hana impitulaˈ Apo Jos an Urchina ja pfu-un hana Hentil ja angkhay chi pitulungana, ti nidchum hana Hudju an chichay nichatan hay hana urchin Moses. Hotti ma-id chi hay oha hi takhu, Hudju man wenno pfu-un, hi meˈtennagwar ay Apo Jos hi panumarjaana ay ni pfahor cha. Ja an amin chi tatakhu heto lota ja gway pfahor hi hongpfatana ay Apo Jos. 20 Ti ma-id chi hay oha hi mipfilang hi magpong hi pannig Apo Jos khapuh pangunuchana hi urchin. Ti hitay urchin ja una ipatikhaw an napfahulan ta-o.
Ipfilang chita-o hi magpong khapo hi pammati
21 Muti ad ugwani ja impa-innilan Apo Jos hini aton chi takhu an mumpfalin hi magpong hi pannig na, an achi mepognad hi pangunuchan hi urchin. Ja hitay aton an mipfilang hi magpong ja tihtikhuwan hana hapit Apo Jos an nepaˈgwa ay Moses ja hana uchumna an profeta. 22 Hay impa-innilan Apo Jos ja ipfilang na hi magpong an amin hana mangehchor ay Hesu Kristo khapo hi pammati cha. Ay ni pannig Apo Jos ja ma-id nat-onan ni Hudju ay ni Hentil, 23 ti an amin chi tatakhu ja pfimmahor cha ja ma-id oh-ohha hi mipadchung ay Apo Jos an magpong. 24 Muti khapo ay ni ma-id pfajad na an khohkhoh Apo Jos ay chita-o ja ipfilang chita-o hi magpong khapo ta pfinajachan Kristo Hesus hana pfahor ta-o chin natajana hichi kros. 25 Hijay inchat Apo Jos hi matoy ta haˈpfatona hini dusan ni pfahor ta-o. Ja khapuh chin chala na an nun-ajuh ja gway aton hana pfahor ta-o an mapakawan nu mamati ta-o ay hija. Hitay chi enat Apo Jos ta annilaon ta-o an magpong hija ja hugijona an amin chi pfahor. Nete-a chin nahop ja inan-anuhan Apo Jos hana pfahor chi tatakhu an agkhuy na pay dinusa 26 ta ad ugwani ja impatikhaw na an nadusa hachi pfahor chin natajan Hesu Kristo. Hotti matikhaw an magpong hi Apo Jos ja mapfalin ad ugwani an ipfilang na hi magpong an amin hana mamati ay Hesus.
27 Hotti ngay epa-akhaja ta-o an Hudju? Ma-id. Ti pfu-un hana khun ta-o aton chi pipfilangan ta-o hi magpong ay Apo Jos muti khapo hi pammati ta-o ay Hesus. 28 Ti anila ta-o an pfu-un hini pangunuchan ta-o hi urchin chi tikhan Apo Jos ta mipfilang ta-o hi magpong, an hay tikhana ja hini pangehcholan ta-o ay Hesu Kristo. 29 Hi Apo Jos ja pfu-un Jos hana Hudju ja angkhay ti hija khu hini Jos hana Hentil. Umannung an nidchum hana Hentil, 30 ti na-ohha hi Apo Jos. Hudju man wenno Hentil, ja oh-ohha hini khapo na hi pangpfilangana ay chicha hi magpong an hija hini pammati cha. 31 Un chah hay podhona an hapiton ja etapar ta-o hini urchin ta mepallog hitay pammati ay Kristo? Achi. Ti khulat ta gway pammati ta-o ay Kristo ja pfalolan ta-o hitay urchin.