Acts 16

Chin nidchuman Timoti ay cha Paul ay Silas

¹ Immuy cha Paul ay Silas hichi ad Derbe ja ad Listra an agwachaan han namati an hi Timoti chi ngachana. Hi ina na ja Hudju an namati ja Griego hi ama na. ² Ja khun haphapiton hachi namati ad Listra ja ad Ikonium hini kina-aphod Timoti. ³ Penhod Paul an mangitnud ay Timoti hotti kinugit na khapo hay hana Hudju hichi, ti anila cha an amin an Griego hi ama na hotti agkhuy nakugit. ⁴ Amat hichi ja initnud Paul hi Timoti ja immuy cha hachi apfuglapfuglay an i mangpa-innila chin nunhahappitanan cha hay hachi apostol ja hachi pangulun chi namati ad Jerusalem an mahapor an unuchon chin intulaˈ cha an urchin. ⁵ Hotti khun meˈ-er-ellog chin pammatin hachi namati, ja enarkhaw an khun cha chomchom-or.

Chin impatikhaw Apo Jos ay Paul an eMasedonia an lala-e

⁶ Ja podhon cha Paul an umuy hichi provincian chi Asia an i muntudtuchu muti agkhuy cha entoloy ti empagwan ni Espiritu Santo. Hotti eneˈgwa cha hichi provincian chi Frigia ja ad Galatia. ⁷ Ja ne-atam cha hichi pingngit chi provincian chi Misia ja penhod cha an umuy hichi provincian chi Bitinia muti empagwan khu ni Espiritun Apo Hesus. ⁸ Hotti un cha inchayyu an umuy hichi ad Troas an ohan pfuglay chi Misia. ⁹ Ay chuy an lapfi ja nipatikhaw ay Paul han lala-e an eMasedonia an timmataˈchug an khun mumpakpaka-ahi an mangali hi “Umali aju adniˈ heto ad Macedonia ta tulungan chaˈmi.” ¹⁰ Amat hichi ja nunhakhana cha ja neˈhakhanaaˈ khu ta umuy ami ad Macedonia, ti na-awatan mi an enajakhan chaˈmi ay Apo Jos an i mangkaskasaba ay tay Ebanghelyo hay hana tatakhu hichi.

Chin namatiyan Lidia ad Filipos

¹¹ Hotti nakak ami ad Troas ja nunlukhan ami han papor an munchapchapoh an umuy ad Samotrace. Nunnanong ami hichi ja nun-inggwiˈgwiit ja immuy ami khu ad Neapolis ay nuy provincian chi Macedonia. ¹² Emmatam ami ad Neapolis ja enehlong mi hichi ad Filipos an otongngan an pfuglay an nidchum ay ni pun-ap-apugwan chi Rome. Manghan hi ohay chumingkhu hi nunnangngan mi hichi. ¹³ Gwa an nachakngan chin Hapfachu an ngilin chi Hudju ja nakak ami ay chuy pfuglay ja immuy ami hichi gwanggwang an i manikhaw hay pungkalalakhan chi Hudju. Ja enataman mi hachi pfinapfai an na-a-amung ja ni-ipfun ami ta muntudtuchu ami. ¹⁴ Oha ay cha tay an pfinapfai ja hi Lidia an eTiatira an khun mungngina hi nangina an pfinacha. Oha hija an khun meˈdaydayaw ay Apo Jos. Ja inchatan Apo Jos hija hi pannaka-awat ja namati mahpay chin inalin Paul. ¹⁵ Numpabautisar hi Lydia ja chin numpun-ibpfa na an neˈheto hichi pfalay cha. Napfalin ja inali na hi, “Miˈjali aju mah ta munnanong aju hi pfalay mi, nu ipfilangaˈ ay chaˈju hi oha an namati ay Apo ta-o an hi Hesus.” Achi na pijon an mangali hotti niˈjuy ami.

Chin nipfaluchan Paul ad Filipos

¹⁶ Gwa han namenghan an umuy ami hichi khun pungkalalakhan, ja chinittum mi han pfupfai an himpfut an nahuhuˈlungan hi napukhit an espiritu an gway apfalinana an mangali hay hana ma-at ay ni ohan takhu hi uchum chi arkhaw. Hotti cho-or chi lagpfun tay an mun-anap an khun alaon hachi apo na.

¹⁷ Khun mangumangunud hitay pfupfai ay chaˈmi ay Paul ja khuna iˈgwa-iˈgwap hi, “Cha tay an linala-e ja pfaar tay napfagto an Jos. Ja immali cha an mangtuchu ay ni aton an miˈtakhu ay Apo Jos.” ¹⁸ Ja a-arkha-arkhaw an amat hetoy khun aton tay an pfupfai, ja loˈtat ja impahikha na hi Paul. Ja nunligkhoh ja inali na chin nehohoˈlong an ispiritu hi, “Ay ni apfalinan Hesu Kristo ja epakak u he-a.” Ja ay chuy an nangarjana ja nakak gwot chin nehohoˈlong ay chuy pfupfai. ¹⁹ Unagkhu inannilan hachi apon chuy pfupfai an ma-id mahpay pumpihuwan cha ja chimpap cha hi Paul ja hi Silas. Ja nungkhujud cha an in-uy hichi palaha ta ijuy cha hay hana ap-apo ay chuy pfuglay. ²⁰ Ja inali cha hay hachi a-ap-apo cha an Romano hi, “In-ali mi ay chaˈju hay hato Hudju an pumapaˈ-i ay tay an pfuglay ta-o. ²¹ Ti khun cha itudtuchu hana ugali cha an mekontra ay ni urchin ta-o ja achi mapfalin an unuchon ta-o an Romano.” ²² Pinahiw hachi tatakhu cha Paul ja nun-epa-aan chin a-ap-apo chin lopfong cha ja impahuplit cha chicha. ²³ Napfalin ja impipfalud cha, ja inali cha ay chuy khun munggwarja chin pfaluchan ta hahalichitona an pfantajan chicha. ²⁴ Inunud chuy gwarja chin inalin chin ap-apo na hotti in-uy na cha Paul hichi pumpfaluchan ja impahikhop na chicha hichi chohachohar na. Enala na han ajiw an khun cha pangorpit hi hu-in chi mipfalud, ja inorpit na chin hu-i cha ja tenorpfoˈ na.

²⁵ Gwa an temmonga ja khun mungkalalag ja mungkankanta cha Paul ay Silas an mundaydayaw ay Apo Jos. Ja khun chodchonglon chin uchumna an nipfalud. ²⁶ Ja unagkhu himpfumagkha ja gwa han mapfi-ah an khihu. Ja nun-a-egwor an amin chin pfaluchan. Ja un aˈ-alina ja nun-ipfughor an amin chin pantaw ja nun-a-aan khu an amin chin pfangkeleng hachi nun-ipfalud.

²⁷ Ja pfimmangon chin khun munggwarja ja tinnig na chin pantaw an nun-ipfughor. Ja khemhona un lemmajaw an amin hachi nun-ipfalud, hotti hinuˈnut na chin pfangid na ta patajona hini achor na. ²⁸ Unot tinnig Paul chin atona ja nun-ugwap an allona hi, “Achim patajon hini achor mu ti tayya ami heto an amin.” ²⁹ Numpfokha chin gwarja hay hilaw ja entagtag na an umuy ay chuy achaan cha Paul. Ja khun munggwoggwog hi ta-ot na ja nunheppe ay chicha. ³⁰ Ja initnud na chicha an pfumutay ja inali na hi, “A-akhiˈ, ituchu ju adniˈ hay atoˈ ta miˈtakhuwaˈ ay Apo Jos.” ³¹ Tempfar cha Paul ja inali cha hi, “Mamati a ay Apo ta-o an hi Hesus hot takhuwon chaˈju, he-a ja an amin aju an hen-a-amma.” ³² Ja intugtukhun cha Paul hini hapit Apo Jos ay hija ja an amin cha an hen-a-amma. ³³ Ja ay chuy an lapfi ja in-uy chin gwarja chicha han gwachaan chi chanum ta inulahana chin hukhat cha, ja un cha mumpabautisar an amin an hen-a-amma. ³⁴ Napfalin ja eneghop na cha Paul ay Silas ay ni pfalay cha ta panganuna. Ja nunheglay an-anla cha an hen-a-amma khapo hi namatiyan cha ay Apo Jos.

³⁵ Ja gwa an nanong ja hennag hachi a-ap-apo an Romano hachi polih an i mangali chin gwarja ta epakak na cha Paul ay Silas. ³⁶ Hotti inalin chin gwarja ay Paul hi, “Tayya an inalin hana apo mi an makak aju heto pfaluchan. Hotti amat hina ja makak aju ta ma-id chi hay mannig ay chaˈju.” ³⁷ Muti inalin Paul hachi polih hi, “Unchah amat hina chi aton mi an makak? Impapfalud chaˈmi an agkhuy chaˈmi hinumarja. Allon ju hay hachi a-ap-apo hi ma-id tinnig ju hi pfahor mi ja impahuplit chaˈmi hi achoˈlan chi tatakhu, ja numpapadchung ta-o an Romano. Ja un ju chah allon hi makak ami an ma-id oha hi manginnila. Achi mapfalin! Allon ju ta umali hachi a-ap-apo ta chichay mangitnud ay chaˈmi an makak.”

³⁸ Amat hichi ja numpfangngad chin polih hay hachi a-ap-apo cha an i mangpa-innila chin inalin Paul. Unot chengngor chin a-ap-apo an un Romano cha Paul ja temma-ot cha. ³⁹ Hotti immuy cha hichi pfaluchan an i numpakawan ay cha Paul. Ja impapfutay cha hi Paul ja hi Silas an inali cha hi, “Makak aju ta umuy aju hi uchumna hi pfuglay.” ⁴⁰ Ja nakak cha Paul ay chuy pfaluchan ja immuy cha hichi pfalay cha Lidia. Ja tinukhun cha hachi namati ja un cha epacheh.