Luke 20

Chin nangpfokhaan cha nu ngay narpugwan chi apfalinan Hesus

¹ Gwa han ohan arkhaw an khun muntudtuchu hi Hesus hichi Templo an khuna ekasaba hini Ebanghelyo. Ja immuy ay Hesus hay hachi a-ap-apon chi papachi ja hachi memehtolon chi urchin Moses ja hachi uchumna an a-ap-apon chi Hudju. ² Ja empfokha cha ay hija hi, “Nga chah chi narpugwan ni apfalinam an mangat hay hato khun mu aton? Ja ngay nangchat ay tay apfalinam?” ³ Tempfar Hesus ja inali na hi, “Unchani adchiya ta topfalon ju pay hitay peˈpfokhaˈ. Hotti allon ju adchiya tugwali, ⁴ ngay nannag ay John Bautista an immali an khun mumbautisar? Hi Apo Jos wenno hay takhu?” ⁵ Ja khun cha manghempfopfogkha an khun cha allon chi, “Hot nga chah chi allon ta-o mah? Nu allon ta-o hi un hennag Apo Jos hot allona hi, ‘Nu hi Apo Jos chi nannag ay John ja anagkha mah ta agkhuy ju pinati hija?’ ⁶ Ja nu allon ta-o khu hi hennag chi hay takhu hot pungkhajang chita-o hay hato tatakhu, ti namati cha an profetan Apo Jos hi John.” ⁷ Hotti hay nampfar cha ay Hesus ja inali cha hi, “Ma-id anila mi nu nga chah chi nannag ay hija.” ⁸ Tempfar khu Hesus ja inali na hi, “Nu amat hina hot achiˈ khu epfaag nu ngay nangchat hi apfalinaˈ an mangat hay hato.”

Hay pangngarig hana khun meˈpfengpfeng

⁹ Amat hichi ja inalin khu Hesus hachi tatakhu hitay an pangngarig. “Gwa han ohan lala-e an nuntanum hi cho-or hi ubas ay ni kharchina ja unaot epapfengpfeng. Ja nakak an immuy hi achawwi hi pfuglay ja i napfajag hichi. ¹⁰ Unot nachakngan chin ahipokhah ja hennag na han ohan takhala na ta i meˈ-aggwa ay chuy penokhah cha an ubas. Muti hay hato an neˈpfengpfeng ja numpakhuh cha hitay an takhala ja empapfangngad cha an ma-id oh-ohha hi inchat cha ay hija. ¹¹ Hennag na khu han oha an takhala na ja numpakhuh cha khu ja pinalikhat cha ja empapfangngad cha an ma-id oh-ohha hi inchat cha ay hija. ¹² Hennag na khu chin me-atlo an takhala na ja pinalikhat cha ja empapfangngad cha an nun-ahukhatan. ¹³ Ja inalin tay nangpapfengpfeng hi, ‘Ngachah niˈ chi atoˈ? Ijam ta honakhoˈ hitay podpodhoˈ an empfalay u ta alom ja egngor hachi neˈpfengpfeng hija.’ ¹⁴ Muti unot nangalimutugwan hachi neˈpfengpfeng hichuy empfalay na ja nunhahapit cha ja inali cha hi, ‘Hijah tay hini empfalay ni khun ta-o piˈpfengpfengan an hijay mamanoh ay tay lotan ama na. Unot la-ahna ja penatoy ta-o ta chita-oy mangheˈ-a ay tay lota.’ ¹⁵ Amat hichi ja enekak cha ja penatoy cha.” Ja inalin Hesus hachi tatakhu hi, “Nga chah tugwali chi aton tay an takhu hay hachi neˈpfengpfeng ay hija? ¹⁶ Umuy hija ja epapatoy na chicha ja epapfengpfeng na hi uchumna.” Unot chengngor hachi tatakhu chin inalin Hesus ja inali cha hi, “Achi adniˈ ma-at hay hato.” ¹⁷ Emmohchong Hesus hachi tatakhu ja inali na hi, “Hotti ngay podhona an hapiton ay tay an nitulaˈ an hapit Apo Jos hi nangarjana hi,

‘Hinuy pfato an namlenan hay hana mumpakhad hi pfalay

Ja hijay numpfalin hi na-ahammad an pognad tay an pfalay.’

¹⁸ An amin hini makhah ta meˈna ay tay an pfato ja mun-igwa-itay. Ja nu meˈna hitay an pfato ay ni takhu hot mun-akhupung.”

Chin nangpfokhaan cha nu ichat cha hini pakha cha ad Rome

¹⁹ Emmopoh hay hato an inalin Hesus ja podhon hachi memehtolon chi urchin Moses ja hachi a-ap-apon chi papachi an tiligwon hija. Ti anila cha an mipfuhur hichuy an pangngarig ay chicha an nan-ug ay Hesus. Muti agkhuy cha entoloy, ti temma-ot cha hay hachi tatakhu. ²⁰ Muti nanganap cha chamchama hi aton cha an maniliw ay hija. Ja hennag chaot hachi umuy an i mamarpfali an i muntoon hi pehallaan Hesus hi hapitona ta gway panghiˈ-ingan cha an i mangchalom ay hija ay ni gobernador. ²¹ Ja inali cha ay Hesus hi, “Apo, anila mi an umannung hana khun mu allon ja hana khun mu itudtuchu. Ja anila mi khu an achim lomanon hini ituchum ta ipan-uy mu ay ni penhod hay hana munchongor muti ituchum chamchama hini umannung an podhon Apo Jos.” ²² Ja khun cha hempfogpfogkhon an allon cha hi, “Hotti hay podhon mi adchiya an annilaon ja mapfalin chah ay ni urchin ta-o an Hudju nu mumpfajad ta-o hi pakha ay ni Emperador ad Rome? Pfajachan mi chah wenno achi mi?” ²³ Na-orman Hesus an un cha toptopngan hija ja inali na hi, ²⁴ “I-ali ju hay pihu an michat hi pakha ta tikhaˈ.” Inchugwagwa cha han pihu ja inali na ay chicha hi, “Ngay nang-angah ay tay gwa ay tay pihu? Ja ngay nang-enngachan ay tay an nitulaˈ?” Tempfar cha ja inali cha hi, “Hini Emperador.” ²⁵ Ja inalin khu Hesus hi, “Hotti ichat ju ay ni Emperador hini michat ay ni Emperador, ja inchat ju ay Apo Jos hini michat ay Apo Jos.” ²⁶ Nanannor cha chin enat na an hemmongpfat, ti ma-id chi hay nappap cha hi hinapit na hi sangwanan hana tatakhu an chumalat hi pangchaloman cha ay hija, hotti un cha khemmegkhenong.

Hay amatan chi amahuwan chi tatakhu

²⁷ Gwa hay hana uchumna an Saducee an immuy ay Hesus. Saducee ayya ja achi cha mamati an gway amahuwan. ²⁸ Ja inali cha ay hija hi, “Apo, intulaˈ Moses chin urchin ay chita-o an, matoy ayya hini oha an lala-e an narhin ja ma-id empfalay na, ja mahapor an ahagwaon ni akhi na an lala-e hitay an pfupfai an napfalo, ta hana empfapfalay cha ja mipfilang an empfalay nuy natoy an ibpfa na. ²⁹ Hotti gwacha han peto an hin-a-agkhi an linala-e. Narhin chin panguluwan ja natoy an ma-id empfalay cha. ³⁰ Hijaot un nepallog chin netob ta enahagwa na khu hitay an pfalo ja natoy khu an ma-id empfalay cha. ³¹ Hotti nepallog khu chin me-atlo ja ingkhana chin me-apeto ja nun-atoy cha an amin an ma-id empfalay cha. ³² Omaˈ-angonoh ja ne-etoy hitay an pfupfai an napfalo. ³³ Hotti nu allom chi gway amahuwan chi natoy ja ngacha mah ay cha tay an peto an linala-e chi nang-en-ahagwa ay tay pfupfai nu umali hini amahuwan chi tatakhu? Ti enahagwa cha mit an amin hitay an pfupfai.”

³⁴ Tempfar Hesus ja inali na hi, “Hana tatakhu ay tay lota ja mangahagwa cha. ³⁵ Ja hay hana napili an mamahuwan an miˈtakhu hi ma-id chi pogpogna ja achi cha mangah-ahagwa, ³⁶ an amat cha hay hana angher an achi cha matmatoy. Ti empfapfalay Apo Jos chicha an minahuwana. ³⁷ Ja hini ayya amahuwan chi nun-a-atoy, ja anong un hi Moses ja piˈ-ali na an mummahu hana natoy. Ti chin intulaˈ na an omaˈ-atan chin ajiw an khun chumalang ja allona an hi Apo Jos ja hijay Jos an khun dayawon Abraham, ja hi Isaak ja hi Jakob, anong un napfajag an nanattoy cha Abraham. ³⁸ An hay podhona an hapiton ja hijay Jos hana mamattakhu an pfu-un Jos chi natoy, ti ay ni hangon Apo Jos ja mamattakhu an amin chi lennagwan chi takhu. Hotti niya an khun aju mehalla nu ehaot ju hini amahuwan chi natoy.” ³⁹ Ja inalin hachi uchumna an memehtolon chi urchin Moses hi, “Maphod hitay intuchum, Apo!” ⁴⁰ Ja empokhong cha an munhanhan, ti mun-okhon cha an mangpfokha hi uchumna.

Hay omaˈ-atan ni Kristo

⁴¹ Ja inalin Hesus ay chicha hi, “Hay nitudtuchu ja hini Hennag Apo Jos an Mamahhod ja marpu hi holag Ari David. Hotti anagkha tugwali ta allon khu David hi ‘Apo’ ay hija? ⁴² Umannung an hijay Apon David, ti gwa han intulaˈ David ay ni Libjun chi Psalms an allona hi,

‘Inalin Apo Jos ay nuy tenangad u an Apoˈ hi,

“Umpfun a ay tay nun-appit hi agwan u,

⁴³ Ingkhana hi pangapfakaˈ an amin hana pfuhur mu ta he-ay tangachon cha.”’

⁴⁴ Inalin Ari David hi, ‘Apo’ ti napfagpfagto hitay Hennag Apo Jos an Mamahhod mu hija. Nu amat heto chi allon David, ja hini hahadchon ju ja pfu-un la-eng holag David ja angkhay.”

Pinahiw Hesus hachi memehtolon chi urchin

⁴⁵ Gwa an munchochongngor hachi tatakhu ja inalin Hesus hay hachi disipolo na hi, ⁴⁶ “Tikhagwun juwot niˈ ta achi aju munchunu hay hana memehtolon chi urchin Moses. Ti hay hana ayya ja un cha mumpa-akhaja an munlopfong hi makhajad ja podhon cha an gway khun mangpaˈpa-innila ay chicha hi achoˈlan chi tatakhu. Ja am-amja-on cha khu an i umpfun hana umpfunan chi a-ap-apo hichi sinagoga ja nun gwachaan chi pfehta. ⁴⁷ Ja pomloh cha hi khina-un chi pfalo ja khurkhulaton cha an manganchu-oy an mungkalalag ta allon kan kaykhu hana tatakhu hi nasantuwan cha. Hotti munnaud chi i cha adusaan khapo hay hato khun cha aton.”