15
Chin na-amungan hachi namati ad Jerusalem
1 Gwacha hachi namati an narpu ad Judea an immuy ad Antokya, ja khun cha muntudtuchu hi umapfu an khun cha allon hachi namati hi, “Nu achi aju mumpakugit, achi aju miˈtakhu ay Apo Jos, ti hitay chin urchin Moses.” 2 Muti achi apfuluton cha Paul ay Barnabas ja neˈhohongnger cha ay chicha. Khapo ta ma-id epfanakhana ja nunhahapit hay hachi namati ja pinili cha hi Paul ja hi Barnabas ja hana uchumna an namati, ta chichay hennag cha an umuy hichi ad Jerusalem an i miˈhapit chin apostol ja hachi papangulun chi namati hichi ta epfanag cha.
3 Empacheh cha an umuy ad Jerusalem ja enenggwa cha ad Fenisia ja ad Samaria. Ja khun cha ipa-innila hachi namati an gwacha mahpay hana Hentil an niˈ-unud ay Hesus. Mun-an-anla hay hachi namati hi nangngolan cha ay tay inalin cha Paul. 4 Ne-atam cha ad Jerusalem ja mun-an-anla chin apostol ja hana pangulun chi namati ja an amin hana namati, ja inali cha hi, “Maphod ta immali aju.” Amat hichi ja impa-innilan cha Paul chin en-enat Apo Jos ay chicha. 5 Muti timmaˈchug hay hachi uchumna an Farisee an namati ja inali cha hi, “Mahapor an mumpakugit hana Hentil, ja mahapor an allon ta-o ta unuchon cha hini urchin Moses.”
6 Amat hichi ja na-amung chin apostol ja hachi pangulun chi namati ta nunhahappitanan cha hitay an inali cha. 7 Uja-ud hi nunhahappitanan cha ja timmaˈchug hi Peter ja inali na hi, “A-akhi, anila ju an chin pengpenghana, ja ha-in chi pinilin Apo Jos ay chita-o an i mangtuchu ay ni Ebanghelyo, ta gway aton hana Hentil an mangngor ja mamati. 8 Hi Apo Jos an nanginnila an amin hi nomnom chi takhu chi nangpatikhaw ay chita-o an Hudju an apfulutona khu hana Hentil, ti inchat na khu ay chicha hini Espiritu Santo an amat khu ay ni nangchatana ay chita-o. 9 Numpapadchung chi enat Apo Jos ay chita-o an Hudju ja ay chicha an Hentil, ti penakawana an amin hana pfahor cha khapo hi namatiyan cha. 10 Hotti unchah achi ta-o ipahikha hi Apo Jos nu palikhaton ta-o hana Hentil an namati? Anong otniˈ un chin a-ammod ja chita-o ja ad-adchi ta-o paˈ-at ay ni urchin Moses. 11 Muti namati ta-o an un ta-o miˈtakhu ay Apo Jos khapo hi khohkhoh na an in-alin Apo Hesus, amat khu hina hay hana Hentil.”
12 Nepallog cha Barnabas ay Paul an nunhapit, ja khemmegkhenong an amin hachi tatakhu an na-amung ta chonglon cha khu chin piˈ-ali cha. Ja impa-innila cha hana enat Apo Jos chin Hentil hi nangchatana hi apfalinan cha Paul an nangat chin cho-or an numpfino-ob-on an milagro an panginnilaan an inapfulut na chin nuntudtuchugwan cha hana Hentil. 13 Un chaot napfalin an nunhapit ja nepallog khu hi James ja inali na hi, “A-akhi, chonglon ju hitay piˈ-aliˈ. 14 Chengngor ju chin inalin Simon Peter ad anachi an enat Apo Jos hi nangpatikhagwana ay ni pamhod na hana uchumna an Hentil ta midchum cha hay hana tatakhu na. 15 Hitay ayya an enat Apo Jos ay cha tay Hentil ja hijah tay chin inalin Apo Jos an impatulaˈ na hachi profeta chin nahop hi nangarjana hi,
16 ‘Chin nun-ap-apugwan hachi holag Ari David ja mipadchung hi pfalay an napaˈ-i ja agkhuy natoloy. Muti ha-in an hi Apo Jos ja mumpfangngachaˈ ta pfangunoˈ hini pun-ap-apugwan cha. 17 Ja an amin chi tatakhu ja tomangad cha ay ha-in, Ja midchum an amin hana Hentil an piniliˈ hi tatakhuˈ.’a 18 Hitay chi impa-innilan Apo Jos chin pengpenghana.”
19 Entoloy James an nunhapit ja inali na khu hi, “Hay gwa ay ha-in ja achi ta-o agkhu palikhaton hana Hentil an namati ay Apo Jos. 20 Hay aton ta-o ja muntulaˈ ta-o ay chicha, ta allon ta-o hi achi cha mi-ihcha hi nabnijan ja achi cha me-eloˈ hi pfu-un ahagwa cha, ja achi cha khu mi-ihcha hana agkhuy naglot ja hana chala. 21 Ti hay hato khun ta-o unuchon an Hudju ja gwa ay ni Urchin Moses an napfajag an khun mitudtuchu hi ahapfahapfachu hichi sinagogan chi Hudju hi apfuglapfuglay.”
Chin tulaˈ an impi-uy cha hachi Hentil an namati
22 Hachi apostol ja hachi pangulun chi namati ja an amin hachi namati, ja inapfulut cha chin inalin James. Ja pinili cha hay mitnud ay cha Paul ay Barnabas an mumpfangngad ad Antokya. Hay napili ja han chugwa an linala-e an cha Judas an mungngadngachan hi Barsabas ja hi Silas. 23 Ja empachon cha han tulaˈ an hay nitulaˈ ja allona hi,
“Chaˈmi an apostol an a-akhi ju hi pammati ja hato khun mangpangpangulu chi namati heto ad Jerusalem, ja tayya an muntulaˈ ami ay chaˈju an a-akhi mi an Hentil hina ad Antokya ja ad Syria ja ad Silisya. 24 Ti chengngor mi an gwacha hana narpu heto an immali hina achaan ju an nab-on chi i cha intudtuchu, ja na-apfu aju an ma-id maptoˈ hi i ju unuchon. Ipa-innila mi an pfu-un chaˈmi chi nannag hay hachi immali hina an nuntudtuchu hi nehahalla. 25 Hijaot un mi nunhahappitanan an honakhon mi hato chugwa an linala-e an mitnud ay cha tay podpodhon ta-o an a-akhi an cha Barnabas ay Paul. 26 Ti anila ta-o an cha Paul ay Barnabas ja impusta cha hini piˈtakhuwan cha an mangat an amin hi tamun Apo ta-o an hi Hesu Kristo. 27 Hotti tan honakhon mi cha Judas ay Silas an mangali ay ni intulaˈ mi ay chaˈju 28 an empanomnom ni Espiritu Santo ay chaˈmi. Ti achi mahapor an i mi ipapilit ay chaˈju an umunud hana khun mi aton an Hudju. Angkhay hay hato chi mahapor hi unuchon ju. 29 Achi aju mi-ihcha hi nabnijan ja hi chala. Ja achi aju khu umihcha hi agkhuy naglot ja achi aju me-eloˈ hi pfu-un ahagwa ju. Aphochan ju hay hato nu unuchon ju. Angkhay hay hato chi penhod mi an allon ay chaˈju.”
30 Napfalin an intulaˈ cha ja hennag cha chin linala-e an mang-uy chin tulaˈ ad Antokya. Ne-atam cha ja inamung cha an amin hachi namati ja inchat cha chin tulaˈ. 31 Pfinahan chin tatakhu ja mun-an-anla cha ay chuy maphod an tukhun. 32 Cha Judas ay Silas ja profetan Apo Jos, hotti cho-or chin intugtukhun cha hachi namati, ja impapfi-ah cha hini pammati cha. 33 Nihichi cha Judas ay Silas hi at hichi hi arkhaw, ja chin pumpfangngachan cha ad Jerusalem ja inalin hay hachi namati ad Antokya hi, “Hi Apo Jos chi manalimun ay chaˈju ingkhanah omataman ju ad Jerusalem.” Ja numpfangngad cha ay cha chuy nannag ay chicha. 34 Muti penhod Silas an muntaynan ad Antokya. 35 Nuntaynan khu cha Paul ay Barnabas hichi ad Antokya ja niˈlammong cha chin cho-or an namati an muntudtuchu ja mangkaskasaba ay ni hapit Apo Jos.
Chin nunhijanan cha Paul ay Barnabas
36 Unot immuy chi at hichi hi arkhaw ja inalin Paul ay Barnabas hi, “I ta mah pfangngachon an tikhan an amin hana intuchugwan ta an namati ay Apo Jos, ta i ta emamad hini omaˈ-atan ni pammati cha.” 37 Inapfulut Barnabas ja penhod na an piˈjajon cha hi John Mark. 38 Muti hi Paul ja achi na penhod an pitnuchon hi John Mark, ti tenaynana chicha ad Pamfilia ja agkhuy na entoloy an tomolong ay chicha. 39 Ja nunhongnger cha Paul ay Barnabas ja nunhijan cha. Initnud Barnabas hi John Mark, ja nunlukhan cha han papor an umuy ad Cyprus. 40 Pinilin khu Paul hi Silas hi pun-ibpfa na. Ja engkalalakhan chin namati ad Antokya, ta hi Apo Jos chi manalimun ay chicha ay ni agwun cha, ja un chaot epacheh. 41 Ja enenggwa cha hichi ad Syria ja ad Silisya ja nuntugtukhun cha hachi namati ay Hesus ta me-er-ellog cha hi pammati.