4
Khapo ay ni pammatin Abraham ja impfilang Apo Jos hija hi magpong
1 Nomnomon ta-o hi Abraham an nangholag ay chita-o an Hudju. Ngay anila ta-o an na-at ay hija? 2 Nu impfilang Apo Jos hija hi magpong khapo hi khuna pangatan hi maphod ja mapfalin an hitay chi eh-ehnger na. Muti ma-id eh-ehnger na hi sangwanan Apo Jos. 3 Ti hini nitulaˈ ay ni Hapit Apo Jos ja, “Pinatin Abraham chin inalin Apo Jos ja impfilang Apo Jos hija hi magpong khapo chin pammati na.”a 4 Hotti pfu-un lagpfun ni nangunuchana hi urchin. Mapfalin an ipadchung u ay ni khun meˈpfoˈla. Achi ta-o allon hi un khohkhoh ay hija hini herchu na ti na-unglana ay man. 5 Hotti amat heto. Hini takhu an achi munchomoˈ an mangehchor hay hana khuna aton, ta un mamati ay Apo Jos an mamakawan hi tatakhu an napfahulan ta mipfilang cha hi magpong, ja hijay mipfilang hi magpong khapo hi pammati na. 6 Hijah tay khu chin inalin Ari David hi nangarjana hi akhaˈkhaja hini takhu an ipfilang Apo Jos hi magpong, an hay khapo na ja pfu-un hana enat na. 7 Hay inali na ja
“Akhaˈkhaja hini takhu an penakawan Apo Jos hana pfahor na ja nalichuwana.
8 Akhaˈkhaja hini takhu an achi nonomnomon Apo Jos hini pfahor na.”b
9 Ja hana akhaˈkhaja an inalin Ari David, ja un chah hana Hudju an nakugit ja angkhay? Pfu-un, ti midchum hana Hentil anong un cha agkhuy nakugit. Ti ipiggwaˈ an allon hi pinatin Abraham chin inalin Apo Jos, hijaot un mipfilang hija hi magpong. 10 Ja ngay tugwali anila ju hi aˈ-anunay na-atan tay? Hichin chah napfalin an nakugit hi Abraham wenno chin agkhuy na pay nakugitan? Impfilang Apo Jos hija hi magpong chin agkhuy na pay nakugitan. 11 Ja chin nakugitan Abraham ja hijay pangmatunan hi nangpfilangan Apo Jos ay hija hi magpong khapo hichin pammati na. Hotti hi Abraham ja amat hi aman hana namati an agkhuy nakugit an mipfilang hi magpong ay Apo Jos khapo hi pammati cha. 12 Ja hija khu chi aman hana Hudju an nakugit an gway khu pammati cha an amat chin pammatin tay apo ta-o an hi Abraham chin agkhuy na pay numpakugitan.
Mipa-annung hana karin Apo Jos hana mipfilang hi holag Abraham
13 Ingkarin Apo Jos ay Abraham hi hija ja hana holag na chi pangpapfanhana an amin ay tay lota. Muti agkhuy ingkarin Apo Jos hitay khapo hi nangunuchan Abraham hi urchin. Ingkari na khapo ta pinatin Abraham chin inali na, hijaot un impfilang Apo Jos hija hi magpong. 14 Nu khulat ta hana mangat an amin hana urchin Apo Jos ja angkhay chi pangchatana hay hato ingkari na, ja ma-id inherpfin tay pammati ta-o. Ja amat hi achi umannung hitay ingkarin Apo Jos ti un chah gway takhu hi mangat an amin hana urchin Apo Jos? 15 Ti hay allon tay urchin ja dusaon Apo Jos hana achi umunud. Umannung an gwacha ayya chi urchin ja achi mehalla an gway achi mangunud hot pfumungot hi Apo Jos.
16 Hotti hana ingkarin Apo Jos ja ma-at hana tatakhu an gway pammati na ta matikhaw an narpu ay ni khohkhoh na an pfu-un lagpfun ni enat cha an maphod. Hot ma-at ay chita-o an amin an mipfilang hi holag Abraham, pfu-un hana Hudju an nanginnila ay ni urchin Apo Jos ja angkhay muti midchum an amin chi gway pammati na an amat ay Abraham an hijay mipfilang hi nangholag ay chita-o an amin. 17 Amat heto chin nitulaˈ an hapit Apo Jos an ingkari na ay Abraham hi, “Pumpfalinoˈ he-a hi ammod chi cho-or hi holag chi apfuglapfuglay.”c
Chin ingkarin Apo Jos ay Abraham ja ma-at an ma-at ti ma-id uchumna chi nungkari nu pfu-un hi Apo Jos an pinatin Abraham ja hijay gway apfalinana an manakhu hi natoy ja an munlumu hana agkhuy narmu khapo ay ni apfalinan ni hapit na. 18 Pinatin Abraham an ichat Apo Jos chi cho-or hi holag na, anong un allon hi ma-id namnama cha an omempfalay, ti nala-ay cha. Hotti numpfalin hi Abraham hi aman chi cho-or an holag hi apfuglapfuglay ta nipa-annung chin inalin Apo Jos an, “Hini pfilang ni holag mu ja amat hi pfilang hana pfittuwan ad uchu.”d 19 Ay chuy an timpo ja hingkhahot chin tagwona an munnaud an lakay. Hotti hay pfilang na ja un amat hi natoy ti un chah gway amat heto hi omempfalay? Ja meˈchagkha khu ja mumpfahig hi ahagwa na an hi Sarah. Muti anong ja agkhuy nunharhalinchugwa hini pammati na chin ingkarin Apo Jos. 20 Agkhuy injudjujan Abraham chin pammati na ay ni karin Apo Jos muti unot pfimmiˈpfi-ah ja khun mundayaw ay hija. 21 Ma-id ina punharhalinchugwaan an hi Apo Jos ja gway apfalinana an mangpa-annung chin ingkari na. 22 Hijaot un impfilang Apo Jos hija hi magpong khapo hi pammati na. 23 Muti hitay nangarjana hi, “Impfilang Apo Jos hi magpong” ja pfu-un hi Abraham ja angkhay chi hapitona 24 ti midchum ta-o. Ti ipfilang chita-o hi magpong nu mamati ta-o ay Apo Jos an nummahu ay Apo ta-o an hi Hesus. 25 Inapfulut Apo Jos an matoy hi Hesus khapo hi pfahor ta-o, ja minahuwana, ta mipfilang ta-o hi magpong hi pannig na.