13
Impa-innilan Hesus chi apaˈ-iyan ni Templo
1 Unagkhu gwa an makak cha Hesus hichi Templo ja inalin han oha an disipolo na hi, “Tikham, Apo, hitay Templo an mapmaphod ja napfarpfalongabpfingan, an o-otong hay hato pfato an apja na!” 2 Tempfar Hesus ja inali na hi, “Tayya an matikhaw ju hitay otong an Templo an napfarpfalongabpfingan, muti umali han arkhaw hot mun-ahagwer ja mun-egwa-at cha hay hato pfato an apja na.”
Hana likhat ja apahigwan chi namati
3 Nunti-id cha Hesus ay chuy pfulludna an ad Olibo an ni-a-adchumang chin Templo ja inumpfun. Immi-igway cha Peter ja hi James ja hi John ja hi Andrew an i niˈhapit ay hija. 4 Ja inali cha hi, “Apo, aˈ-anunay pa-atan hay hato inalim? Ipa-innilam adchiya hay pang-imatunan ay ni pa-atana.” 5 Tempfar Hesus ja inali na hi, “Tikhagwun ju gwot niˈ ta achi aju ma-allilaw. 6 Ti cho-or chi umali an mangali hi, ‘Ha-in hini Hennag Apo Jos an Mamahhod’ ja cho-or chay mamati muti un cha mapfarpfalijan. 7 Nu chonglon ju an gway mungkhukhupfat hana nehegkhon an pfuglay ja ipa-innila cha khu an gway mungkhukhupfat hana nun-i-achawwi an pfuglay, ja achi aju tomakhaw. Ti mahapor an ma-at hay hato muti pfu-un pay hitay chi pogpogna. 8 Hay ma-at ja mungkhukhupfat chi apfuglapfuglay ja anong un hay hana nasyon. Ja gwachay khihu ton numpfino-ob-on an pfuglay, ja umali chi ulat. Muti hay hato ja un pay teˈte-aan hana umali an punlikhatan heto lota.
9 Hotti chaˈju an khun u tuchugwan ja pa-ennongan ju. Ti ijuy chaˈju hana hugwi ta echalom chaˈju, ja ipahuplit chaˈju hichi sinagoga. Ja ijuy chaˈju hay hana gobernador ja ar-ari khapo hi nangunuchan ju ay ha-in, ja hinuy chi timpo an puntihtikhuwan ju ay chicha ay ni hapit u. 10 Ja mahapor an mekasaba hitay Ebanghelyo an amin hi apfuglapfuglay ja un mapogpog hitay lota.
11 Nu tiligwon chaˈju ja enchalom chaˈju ja achi aju madanakhan hi hay aton ju an manongpfatan ay chicha. Ti ay nuy an timpo ja ituchun Apo Jos hay ehongpfat ju. Hot pfu-un chaˈju ja angkhay chi munhapit, an hini Espiritu Santo chi mangchalan ay chaˈju. 12,13 Ay nuy an timpo ja pfuhulon chaˈju an amin hi tatakhu khapo hi nangunuchan ju ay ha-in. Hana uchumna ja anong un hana a-akhi cha ja epfaag cha hana a-ap-apo ta patajon cha. Amat khu hina chi aton ni oha an ammod hay empfalay na. Ja hana ungunga, chuˈkhon cha hana a-ammod cha ja empapatoy cha chicha. Muti hana mangedpor hay hato ingkhanah atajan cha an achi cha epfot hini pammati cha, ja miˈtakhu cha.”
Hini Pumapaˈ-i an Apfopfohor hi Pannikhan Apo Jos
14 Entoloy Hesus an nangali hi, “Unchani hot tikhan ju hini na-ali-ali an ‘Pumapaˈ-i an Apfopfohor hi Pannikhan Apo Jos’ an immuy agkhu niˈ ta i tumaˈchug hichi Templo an agkhuy nechaag hi i na oma-ayyan. Chaˈju an khun mumpfaha, mahapor an ma-awatan ju. Nu pfumutay hitay na-ali an Pumapaˈ-i hot lomajaw hana gwa ad Judea ta umuy cha hichi pfuludna. 15 Hini takhu an gwa hi partug nuy pfalay na ja achi agkhu i humikhop ta alaonay khina-u na, ta un atoˈtogna ja empacheh na an lomajaw. 16 Ja hini takhu an gwa hichi pajaw ja achi na ihi-ar an umanamut an i mangala hi uchumnah lopfong na ta un atoˈtogna ja lemmajaw. 17 Munnaud aju an malikhatan ay nuy an timpo, om-omod hay hana numpunhapfin ja hana khun mumpahuhu! 18 Mungkalalag aju ta ma-at ayya hay hato ja achi metongor hi ahitungnin. 19 Ti nete-a chin na-apjaan tay lota ja ingkhana ad ugwani ja ma-id chi hay immali hi likhat hi miˈpadchung ay tay umali an munlinapoh an likhat. Ja anong un hi uchum chi arkhaw ja ma-id ma-at hi likhat an amat heto. 20 Ma-umah an amin chi tatakhu nu agkhuy koma inhumang Apo Jos an mangpahoˈhoˈchod ay ni timpo an punlikhatan cha. Hoˈhoˈchochona khapo hi khohkhoh na hay hana tatakhu an pinili na.
21 Nu khulat ta gway mangali hi ‘Tayya hini Hennag Apo Jos an Mamahhod!’ wenno ‘Chuyya hija’ ja achi ju pattiyon. 22 Ti gwacha hana pfumarpfali an mangali hi un chicha anu hini Hennag Apo Jos an Mamahhod, ja uchumna ja allon cha hi chicha anu chi profetan Apo Jos. Gway apfalinan cha an mangat hi numpfino-ob-on an milagro ta mapfalijan chi tatakhu, anong un hana tatakhu an pinilin Apo Jos nu apfalinan cha an aton. 23 Hotti pa-ennongan ju, ti tayya an impa-innilaˈ an amin hay hato ja un cha ma-at.”
Chin pumpfangngachan Hesus an marpu ad langit
24 Entoloy Hesus an nangali hi, “Mahiˈnut an ma-at hay hato an likhat an inaliˈ hot homelong hichuy hukhit ja achi khu humilaw hichuy pfulan. 25 Makiharpfu ad uchu hot mun-a-akhah hachi pfittuwan. 26 Ay nuy an timpo ja tikhanaˈ an Na-ilangitan an Takhu, marpuwaˈ ad langit an midchum hi pfonot. Magwachaanaˈ hi pfinang ja munnaud chi apfalinaˈ. 27 Ja honakhoˈ hana angher u an umuy ay tay nunleneˈgwoh tay lota ta amungon cha hana tatakhu an piniliˈ an amin hi apfuglapfuglay.”
Hay epa-achar ni ajiw an higos
28 Inalin khu Hesus hi, “Nomnomon ju hini ajiw an higos ti gwa han epa-achar na. Ti hini ayya higos, nu tikhan ju an umughoˈ ja tumupfu hot ma-innila an nehnot hini tijarkhaw. 29 Amat hina khu, nu tikhan ju an khun ma-at hato inaliˈ, hot ma-innila ju an nehnot hini pumpfangngachaˈ. 30 Umannung hitay alloˈ an achi pay matoy an amin chi tatakhu ay tay an himpangapo hot ma-at an amin hay hato inaliˈ. 31 Hitay lota ja ad uchu ja ma-upfah cha, muti achi ma-ub-upfah hitay hapit u.”
Ma-id nanginnila hi pumpfangngachan Hesu Kristo
32 Entoloy Hesus an nangali hi, “Ma-id oh-ohhah nanginnila ay ni arkhaw wenno oras an pumpfangngachaˈ, anong un hana angher Apo Jos ja ha-in an Empfalay na. Angkhay hi Jos Ama chi nanginnila. 33 Hotti peˈhehemad ju ja niˈhahalichit ju, ti agkhuy ju anila hini timpo an pumpfangngachaˈ. 34 Hay omaˈ-atan chi pumpfangngachaˈ ja amat hi takhu an munhakhana an i mumpfaat. Epulang na ay cha nuy takhala na hini pfalay na ta gwahchinonon hon anila nay peˈ-at na. Ja inali na ay ni oha ta pfapfabpfantajana hini pantaw. 35 Amat hina khu ay chaˈju an peˈhehemad ju, ti agkhuy ju anila hini timpo an pumpfangngachaˈ an Apo ju, nu mahihilip, tongan chi lapfi, tumalanu, wenno hi herhelong. 36 Ti nu himpfumagkha ja gwachaaˈ, ja maphod nu achi chaˈju ah-upan an nanalloˈ. 37 Hotti hitay inaliˈ ay chaˈju ja alloˈ an amin hi tatakhu ta munhahagkhana cha ay ni pumpfangngachaˈ.”