14
Chin nunhahappitanan cha hi aton cha an mamatoy ay Hesus
1 Chugway arkhaw hi malahin ja un machakngan chin penghan chi arkhaw chin Pfehtan Chin Tenapay an Ma-id Pfinoˈpfoˈ Na, ja arkhaw an pangnomnoman hachi Hudju chin Nalohan Chin Angher Apo Jos. Hachi a-ap-apon chi papachi ja chin memehtolon chi urchin, ja nunhahapit cha hay aton cha an maniliw ay Hesus ta ma-id manginnila ta epapatoy cha. 2 Ja inali cha hi, “Achi ta-o koma etongor ay tay umali an pfehta an achoˈlan chi tatakhu, ti unchani ja chumalat hi pumpapattajan chi tatakhu.”
Chin nanghiitan han pfupfai hi lanob chin ulun Hesus
3 Hichin agawwachaan cha Hesus ad Betani hi pfalay Simon an oha an na-unit an enakhahan Hesus, ja khun cha mangan hi himmigpan han pfupfai. Inu-ugnana han alabastro an pfoterja an nittugwan chi naˈ-angngina an lanob an allon cha an nardo. Nehnot chin pfupfai ay Hesus ja entoˈgwab na chin pfoterja ja unaot ihiit chin lanob ay chuy ulun Hesus. 4 Lemmallataˈ hachi uchumna an nangmomodhong ay chuy enat na ja hingupfungupfu cha an mangali hi, “Ay-ayyu a mah hichuy an lanob an una am-amhan. 5 Munnaud an nangina hichuy an lanob an pfoˈlaon hi ohay tagwon. Uchuˈchuna agkhu niˈ una ingngina ta ichat na hini pfajad na hay hana napubli.” Ja khun cha amujuwan chin pfupfai. 6 Muti nunhapit hi Hesus ja inali na hi, “Achi ju amujuwan hija! Khegkhenong aju ta ikhad hija, ti pfuher hitay enat na ay ha-in. 7 Hana ayya publi ja gawwacha cha ay chaˈju hi a-arkha-arkhaw ja mapfalin an tulungan chicha hi kompormi an arkhaw. Ha-in ayya ja nehnot chin arkhaw an panaynaˈ ay chaˈju. 8 Hitay an pfupfai ja enat na hini mapfalina an peˈ-at. Ti inhiit na ta lanob ay tay achor u ta memehhod ay ni umali an pilub-aˈ. 9 Umannung hitay alloˈ. An amin chi omajan hana mangkaskasaba ay ni Ebanghelyo ay tay nunleneˈgwoh tay lota, ja pigpiggwon cha hitay enat tay pfupfai ta achi malidlichuwan.”
Niˈ-apfulut hi Judas hi pamatajan cha ay Hesus
10 Amat hichi ja immuy hi Judas Iskariot, an oha ay cha chuy himpolo ta chugwa an adalan Hesus, an i nangali hay hachi a-ap-apon chi papachi hi e-agwat na hi Hesus ay chicha. 11 Nun-an-anla cha an nangngor ja inali cha hi ichat cha hay pihu an lagpfu na. Hotti henehemmon Judas hay atona an mangtuchu ay Hesus ta tiligwon cha.
Chin niˈ-orpfungan Hesus hachi adalana chin Pfehta
12 Nachakngan chin penghan chi arkhaw chi Pfehta an Panganan cha hi Tenapay An Ma-id Pfinoˈpfoˈ Na, ja hichuy chi khun cha pumpartiyan hi pfoˈtot an karnero an Pangnomnoman cha Chin Nalohan Chin Angher Apo Jos. Immuy hachi adalan ay Hesus ja inali cha hi, “Ngay podhom hi i mi punhakhanaan ay ni anganan ta-o ay tay Pfehta?” 13 Hennag Hesus han chugwa ay chicha ja inali na hi, “Umuy aju ad Jerusalem. Chittumon chaˈju han lala-e an nangpipi-ug han pun-otanan, ja unuchon ju 14 ay ni pfalay an i na humigpan, ja allon ju ay ni nunheto hi, ‘Inalin ni Apo ta-o hi chaad mah anu hini kwarto an panganana an peˈ-anan mi an adalana ad ugwani an Pfehta.’ 15 Hot hini nunheto ay nuy an pfalay ja ituchu na hini nangennaˈjab an otongngan an kwarto an gwah chi an amin chi mahapor. Ja hichi chi punhakhanaan ju ay ni anganan ta-o.”
16 Empacheh chin chugwa an adalan an umuy ad Jerusalem ja immannung an amin chin inalin Hesus. Ja enhakhana cha chin anun cha ay chuy an pfehta an i cha Pangnomnoman chin Nalohan chin Angher Apo Jos.
17 Unagkhu nadhom ja immuy cha Hesus hachi himpolo ta chugwa an adalana ay chuy an pfalay. 18 Khun cha mangan ja inalin Hesus hi, “Umannung hitay alloˈ ay chaˈju, an gwa han oha ay chaˈju an neˈ-o-orpfong an i mangpfaag ay ha-in hana pfuhur u.” 19 Magkhoh hi punleˈnaan hachi adalan ay chuy inalin Hesus ja un gwahchinonon hon at hi mangpfokha hi, “Apo, un chah ha-in hini allom an mangat?” 20 Tempfar Hesus ja inali na hi, “Ohanna ay chaˈju an himpolo ta chugwa chi mangngina ay ha-in. Khun meˈhawhaw ay ha-in hi tenapay ay tay chuju. 21 Ti ha-in an Na-ilangitan an Takhu ja matojaˈ an matoy ta mipa-annung chin impatulaˈ Apo Jos hachi profeta chin hopapna. Muti un kaykhu ka-ahi hini mangngina ay ha-in. Toˈ-onot un agkhuy netoˈkhong hija!”
22 Gwa an khun cha mangan ja unot alan Hesus han tenapay ja nunyaman ay Apo Jos ja initta-ittang na. Ja enggwanah na chin adalan ja inali na hi, “Anun ju, ti hitay hini achor u.” 23 Ja enala na khu hini pfahu an nittugwan hi chanum chi ubas. Nunyaman ay Apo Jos ja inchat na ay chicha ta hiniˈ-itangon cha an inumon. 24 Ja inali na hi, “Hijah tay hini chalaˈ an mangpa-annung hi neˈtobpfalan Apo Jos ay chaˈju. Umajuh hitay chalaˈ ta gway aton chi pfahor hana cho-or an tatakhu an mapakawan. 25 Alloˈ ay chaˈju hi hitay chi ang-angonohna hi piˈ-inumaˈ hi chanum chi ubas ingkhanah chin arkhaw an panginumaˈ ay ni nat-on an chanum chi ubas ay nuy Pun-ap-apugwan Apo Jos.”
26 Emmopoh hitay inalin Hesus ja engkanta cha han ohan Psalm ja un chaot epacheh an umuy hichi pfulludna an ad Olibo.
Impa-innilan Hesus chin panghaotan Peter ay hija
27 Inalin Hesus chin adalana hi, “Anilaˈ an te-a-anaˈ ay chaˈju an amin. Ti allona ay ni Hapit Apo Jos hi, ‘Patajoˈ hini khun mumpahtor hot mahihijaˈ an amin hay hana karnero.’a 28 Muti nummahuwaˈ ayya ja ipanguluˈ an umuy ad Galilee ta hichi punchichittuman ta-o.” 29 Ja inalinot Peter hi, “Anong un chi-a taynan hato uchumna an adalan ja achiˈ taytaynan he-a.” 30 Ja inalin Hesus ay hija hi, “Umannung hitay alloˈ. Ehaotaˈ ay he-a hi mumpitlo ad ugwani an lapfi ja unot mumpiggwa an tumalanu han agwitan.” 31 Muti impapilit Peter an nangali hi, “Achiˈ ehaot he-a, anong unaˈ me-etoy.” Ja amat khu hina chin inalin an amin hachi adalan.
Chin nungkalalakhan Hesus hichi ad Getsemane
32 Amat hichi ja immuy cha Hesus han lukhar an nangadnan hi Getsemane, ja inali na chin adalana hi, “Mehetay aju ta umujaˈ mungkalalag.” 33 Muti initnud na hi Peter ja hi James ja hi John. Munnaud an munchokhoh hi punnomnomana, 34 hotti inali na ay chicha hi, “Ma-id ay chita an munnaud an machamot hi punleˈnaaˈ ja tan omataˈ hi matoy. Hotti mehetay aju ja achi aju agkhu maloˈ ta un aju miˈtu-ar ay ha-in.” 35 Nakhibpfoh chin inali na ja pfinumtaw an i nunheppe an nungkalalag ta nu mapfalin ayya ja achi na koma hoˈmon hini umali an punlikhatana. 36 Inali na hi, “Ama, mapfalin mu an aton an amin hini penhod mu, hotti nu mapfalin ja ergwangaˈ ay nuy umali an apalikhataˈ. Muti pfu-un hini podhoˈ chi ma-at ta hini podhom.”
37 Numpfangngad hi Hesus chin agawwachaan chin tolo an adalana ja chinakngana chicha an nanalloˈ. Ja inali na ay Peter hi, “Simon, un a chah agkhu naloˈ? Un chah achi mapfalin an miˈtu-ar a ay ha-in hi ohay upfun mah niˈ? 38 Achi aju agkhu maloˈ ta un aju gwot meˈkalalag ta achi aju ma-apfak nu matopngan hini pammati ju. Ti anilaˈ an ay ni nomnom ju ja podhon ju an miˈ-unud muti ma-id olog ni achor ju.” 39 Amat hichi ja immuy an i khu nungkalalag ay Apo Jos ja piniggwa na chin engkalalag na. 40 Numpfangngad khu hi agawwachaan cha chuy tolo an adalan ja chinakngana chicha an nanalloˈ, ti achi medpor chin enloˈ cha. Pfimma-in cha ja ma-id maptoˈ hi pampfar cha ay Hesus. 41 Hotti hin-immuy khu hi Hesus an i nungkalalag. Ja chin petlon chi numpfangngachana ja inali na hachi adalan hi, “Hot anagkha mah un aju agkhu mamalloˈ ja mun-en-enana? Ammuna akay niˈ hini enloˈ ju, ti toja an nachakngan hitay timpo an eneˈchan Apo Jos hi ipulangaˈ an Na-ilangitan an Takhu ay cha nuy napfahulan an tatakhu. 42 Lomeggwat aju, ti chuja an umali hichuy nangngina ay ha-in.”
Chin naniligwan cha ay Hesus
43 Khun pay munhapit hi Hesus ja emmatamot hi Judas, an oha ay cha chuy himpolo ta chugwa an adalan, an impfupfulog na hachi cho-or an tatakhu an numpumpfangid ja numpumpang-or cha. Hay nannag ay chicha ja chin a-ap-apon chi papachi ja chin memehtolon chi urchin Moses ja chin uchumna an a-ap-apon chi Hudju. 44 Ja intudtuchun Judas han pangmatunan cha ay Hesus, an hini takhu an agwalona ja hija chi tiligwon cha ta gwarjaan cha an ekak. 45 Hotti un chaot emmatam ja immuy hi Judas ta enagwar na hi Hesus ja inali na hi, “Apo!” 46 Ja nehom hachi numpun-ibpfa na an i numpangugnan ay Hesus.
47 Henoˈnot chin oha an niˈtataˈchug ay Hesus chin pfangid na ja impakhit na chin takhalan chi natakhay an pachi hotti nakhingahan chin inga na. 48 Ja inalin Hesus hachi tatakhu hi, “Unaˈ chah ngumangannu ta numpfapfangid aju ja numpun-ochon aju hi pang-or an immali an mampap ay ha-in? 49 A-arkha-arkhaw ja gawwacha ta-o an amin hichi Templo hi khun u puntudtuchugwan ja agkhujaˈ tiniliw. Mahapor chamchama an mipa-annung hana nitulaˈ an Hapit Apo Jos.” 50 Nakhibpfoh hitay an inalin Hesus ja nahijaˈ hachi adalan ja nataynan hija.
51 Gwa han unga an lala-e an khun mangunud ay cha Hesus an nun-u-uloh ja angkhay. Lenom hachi tatakhu an tiligwon hotti linapchuˈ cha chin uloh na. 52 Ja at hi nangepolag chin uloh hotti lemmajaw an nummomolleh.
Chin nanumarjaan chin a-ap-apo ay Hesus
53 Nun-ugnan cha hi Hesus ja in-uy cha ay ni pfalay chin natakhay an pachi. Hichi chi na-amungan an amin chi a-ap-apon chi papachi ja memehtolon chi urchin Moses ja chin uchumna an a-ap-apon chi Hudju. 54 Khun mangun-unud hi Peter ingkhanah emmatam chin partug chin pfalay chuy natakhay an pachi. Ja ni-ipfun ay cha chuy gwarja an miˈ-anichu.
55 Chin a-ap-apon chi papachi ja an amin chin numpun-ibpfa cha an membron chi Sanhedrin, ja henehemmon cha hay panghiˈ-ingan cha an pamatajan ay Hesus muti ma-id chinakngan cha. 56 Ti cho-or chi nunlahlah an nuntihtikhu an nangpeˈla hi pfahor Hesus, muti agkhuy numpapadchung chin inali cha. 57 Gwacha hachi uchumna an munlahlah an timmaˈchug ta tihtikhuwan cha 58 an chengngor cha an inalin Hesus hi, “Paˈ-iyoˈ hini Templo an henaˈ-ad chi tatakhu muti un umuy chi toloh arkhaw hot ehaˈ-ad u hay oha hi mepallog an pfu-un takhuy nangephod.” 59 Muti anong un chicha ja achi mumpapadchung chin inali cha. 60 Hotti timmaˈchug chin natakhay an pachi ay chuy gawwachaan cha ja inali na ay Hesus hi, “Anagkha ta achi a tompfar? Ngay pampfar mu hay hato epapfahor cha ay he-a?” 61 Muti khemmegkhenong hi Hesus. Ja inalin khu chin natakhay an pachi hi, “He-a chah hini Mamahhod an Empfalay ni madaydayaw an Jos?” 62 Tempfar Hesus ja inali na hi, “Umannung hinuy inalim, ja umali han arkhaw an panikhan ju ay ha-in an Na-ilangitan an Takhu an mi-i-ibpfun ay ni nun-appit hi agwan Apo Jos an Napfagpfagtuwan. Ja tikhanaˈ khu hi pumpfangngachaˈ an marpu ad uchu an midchum hi pfonot.” 63,64 Amat hichi ja hinaˈ-in chin natakhay an pachi chin lopfong na khapo hi pfungot na. Ja inali na hachi tatakhu hi, “Tayya an chengngor ta-o hitay inali na an ipadchung na hini achor na ay Apo Jos. Hotti un chah khahin khu un gway muntihtikhu? Ngay allon ju tugwali?” Ja inapfulut cha an amin an gway pfahor na hotti mahapor an matoy hija. 65 Ja ente-an hachi uchumna an manuppaan chin angah na ja inukupan cha chin mata na. Nunhuntuk cha hija hon inali cha hi, “Nu profeta a, pfugwaom adchiya nu nga cha nuy nanuntuk ay he-a.” Ja nunlaˈlaˈ hachi gwarja ja nunhoplat cha hija.
Chin nanghaotan Peter ay Hesus
66 Ay chuy an ni-i-ibpfunan Peter chin partug chuy pfalay ja naloh han pfalahang an takhalan chi natakhay an pachi. 67 Unaagkhu tinnig hi Peter an niˈ-a-anichu ja emmomohchong na ja inali na hi, “Oha a jaˈ an khun mitnud ay Hesus an eNazaret.” 68 Enhaot Peter ja inali na hi, “Pfu-un mangkay! Achiˈ anila ja achiˈ ma-awatan hinuy khun mu allon.” Amat hichi ja empacheh na an umuy hichi pingngit chin partug. Ja timmalanu han agwitan. 69 Hintinnig khu chin pfalahang hi Peter ja inali na hachi niˈtataˈchug hi, “Hitay an lala-e, ja hija chi oha an khun mitnud ay cha Hesus.” 70 Ja hen-enhaot khu Peter. Unot achi mapfajag ja inalin hachi niˈtataˈchug ay hija hi, “Umannung an nidchum a ay chicha, ti un a chah pfu-un eGalilee?” 71 Ja enhaot khu Peter an inali hi, “Pfu-un numpay! Anong ja dusaonaˈ ay Apo Jos hi un lahlah hitay alloˈ, ti agkhuy u anila hinuy an takhu an khun ju hapiton!” 72 Ja ay chuy gwot ja impiggwan chin agwitan an timmalanu, ja nenomnom Peter chin nangarjan Hesus ay hija hi, “Ehaotaˈ hi mumpitlo ad ugwani an lapfi ja un mumpiggwa an tumalanu han agwitan.” Ja achi anhan chin kilan Peter khapo hi tutuju na.