7
Chin nangpatengngan Hesus han takhalan han kapitan an eRome
1 Empa-opoh Hesus hay hato inali na hachi tatakhu ja immuy hichi ad Kapernaum. 2 Ja gwa hichi han ohan kapitan chi hinchalo. Ja gwa han takhala na an podpodhona an khun munchokhoh ja khumaju an matoy. 3 Unot chengngor chin kapitan an immali hi Hesus ja pfinaar na hachi uchumna an ap-apon chi Hudju ta i cha pfokhaan hi Hesus ta epatenong na hichuy takhala na. 4 Immuy cha ay Hesus ja numpakpaka-ahi cha an nangali hi, “Umali a adniˈ, ti mahahapor ni kapitan hini tolong mu. 5 Ti anong un pfu-un padchung an Hudju ja podpodhon chita-o. Ti empahaˈ-ad na han sinagoga mi.” 6 Amat hichi ja niˈjuy hi Hesus ay chicha.
Unagkhu gwa an mehnot cha Hesus ay chuy pfalay chin kapitan ja chinittum chaot hachi hennag na an khayyum na. Ja inali cha ay Hesus chin inalin ni kapitan an amat heto. Inali na hi, “Apo, khahinon un a miˈjali hi pfalay mi. Ti pfuma-inaˈ. 7 Ja pfuma-inaˈ khu an umali ay he-a. Ti ammuna un mu allon hi tomenong hitay takhalaˈ hot ma-at. 8 Ti anong un ha-in ja gway apoˈ an khun mamaar ay ha-in, ja gwacha khu hana hinchaloˈ an khun u pfaalon. Ti alloˈ ay ni oha an hinchalo hi, ‘Umuy a!’ ja immuy. Ja alloˈ khu ay ni oha hi, ‘Umali a!’ ja immali. Ja alloˈ ay ni takhalaˈ hi, ‘Atom hitay!’ ja enat na. Ja om-omod ay he-a an gway apfalinam an mangali hot ma-at.” 9 Ja nanor hi Hesus hi nangngolana ay tay inali cha. Nunligkhoh ja inali na hachi atakhutakhu an ninitnud ay hija hi, “Alloˈ ay chaˈju hi ma-id oha hi Hudju hi tinnig u an gway pammati na an miˈpadchung ay ni otong an pammatin tay pfu-un Hudju.” 10 Numpfangngad hay hachi hennag chin kapitan ja chinakngan cha chin takhala an temmenong.
Chin nanakhuwan Hesus han empfalay han pfalo
11 Amat hichi ja immuy khu hi Hesus han ohan pfuglay an ad Nain. Ja ninitnud hachi disipolo na ja hachi cho-or an tatakhu. 12 Unagkhu gwa an mehnot cha ay chuy an pfuglay ja chinittum cha hachi umuy munlapfun. Hichuy an natoy ja un oh-ohha an lala-e an empfalay han pfalo. Ja cho-or chin tatakhu ay chuy an pfuglay an nitnud. 13 Unagkhu tinnig Apo Hesus hichuy an pfalo ja ninignikha na ja inali na hi, “Ammuna, epokhong mu an kumila.” 14 Immuy ja hen-a na chin longon chuy natoy ja intaˈchug hachi nangpipi-ug. Ja inalin Hesus chin natoy hi, “Pfumangon a.” 15 Pfimmangon hichuy natoy ja himmapit. Ja inalin Hesus chin pfalo hi, “Tayya hitay empfalay mu.” 16 Nang-entata-ot an amin hachi atakhutakhu ja nundaydayaw cha ay Apo Jos ja khun cha allon hi, “Tayya an numpatikhaw ay chita-o hitay an napfagto an profeta. Maphod ti tayya an nenomnom chita-o an takhuwon ay Apo Jos.” 17 Hitay an enat Hesus ja nunchongor an amin hichi ad Judea ja chin nun-ehnot an pfuglay.
Chin inalin Hesus hachi hennag John Bautista
18 Chin disipolon John Bautista ja impa-innila cha ay hija an amin chi ena-enat Hesus. Hotti hennag John han chugwa an disipolo na 19 an umuy ay Hesus ta i mangpfokha hu-un hija chah hini inalin John an hennag Apo Jos an hahadchon cha, wenno hay oha.
20 Unot emmatam hachi hennag John ja inali cha ay Hesus hi, “Hennag chaˈmi ay John Bautista ta mahmahan mi hu-un he-a chah chin inali na an mamahhod an umali?” 21 Amat hichi ja empatenong Hesus hachi mumpunchokhoh ja nun-epakak na hachi nun-ehohoˈlong an napukhit an ispiritu ja inchatana hi pannig hachi nun-apfulaw. 22 Nakhibpfoh hay hato an enat Hesus ja unaot allon ay cha chuy hennag John hi, “Mumpfangngad aju ta allon ju ay John hay hato tinnig ju ja chengngor ju. Allon ju chi tinnig mi an hana napfulaw ja tumikhaw cha, hana napechoy ja chumalan cha, hana na-unit ja temmenong cha, hana napo-it ja chomngor cha, ja hana nun-atoy ja timmakhu cha. Ja khun mekasaba hini maphod an Hapit Apo Jos hana napubli. 23 Ja allon ju khu hi madmachennor hini takhu an achi munhalinchugwa hini nomnom na ay ha-in.”
Chin impa-innilan Hesus an omaˈ-atan John Bautista
24 Amat hichi ja nakak hachi hennag John, ja inalin Hesus hini omaˈ-atan John ay cha chuy atakhutakhu. Inali na hi, “Chin immajan ju ay John hichi let-ang ja ngay nenomnom ju hi i ju tikhan? Unchah hay potaar an khun mumpfiwpfiwwapfiw? Pfu-un. 25 Hot ngachah mah chi i ju tinnig? Un aju chah immuy ta tikhan ju hay takhu an maphod chi lopfong na? Pfu-un khuh niˈ, ti hana ayya khun munlopfong hi maphod ja maphod chi piˈtakhuwan cha, ja hay pfalay chi ari chi punhihittugwan cha. 26 Hot ngachah tugwali chi i ju tinnig? Hay profetan Apo Jos? Aa, ja alloˈ ay chaˈju an napfagpfagto pay hija mu hana uchumna an profeta. 27 Ti hi John hini nitulungan ni nitulaˈ an hapit Apo Jos hi nangarjana hi, ‘Tayya an honakhoˈ hitay mangpangpangullu ja un he-a ta ehakhana na hini agwum.’”a 28 Ja inalin khuh Hesus hi, “Alloˈ ay chaˈju an hi John Bautista hini napfagpfagto an amin hi hay takhu heto lota. Muti napfagpfagto pay hini nabnababba an takhu an nidchum ay ni Pun-ap-apugwan Apo Jos hi tatakhu.”
29 Achechenor hi pangngolan hachi cho-or an tatakhu ja anong un hachi khun munhenger hi pakha chin inalin Hesus. Ti inunud cha hana magpong an in-urchin Apo Jos ja numpabautisar cha ay John. 30 Muti hana Farisee ja memehtolon chi urchin Moses ja ngumanu cha an umapfulut chin penhod Apo Jos hi aton cha ja agkhuy cha khu numpabautisar ay John.
31 Ja inalin khu Hesus hi, “Alloˈ ay chaˈju hini eˈ-eˈnongan ju an tatakhu ad ugwani an timpo, an 32 meˈmeˈnong aju hana ung-ungungnga an um-umpfun hinun palaha an munlewlegwa muti ma-id maptoˈ hi podhon cha. Ti iˈgwap hana uchumna an allon cha ay ni khun cha peˈlewlegwa hi, ‘Nanongngali ami muti agkhuy aju temmajaw. Ja emmepfer ami muti agkhuy aju niˈkila.’ 33 An amat ay chaˈju an ma-id maptoˈ hi podhon ju. Ti immali hi John Bautista ja khun mun-ayunar ja achi umin-inum hi pfajah, ja allon ju hi un mun-angaw. 34 Ja tan immalijaˈ an Na-ilangitan an Takhu, ja khunaˈ meˈ-orpfong an meˈ-an, ja nuja an pahigwonaˈ an khun ju allon hi, ‘Tikhan ju akay niˈ hitay an takhu an nahopo ja khun mapfutong. Ja niˈkhayyum khu hana khun munhenger hi pakha ja hana uchumna an nun-apfahulan an tatakhu!’ Hotti tayya an pahigwon chaˈmi an chugwa. 35 Muti nomnomon ju hitay, an hini aphod ja kinala-eng Apo Jos ja matikhaw ay ni piˈtakhuwan hay hana nangapfulut ay ni intudtuchu mi ay John.”
Han pfupfai an cho-or chi pfahor na an penakawan Hesus
36 Gwa han Farisee an hi Simon chi ngachana an nangajakhan ay Hesus ta miˈjuy hichi pfalay cha an i meˈ-an. Hotti niˈjuy hi Hesus ja i neˈ-orpfong. 37 Ay chuy an pfuglay an niˈjajan Hesus ja gwa han pfupfai an miˈlalala-e. Chengngor na an i nummangili hi Hesus ay chuy nunhitugwan chin Farisee ja in-uy na han mumpfango an lanob an ninitto han alabastro an pfoterja. 38 Timmataˈchug hichin negpongan Hesus ja khun kumila ja nuntidtid chin luwa na hichin hu-in Hesus. Impuˈnah chuy pfupfai chin pfuuˈ na ja inungngu na chin hu-in Hesus ja unaot khu epelanob chin mumpfango an lanob.
39 Unot tinnig chin Farisee an nangajakhan ay Hesus ja khuna nomnomnomon hi, “Mu pfu-un ay chita profeta hi Hesus. Ti khulat ta profeta hot anila na an napukhit chi ugalin tay an pfupfai an khun man-a ay hija.” 40 Ja inalin Hesus ay chuy Farisee hi, “Simon, gwa han alloˈ ay he-a.” Tempfar Simon ja inali na hi, “Ngachah nuy allom, Apo?” 41 Ja inalin Hesus hi, “Gwa han chugwa an lala-e an immutang han khun mumpa-utang hi pihu. Lemay khahot chi utang chin oha ja lemay polo chi utang chin oha. 42 Ma-id epfangngad cha ja agkhuy na empapallog. Ngachah tugwali chi anilam ay cha tay an chugwa hi ot-ottong chi pamhod na ay chuy immutangan cha?” 43 Tempfar Simon ja inali na hi, “Hinuy nin ot-ottong chi utang na.” Ja inalin Hesus hi, “Umannung hitay nampfar mu.” 44 Nunligkhoh ay chuy pfupfai ja inali na ay Simon hi, “Tikham hitay an pfupfai. Tan immalijaˈ heto pfalay ju ja agkhuy mu enat hini ugali ta-o an ma-id inchat mu hi chanum ta nangulah u ay tay hu-iˈ. Muti hitay an pfupfai ja inulahana hay hato hu-iˈ ay ni luwa na ja impuˈnah na hichuy pfuuˈ na ay tay hu-iˈ. 45 Ja agkhujaˈ inungngu ay he-a hi immaliyaˈ muti inungngu-ungngun tay an pfupfai hay hato hu-iˈ an ente-a na hi chimmakngaˈ. 46 Ma-id ni-iˈchat mu hi lanob ta elanob u ay tay pfuuˈ u muti hitay an pfupfai ja lenanob na hitay hu-iˈ hi mumpfango an lanob. 47 Ja tayya an alloˈ ay he-a an hitay otong an impatikhaw na an pamhod na ja hijay panginnilaan an napakawan hay cho-or an pfahor na. Muti hini takhu an it-ittang hini empakawana an pfahor ja it-ittang khu hini pamhod na ay Apo Jos.”
48 Ja inalin khu Hesus ay chuy pfupfai hi, “Napakawan an amin chi pfahor mu.” 49 Khun nomnomnomon chin uchumna an neˈ-orpfong ay Hesus hi, “Ngachah agkhu niˈ tay an takhu an mamakawan pay hi pfahor?” 50 Ja inalin Hesus ay chuy pfupfai hi, “Khapo ay ni pammatim ja miˈtakhu a. Hotti mun-an-anla a an umanamut.”