2
Magpong hini aton Apo Jos an manugwi
1 Mapfalin an pahigwon ju hay hato napukhit an hinapit u muti achi ju allon hi ma-id oh-ohha hi hongpfatan ju ay Apo Jos. Ti unchani ja he-a an manugwi ay ni oha an takhu ja khun mu khu peˈ-at hini pfahor na, hotti hongpfatam ay Apo Jos. Ti nu hugijom hija ja un hihiya an hini achor mu chi hinugim. 2 Inannila ta-o an magpong hini pundusaan Apo Jos hana amat hina an mangat hi napukhit. 3 Nu ay he-a an manugwi ay ni oha an takhu ja khun mu khu aton hini pfahor na ja un chah khemhom un mu elajagwan hini aton Apo Jos an manugwi ay he-a? 4 Un mu agkhu tugwali ngongohhajon hitay otong an kina-aphod ja anuh Apo Jos. Agkhuy mu nenomnomnom an khun ipatikhaw Apo Jos hini kina-aphod na ta gway atom an man-ug hana pfahor mu. 5 Muti niya an achim podhon an chuˈkhon hana pfahor mu ti pfimmato hini nomnom mu. Hotti un mu inug-ugman hini hoˈmom an dusa ay ni arkhaw an pangpatikhan Apo Jos ay ni pfungot na ja hini magpong an atona an manugwi. 6 Ti ichat Apo Jos hini lagpfun chi oha-ohanna an me-okor ay ni enat na chin niˈtakhuwana heto lota. 7 Hana tatakhu an nanganuhan an mangat hi maphod khapo ta podhon cha an hi Apo Jos chi mangpapfagto ja mangpadayaw ay chicha ja khapo ta podhon cha an miˈtakhu ay hija ja ingkhana, ja chichay ichatana hi piˈtakhuwan an ma-id chi pogpogna. 8 Muti hana tatakhu an hini podpodhon tay achor chi i cha pachot-anan ja khun cha himpoˈ-iton ay ni umannung an hapit Apo Jos, ta hana napukhit chi khun cha unuchon, ja hoˈmon chan to hini pfungot Apo Jos ja hini munnaud an pundusaana ay chicha. 9 An amin hana mangat hi napukhit ja umannung an dusaon Apo Jos chicha hot munnaud cha an malikhatan, om-omod hana Hudju ja anong un hana Hentil. 10 Muti hana mangat hi maphod, ja ipapfagton Apo Jos, ja ichatana chicha hi lenong chi piˈtakhuwan, om-omod hana Hudju ja anong un hana Hentil. 11 Ti ma-id pahhikhon Apo Jos ay ni atona an manugwi.
12 An amin hana pfumahor ja umannung an dusaon Apo Jos hi ma-id pogpogna. Hana ayya Hentil, ja ma-id anila cha hay hana urchin an impulang Apo Jos hana Hudju. Hotti achi na papfaholon chicha khapo hi agkhuy cha nangunuchan hay hato urchin. Muti dusaona chamchama chicha, ti cho-or chi i cha pfimmahulan. Ja hana ayya Hudju, an chicha hana nangpulangana hana urchina, ja dusaona chicha khapo hi achi cha khun pangatan hay hato an urchin. 13 Ti hini apfuluton Apo Jos hi magpong ja pfu-un hana nunchongor ja angkhay ay ni urchina muti hana mangat ay cha tay an urchin. 14 Hay hana Hentil, anong un ma-id anila cha ay ni urchin an impulang Apo Jos hachi Hudju, ja umu-udchum ja meˈ-annolot hini khun cha aton ay ni allon tay urchin. Hotti hana maphod an khun cha nomnomon an aton ja hijay amat hi urchin an mangpaptoˈ ay chicha. 15 Hotti amat hi nitutulaˈ hini urchin Apo Jos ay ni nomnom cha. Ja hitay lonsensia cha ja ipa-innila na nu maphod wenno napukhit hini enat cha. Ja un chicha hon inamujuwan ja pinasensya chay achor cha. 16 Hotti hitay chi amatana ay nuy arkhaw an pangpulangan Apo Jos ay Kristo Hesus ay ni panumarjaana hay hana ena-enat chi tatakhu, anong un hana inliliˈ-ud cha. Ja hitay chi khun u piˈtuchu ay ni khun u pangpa-innilaan ay tay Ebanghelyo.
Hana takhu an mipfilang hi umannung an Hudju
17 Chaˈju an papadchung u an Hudju hina, tayya han alloˈ ay chaˈju. Punhohodlanan ju atag hini kinaHudju ju ja munhochor aju ay ni pangunuchan ju ay ni urchin ta miˈtakhu aju. Ja empa-akhaja ju hini nanginnilaan ju ay Apo Jos. 18 Ja allon ju kay chi chaˈju an Hudju chi nanginnila ay ni penhod Apo Jos, ja anila ju an mangmatunan ay ni magpong, ti nituchu ay ni urchin an inannila ju. 19 Ja nunhohodlanan ju an chaˈju hini umannung an mangtuchu ay ni omaˈ-atan Apo Jos hana tatakhu an amat hi napfulaw, ta mahilagwan hini naherngan an nomnom cha. 20 Ja nunhohodlanan ju an anila ju an manukhun hana tatakhu an amat hi ung-ungnga khapo ta agkhuy natuchugwan ja ma-id anila cha ay ni umannung. Ehnger ju hini urchin Apo Jos an gwa ay chaˈju, an panginnilaan ay ni umannung. 21 Hotti tayya, nu kaya ju an tuchugwan hana padchung ju an takhu ja anagkha ta achi ju tuchugwan hini achor ju? Ituchu ju an achi cha omakaw, muti angkhiloh un aju achi khun omakaw? 22 Allon ju hi pfahor chi umilugtap, muti angkhiloh un aju achi khun umilugtap? Pahigwon ju hana pfolor muti angkhiloh un aju achi khun humikhop hana templo an pundayawan cha hi pfolor ta omakaw aju? 23 Eh-ehnger ju hini maphod an urchin Apo Jos an inannila ju, muti khun ju paˈ-iyon hini dayaw Apo Jos khapo ay ni achi ju pangatan ay nuy urchin! 24 Hitay chi hapiton chin nitulaˈ an Hapit Apo Jos hi nangarjana hi, “Hana Hentil ja munhapit cha hi hay mepfohor ay Apo Jos khapo ay ni napukhit an ugali ju an Hudju.”a
25 Hini enat ta-o an Hudju an nakugit ta ma-innila an nidchum ta-o hana tatakhun Apo Jos, ja napfalor nu khun ta-o unuchon hana urchin Moses. Muti nu achi ta-o khun unuchon ja ma-id inherpfin ni enat ta-o an nakugit ti omaˈ-at ta-o hana Hentil an pfu-un tatakhun Apo Jos. 26 Amat hina khu hana Hentil, anong un cha agkhuy nakugit, nu meˈ-annolot hini khun cha aton ay ni urchin Apo Jos, ja ipfilang na chicha hi tatakhu na an amat hi nakugit. 27 Hotti hana Hentil an agkhuy nakugit muti khun cha aton hini ituchun ni urchin Apo Jos ja chichay mangpatikhaw an pfimmahor aju an Hudju an nakugit ja natuchugwan ay ni urchin muti khun ju paˈ-iyon.
28,29 Hotti ngachan ni takhu an mipfilang hi umannung an Hudju? Pfu-un an amin hana holag chi Hudju an khun mangat hana ugalin chi Hudju. Hini umannung an Hudju ja chicha hana nabarbaliwan chi nomnom cha. Ja nga chah tugwali hana mipfilang hi umannung an nakugit? Pfu-un hay hana nakugit chi achor na ja angkhay. Hini umannung an kugit ja hini tamun ni Espiritu Santo ay ni nomnom ni ohan takhu ta maleneh hi pannig Apo Jos. Hana amat heto an mipfilang hi umannung an Hudju ja anong un achi dayawon chi takhu chicha muti hi Apo Jos chi mangchat hi dayaw cha.